VOV4.Êđê - Êpul kahan răng mgang knông lăn Kon Tum bi hgŭm hŏng êpul kahan răng mgang knông lăn čar Tây Ninh mrâo mkŏ mjing dŏng mtlaih, ba wĭt kơ ala čar tŭ jing adei Y Liên arăng mplư ba chĭ ti Campuchia hŏng klei ƀuăn bruă hdjul prăk mlan lu. Ya klei dôk mâo hŏng Y Liên brei ƀuh dôk mâo lu klei mplư jŭm dar phung hđeh hlăk mĭn ka klă, ka mâo klei thâo hlăm klei hdĭp leh anăn kƀah klei răng.

Leh êbeh 2 hruê mâo lĭng kahan răng mgang knông lăn dŏng mtlaih mơ̆ng Campuchia wĭt hŏng gŏ sang, Y Liên ƀrư̆ h’ĭt leh ai tiê. Drông hmei hlăm sa boh sang ti alŭ Kei Joi, să knông lăn Đăk Xŭ, kldriêk Ngọc Hồi, čar Kon Tum, mnuih hlăm gŏ sang, boh nik aduôn, amĭ ama lehanăn phung adei Y Liên hơ̆k kdơ̆k s’aĭ. Ayŏng A Van, ama Y Liên lač snei: “Kâo m’ak, kâo hia amâo thâo lŏ ngă ôh, rôč êa ală. Hia kăn djŏ hia, tlao kăn djŏ tlao lei. Ayŏng adei lĭng kahan răng mgang knông lăn lač đăm lŏ ênguôt ôh.

Boh phŭn ngă kơ Y Liên, 16 thŭn, djuê ana Sedang, sang dôk să knông lăn Đăk Xŭ, kdriêk Ngọc Hồi, čar Kon Tum arăng mplư ba čhĭ ti Campuchia kbiă hriê mơ̆ng adei yơh. Akŏ thŭn 2022, Y Liên ba yua hră kak asei mnuih hlăm sang čiăng kơ djăp thŭn dưi nao mă bruă lehanăn nao hluê sa čô ti Bình Dương mă bruă.

Hlăm wưng anei, Liên kral sa čô êkei mâo anăn Facebook jing Lê Ngọc Nhất. Nhất mplư Liên nao kơ Campuchia mă bruă hdjul, prăk mlan truh 20 êklăk prăk/mlan, kơ sa anôk bruă mơ̆ng China lehanăn ƀuăn tơdah amâo dưi mă, Nhất srăng brei prăk kơ Liên lŏ wĭt ti Việt Nam.

Hruê 18/4/2022 Y Liên mbĭt hŏng 5 čô mkăn, mâo 2 mniê, 3 êkei amâo thâo anăn, kăn kral dưi ba nao ti Campuchia găn êlan điêt krĭng knông lăn čar Long An. Truh ti Campuchia diñu mă bruă mdê mdê, amâo lŏ bi tuôm ôh. Ka jih mơh klei huĭ dôk yăl dliê kơ dŭm klei pô găn leh, Y Liên brei thâo, tŭ lu klei arăng ngă jhat nanao êjai dôk mă bruă hlăm anôk bruă mơ̆ng China ti Campuchia: “Hmư̆ arăng lač tơdah amâo thâo mă bruă, srăng ba čhĭ kơ anôk mkăn, dưm hlăm guôm kđăl krĭp hwiê hlăm êa ksĭ, brei kơ mja ƀơ̆ng. Kâo knŏng dưi dôk ti anôk bruă đuič, amâo dưi kbiă ti tač ôh. Mâo dŭm anôk, mă bruă mơ̆ng 6h aguah truh kơ 12h mlam. Mâo anôk mă bruă mơ̆ng 10h yang hruê truh kơ 11h mlam. Mâo anôk mă mơ̆ng 11h mlam truh kơ 11h yang hruê.

