Nao ti knăm mtrŭt mjhar, phung bi ala pioh leh sa mnĭt bi hdơr kơ phung djiê lehanăn knuă druh lĭng kahan săn asei êjai ngă bruă klam đru kơ mnuih ƀuôn sang hlăm yan hjan êa lip lêč. Ti knăm anei, lu êpul êya, knuă druh mâo leh hdră đru, boh nik phung knuă druh, mnuih ƀuôn sang Kon Tum đru leh 400 êklăk prăk.

Bruă Đảng čar, Anôk bruă sang čư̆ êa, Êpul gơ̆ng bruă ƀuôn sang čar Kon Tum ăt iêu mthưr phung knuă druh, mnuih ƀuôn sang hlăm čar đru kơ mnuih ƀuôn sang dŭm čar, ƀuôn prŏng nah Dưr luič liê kyua angĭn êbŭ mrô 3 ngă, mtrŭt mjhar dŭm gưl, anôk bruă, êpul êya, mnuih ƀuôn sang hŏng bruă ngă klă sĭt, ai tiê thâo bi đru lehanăn klei hgŭm mguôp srăng đru lu hĭn čiăng kơ mnuih ƀuôn sang hnưm hgao klei dleh dlan, bi hơĭt klei hdĭp./.