Hluê si klei bi klă, bruă duh mkra ala ƀuôn mơ̆ng ƀuôn prŏng hlăm 4 mlan akŏ thŭn lŏ dơ̆ng mâo lu boh tŭ dưn jăk. Kluôm hnư hrui wĭt bruă hiu čhưn ênguê mlan 4 đăo tĭng mâo giăm 20.000 êklai prăk, đĭ 30% mkă hŏng wưng anei thŭn dih…

Bruă mprăp kơ bruă mkŏ dăp anôk bruă knŭk kna dŭm gưl leh anăn bruă sang čư̆ êa alŭ wăl dua gưl dưi ngă mjêč, čŏng pô leh anăn djŏ wưng kčah. Dŭm bruă klam, hdră êlan mtrŭt mđĭ klei đĭ kyar dưi ngă ktang phĭt. Dŭm hdră bruă yuôm bhăn, hdră kñăm, êlan klông lŏ dơ̆ng dưi mtrŭt mđĭ bi hmar. Boh nik, ƀuôn prŏng Hồ Chí Minh mkŏ mjing tŭ jing leh dŭm mta bruă bi hdơr 50 thŭn hruê mtlaih êngiê kwar Dhŭng, hluh hlir lăn čar, mkŏ mjing ai êwa hơ̆k mơak lar bra hlăm lăn čar leh anăn wăt mnuih ƀuôn sang ti ala tač êngao, mah jiăng tar rŏng lăn uêñ mĭn. Mơ̆ng klei sa ai mơ̆ng mnuih ƀuôn sang, klei tŭ jing dŭm mta bruă êgao jing tur knơ̆ng čiăng kơ ƀuôn prŏng Hồ Chí Minh mkŏ mjing sa knăm mơak hluh hlir grăp wưng hruê 30/4 grăp thŭn, bi êdah knhuah gru leh anăn mkŏ mjing mnơ̆ng dhơ̆ng bruă hiu čhưn ênguê, dhar kreh mơ̆ng ƀuôn prŏng.