VOV4.Êđê- Čar Kon Tum mâo leh bruă ngă ktang phĭt leh klei hưn mơ̆ng VOV kơ dŭm klei ngă soh hlăm bruă mă čuah ti krông Pô Kô, ti ƀuôn Ka Nhăi, să Đăk Nông, kdriêk Ngọc Hồi leh anăn ti krông Đăk Psi, ti alŭ 7, să Đăk Psi, kdriêk Đăk Hà. Năng mđing hĭn, knơ̆ng bruă ngăn dŏ leh anăn wăl hdĭp mda čar Kon Tum ba wĭt leh hră mơar brei klei dưi mă čuah, boh tâo, mnơ̆ng gŭ lăn ngă mnơ̆ng yua bruă mkŏ mkra msĕ yăng đar ti anôk mă čuah krông Đăk Psi, alŭ 7, să Đăk Psi, kdriêk Đăk Hà.

Klă klơ̆ng hlăm hră mơĭt kơ êpul ngă bruă ksiêm dlăng klei mă čuah, boh tâo ti alŭ wăl čar Kon Tum, knơ̆ng bruă ngăn dŏ leh anăn wăl hdĭp mda, adŭ bruă bruă sang čư êa čar Kon Tum jao kơ êpul ngă bruă gĭt gai, bi mguôp hŏng knơ̆ng bruă êlan klông leh anăn dŭ mdiăng ksiêm dlăng, bi klă mta phŭn klei čih hưn mơ̆ng bruă klei mrâo, buah mkra dŭm klei ngă soh, tơdah mâo hluê si klei dưi leh anăn klei bhiăn ala čar.

Pô mblang: Y-Ƀel Êban