VOV4.Êđê - Aguah mbruê, 7/10, Êpul hgŭm ƀĭng ngă lŏ hma ƀuôn prŏng Hồ Chí Minh mkŏ mjing klei pah mni 28 čô ƀĭng ngă lŏ hma kdlưn hĭn kyua dŭm klei đru mguôp kơ bruă lŏ hma ƀuôn prŏng, mkŏ mkra krĭng ƀuôn sang mrâo. Mbĭt hŏng 28 čô leh anăn 30 mta mnơ̆ng dhơ̆ng mâo klei pah mni, wưng anei ti ƀuôn prŏng Hồ Chí Minh lŏ mâo lu phung ƀĭng ngă lŏ hma mâo klei bi hmô hŏng dŭm mta mnơ̆ng dhơ̆ng tŭ jăk, mkŏ mjing ai bi lar klei bi hmô “Pô ngă lŏ hma mrâo”.

Ti wăl tač sang dhar kreh hđeh êdam êra ƀuôn prŏng Hồ Chí Minh mâo 124 anôk rang mdah dŭm mta mnơ̆ng dhơ̆ng mơ̆ng bruă lŏ hma ƀuôn prŏng msĕ si: Mnga pôk, bon sai, ana kyâo bi msiam, djam mtam, mmao, mnơ̆ng đŭng hruh, asăr mjeh, hbâo pruê, mnơ̆ng yua ngă bruă… Mbĭt hŏng dŭm êtuh mnơ̆ng dhơ̆ng bruă lŏ hma phŭn, mnơ̆ng OCOP mâo hnơ̆ng tŭ jăk, jăk hŏng wăl hdĭp mda.

VOVTâyNguyên/Pô mblang: Y-Ƀel Êban