VOV4.Êđê - Aguah mbruê 20/7, ƀuôn prŏng Hồ Chí Minh pah mni mjêč 150 êklăk prăk kơ adei Nguyễn Việt Phong, hđeh sang hră adŭ 12, sang hră gưl tlâo chuyên Lê Hồng Phong, jing sa hlăm 4 čô nao bi lông mâo mă mêđai êa mah hlăm klei bi lông Olympic Hoá học tar rŏng lăn thŭn 2022. Nguyễn Văn Hiếu, khua kiă kriê knơ̆ng bruă mtô mjuăt bi hriăm ƀuôn prŏng Hồ Chí Minh brei thâo, sui leh ƀuôn prŏng Hồ Chí Minh lŏ mâo klei kdlưn hĭn msĕ sơnăn. Anei jing klei gĭr ktưn mơ̆ng adei leh anăn gŏ sang, phung nai mtô, sang hră mơar. Nguyễn Văn Hiếu hmăng hmưi adei Nguyễn Việt Phong lŏ dơ̆ng bi lar klei thâo pô čiăng dưi ngă klei hmăng hmưi, đru mguôp lu hĭn kơ ƀuôn prŏng Hồ Chí Minh leh anăn ala čar. Nguyễn Việt Phong jing sa hlăm dŭm čô bi lông mâo mă prăk pah mni mâo ênoh 200 êklăk prăk kơ phung hđeh sang hră, phung bi lông mâo mă mêđai êa mah hlăm dŭm klei bi lông Olympic tar rŏng lăn. Klei bi lông Olympic hóa học tar rŏng lăn thŭn 2022 dưi mkŏ mjing ti China. Êpul bi lông mơ̆ng Việt Nam mâo 4 čô. Boh tŭ jih 4 čô dưi mâo mă mêđai êa mah sơăi.

Y- Ƀel pô mblang