Knhal jih mlan 8 mrâo êgao, hdră Mniê dlăng bruă Đảng livestream čhĭ durian mbĭt hŏng mnuih ƀuôn sang ti đang durian mơ̆ng ƀuôn hgŭm Ea Knuêč, čar Dak Lak. Mơ̆ng aguah ưm, dŭm boh durian ksă kñĭ dưi dăp khuăt hlăm bŭng Êđê, dưm ti djiêo jhưng livestream lang mnal pơ̆k mñam. Ti jhưng mdưm đĭng blŭ pŏk Camera mđung mông anăn mtam, anôk H’Jih Kbuôr (kreh iêo aduôn Trúc) gưl tal êlâo čhĭ mnơ̆ng online. Dôk ti anăp đĭng blŭ, aduôn Trúc mbĭt hŏng khua gĭt gai ƀuôn hgŭm yăl dliê kơ klei pla durian leh anăn hun hŏng grăp čô kơ boh kroh mơ̆ng gŏ sang pô pla. Aduôn Trúc brei thâo:“Kâo hriê kơnei hŏng khua bruă Đảng ƀuôn hgŭm čiăng yăl dliê kơ yan durian. Mnuih ƀuôn sang hlăm ƀuôn ăt hmăng hmưi durian mâo ênoh čiăng kơ klei hdĭp mnuih ƀuôn sang tinei đĭ kyar hĭn”.

Knŏng hlăm sa mmông mđung online, 60 tôn durian dưi ba čhĭ. Dŭm blei lŏ dơ̆ng čuê, mâo dŭm klei čih mơĭt mơ̆ng phung tuê hlăm đĭng blŭ brei kơ mnuih ƀuôn sang ƀuh jăk êdi. Hŏng anăn knăl “Durian amĭ kâo”, ƀuôn sang amâo djŏ knŏng čhĭ mnơ̆ng dhơ̆ng, ƀiădah lŏ yăl dliê kơ hdră mkra mjing, hŏng klei mñă klă leh anăn klei ƀuăn kơ hnơ̆ng jăk. Mơ̆ng anei, sa êlan nao mrâo kơ bruă mđĭ hnơ̆ng boh mnga hlăm online, êlan nao jĕ mrâo, klă anăp hĭn dôk pŏk ƀrư̆ ƀrư̆.

Nguyễn Công Điềm, mnuih djuê ana Nùng, pô gru hmô durian dui ruah ngă anôk čhĭ mnia, ƀuh klă boh tŭ mơ̆ng klei čhĭ mnia online, ăt mĭn leh kơ pô sa mbah čhĭ mnơ̆ng dhơ̆ng êngiê.“Kâo pô êdei anăt ăt čiăng mâo sâ mbah čhĭ mnia hjăn čiăng mkŏ plah wah phung pla mjing hŏng phung blei yua, pô srăng hơĭt amâo lŏ êgao kngan pô mkăn ôh”.

Hdră livestream anei jing bruă nao êlâo čiăng ngă hră grăp ƀuôn hgŭm sa KOL(Key Opinion Leader  - pô mâo klei hmăi phŭn), ba mnơ̆ng dhơ̆ng Dak Lak nao hlăm wăl anôk mrô mơ̆ng ƀuôn hgŭm Ea Knuêč. Rup sa čô khua dlăng bruă Đảng ƀuôn hgŭm jing KOL bruă lŏ hma brei leh klei lŏ čuê kơ mnuih ƀuôn sang. Anei jing hdră mrâo kơ adŭ hriăm mnuih ƀuôn sang hriăm kơ bruă mrô čiăng kơ ƀĭng ngă lŏ hma, boh nik jing mnuih djuê ƀiă, jhŏng hĭn hlăm klei mnia mblei online Ngô Thị Minh Trinh, khua dlăng bruă Đảng ƀuôn hgŭm Ea Knuêč mñă klă: Mbĭt hŏng mnuih ƀuôn sang livestream čhĭ durian amâo djŏ knŏng jing brua đru kơ yan hrui pĕ ƀiădah lŏ jing klei hâo hưn ktang: khua gĭt gai ngă êlâo, bi hmô, ktŭng grăp čô hlăm wăl anôk mrô. “Kâo čiăng grăp čô ƀĭng ngă lŏ hma srăng hrăm mbĭt hlăm klei mlih mrô anei, mơ̆ng mnuih ƀuôn sang mrô, dưi livestream čhĭ mnơ̆ng ti sang, hun mdah dŭm knhuah siam mơ̆ng ƀuôn ssang pô truh hŏng grăp čô, hŏng phung tuê čiăng thâo leh anăn uêñ mĭn kơ pô lu hĭn. Mbĭt hŏng mnuih ƀuôn sang ba boh mnga kơ anôk mnia mblei leh anăn ƀrư̆ ƀrư̆ bi mlih klei mưn, hrăm mbĭt čiăng kơ mnuih ƀuôn sang hriăm kơ bruă mrô”.

