VOV4.Êđê- Knŏng hlăm wang 1 hruê kăm anei, ƀuôn prŏng Ƀuôn Ama Thuôt, čar Dak Lak mâo 2.482 čô ruă Covid 19, hlăm anăn mâo 2.245 čô ruă hlăm êpul êya. Ti anăp klei mâo dleh dưi ksiêm dlăng mơ̆ng klei ruă tưp, tlam hruê 22/2, ƀuôn prŏng Ƀuôn Ama Thuôt mdah leh klei hưn mthâo mrô 524 kơ bruă ba yua dŭm hdră kñăm gang mkhư̆ klei ruă Covid 19 ti alŭ wăl ƀuôn prŏng mơ̆ng 6h hruê 23/2/2022 truh kơ hbĭl mâo klei hưn mthâo mrâo. Hluê anăn, ƀuôn prŏng Ƀuôn Ama Thuôt brei mdei êjai hdră duh mkra mnia mblei, ngă bruă huĭ mâo hnơ̆ng tưp lar lu hĭn (anôk kdŏ mmuñ, karaoke, mátxa, bar, Internet, hlăp điện tử), dŭm anôk bi msiam čô̆ mta, spa…

Mdei êjai hdră mtô bi hriăm ti sang hră hŏng phung hđeh điêt lehanăn pŏk hdră bi hriăm online hŏng phung hđeh gưl 1, adŭ 6,7,8 lehanăn 10,11. Hŏng hđeh adŭ 9 lehanăn 12 lehanăn dŭm anôk mtô bi hriăm mkăn hlăm alŭ wăl ăt mtô bi hriăm ti sang hră ƀiădah brei rơ̆ng kjăp hdră gang mkhư̆ klei ruă Covid 19; phung nai mtô, sinh viên, phung hđeh nao hriăm brei tlŏ ênŭm 2 aruăt vaccine amâo dah hlao leh klei ruă Covid 19 amâo êgao 6 mlan. Tĭng truh ară anei, ƀuôn prŏng Ƀuôn Ama Thuôt mâo leh 7.540 čô ruă Covid 19, hlăm anăn mâo 2620 čô hlao. Ƀuôn Ama Thuôt ăt jing sa alŭ wăl ti Dak Lak jing krĭng hrah mda – hnơ̆ng 3 (krĭng huĭ hyưt tưp klei ruă)./.

Pô mblang: H’Nêč Êñuôl