Kyua mă bruă amâo dưi, mơ̆ng mlan 4 truh kơ mlan 7/2022, Y Liên mâo ba čhĭ kơ 6 anôk bruă, grăp blư̆ snăn, ênoh prăk čhĭ đĭ mơ̆ng 1.800 USD truh 3.500 USD. Anei jing ênoh prăk mâo anôk bruă tal 6 brei Y Liên tla tơdah čĭng mdei bruă wĭt ti Việt Nam. Klei huĭ hyưt hĭn, jih 6 anôk bruă Y Liên mă bruă ti Campuchia mâo mta kñăm msĕ, anăn jing mă mnuih mă bruă hluê app diñu mkŏ čiăng bi kral, nplư mplêč lehanăn jak ba nao mă bruă ti Campuchia: “Pô duah mnuih, brei arăng khăp kơ pô. Leh khăp sĭt êmĭt, arăng srăng đăo knang kơ pô. Pô brei arăng mnah prăk hlăm đĭng blŭ arăng ngă mơh. Arăng khăp, đăo knang leh kơ pô, tơdah pô lač čiăng prăk 100 êklăk, gơ̆ ư mơh. Arăng amâo prăk pô brei hiu čan. Tơdah gơ̆ amâo nao čan pô srăng duah mnuih mkăn mâo prăk hĭn. Pô čiăng duah prăk tal êlâo srăng ngă krel bi khăp, êdei anăn srăng hưn mă bruă tinei hdjul ƀiădah prăk mlan lu. Diñu duah mnuih ti Việt Nam mă bruă ti Campuchia srăng mâo prăk mnga mơ̆ng 300USD truh 500USD/čô mnuih.

Jing mniê êra djuê ana Sedang, mrâo 16 thŭn, amâo mưng kơ bruă, amâo dưi tŭ klei mplư lačdah khăp ƀiădah mplư prăk lehanăn čiăng mplư mă čih mnuih, hruê 17/7/2022, Y Liên mañ đĭng blŭ sa čô mnuih Việt Nam mă bruă mbĭt iêu kơ gŏ sang nao mtlaih. Kđông kahan răng mgang knông lăn Đăk Xŭ thâp boh klei mơ̆ng Y Liên kyua anăn nao hưn hŏng Knơ̆ng gĭt gai lĭng kahan răng mgang knông lăn čar Kon Tum.

Hŏng klei gĭr dŏng mtlaih Y Liên, hluê hŏng hdră msir thơ̆ng kơ bruă, Adŭ bruă bi kdơ̆ng hŏng matuĭ lehanăn phung ngă soh, Knơ̆ng gĭt gai lĭng kahan răng mgang knông lăn čar Kon Tum bi hgŭm hŏng êpul kahan răng mgang knông lăn Tây Ninh ba wĭt leh Y Liên wĭt kơ Việt Nam hlăm hruê 20/8/2022. Wưng dŏng mtlaih ñu dôk ti sa anôk bruă ti mrô 702, Bãi Si Hai, čar Sihanouk, Campuchia kbưi ƀăng jang knông lăn prŏng Mộc Bài, Tây Ninh hlăm brô 470 km tĭng kơ Dhŭng. Hưn mthâo kơ hdră dŏng mtlaih, Thiếu tá Bùi Công Huân, knuă druh Êpul kahan knhăk mơ̆ng Adŭ bruă bi kdơ̆ng hŏng matuĭ lehanăn phung ngă soh, Knơ̆ng gĭt gai lĭng kahan răng mgang knông lăn čar Kon Tum, brei thâo: “Hdră dŏng mtlaih dleh dlan êdi. Čiăng iêu kơ pô anei dleh mơh kyua amâo dưi yua đĭng blŭ, dleh snăk thâo ti anôk ñu dôk. Hlăm hdră mă bruă, arăng kpĭ brei mă mơ̆ng 12 truh 18h/hruê. Êngao anăn huă ƀơ̆ng, pĭt đih sa anôk amâo dưi kbiă ti tač. Mâo êpul kăp gak răng, amâo dưi kbiă, amâo thâo anôk dôk dleh êdi kơ hmei hlăm hdră dŏng mtlaih.

Leh êbeh 2 hruê dŏng mtlaih, dưi wĭt hŏng gŏ sang ti alŭ Kei Joi, să knông lăn Đăk Xŭ, kdriêk Ngọc Hồi, čar Kon Tum. Y Liên lŏ h’ĭt ai tiê. Mâo klei mđĭ ai mơ̆ng phung kahan răng mgang knông lăn, aduôn aê, amĭ ama, phung adei, ñu lŏ yăl dliê jih klei mâo hlăk arăng ba čhĭ, dôk mă bruă hlăm 6 anôk bruă mơ̆ng mnuih China ti krĭng lăn Campuchia. Klei Y Liên čang lač êdi mmông anei jing lač jăk kơ phung kahan răng mgang knông lăn lehanăn čang hmăng amâo mâo mnuih arăng mplư nao ti Campuchia mă bruă hdjul pral mưn lu msĕ si Y Liên./.