Klei nao hgŭm mơ̆ng jih jang, mơ̆ng knuă druh, khua gĭt gai, truh kơ grăp čô mnuih ƀuôn sang, hdră ƀuôn sang mrô jing klă sĭt hĭn leh anăn kjăp hĭn. Amâo djŏ knŏng ti Ea Knuêč, lu alŭ wăl ti Dak Lak hlăm čar Dak Lak dôk hrăm mbĭt ngă hdră anei. Mơ̆ng dŭm klei mă rup mnơ̆ng dhơ̆ng, mkra video, wĭt lač klei êmuh, đŭng hruh leh anăn jao mnơ̆ng truh kơ klei pŏk camera, livestream leh anăn čhĭ mnơ̆ng jing leh hdră ngă klă sĭt ba kdrăp mrâo mrang hlăm bruă lŏ hma ti dŭm ƀuôn êlan.

Bùi Thanh Toàn, Khua knơ̆ng bruă kreh knhâo leh anăn mrâo mrang čar brei thâo, mta phŭn hlăm klei mlih mrô jing bruă mkŏ mkra. Kyuanăn, mgaih msir êlan dăng kông dưi uêñ mĭn hluê ngă hŏng mta kñăm 100% mnuih ƀuôn sang dưi yua Internet, ngă klei čhĭ mnia online hlăm knhal jih thŭn anei. “Knơ̆ng bruă kreh knhâo mrâo mrang bi mguôp hŏng dŭm anôk bruă djŏ tuôm đru kčĕ hŏng Bruă sang čư̆ êa čar čiăng gĭt gai dŭm knơ̆ng bruă dăng kông, klei hưn mthâo mrâo mrang bi nao hgŭm, gĭt truh jih thŭn 2025 ti alŭ wăl amâo lŏ mâo anôk amâo mâo dăng kông. Leh mâo djăp bruă mkŏ mkra, djăp Internet mnuih ƀuôn sang mâo klei găl thâo kơ klei bi mlih mrô”.

Mơ̆ng bruă mkŏ mkra mrô, čar Dak Lak dôk yua dŭm hnơ̆ng čuăn bruă duh mkra kơ grăp ƀuôn hgŭm. Mbĭt hŏng bruă mđĭ kyar klei kreh knhâo mrâo mrang, mlih mrâo mbruă leh anăn bi mlih mrô hlăm bruă lŏ hma, mnia mblei leh anăn hiu čhưn ênguê, čar dôk mkŏ mjing sa krĭng ƀuôn sang mrâo truh hŏng grăp ƀuôn sang. Êjai ƀĭng ngă lŏ hma thâo ngă phŭn klei mrâo mrang, krĭng ƀuôn sang mrâo amâo djo knŏng jing êlan bê tông amâodah čuôr sang siam, ƀiădah jing wăl hdĭp thâo mĭn, mkŏ leh anăn knhuah gru. Hlăm wăl anôk anăn, grăp boh đĭng blŭ thâo mĭn jing kdrăp yua mă bruă kơ ƀĭng ngă lŏ hma./.