VOV4.Êđê- Hlăm hruê 21 - 22/9, Đoàn Êdam êra Cộng sản Hồ Chí Minh čar Dak Nông mkŏ mjing leh Klei kƀĭn phung bi ala tal IV, wưng thŭn 2022-2027, mâo 200 čô bi ala kơ êbeh 157.000 čô đoàn viên êdam êra kluôm ala. Anei jing čar tal êlâo ti krĭng Lăn dap kngư mkŏ mjing Klei bi kƀĭn anei. Hluê klei hưn, wưng êgao, êpul êdam êra Dak Nông dưi mâo 11/12 hnơ̆ng čuăn. Êdah êdi jing hdră mkŏ mkra krĭng ƀuôn sang mrâo, hluê ngă giăm 7 êbâo hdră bruă hŏng êbeh 38,43 êklai prăk. Phung êdam êra čar mkŏ mjing leh dŭm êbâo hdră mtô mblang, trŭn kơ bruă răng mgang wăl hdĭp mda, msir mghaih djah djâo, pla mrâo êbeh 700.000 ƀĕ ana kyâo mtah, mkra 127 anôk mjĕ mjuk, hlăp lêñ kơ phung hđeh, hluê ngă hdră đru kơ phung hđeh dleh dlan êbeh 15 êklai prăk.

Hŏng pruê̆ blŭ: Phung êdam êra Dak Lak ba anăp, mĭn mrâo, đĭ kyar”, Klei kbiƀn anei ba mdah leh 12 êpul mta kñăm, 8 hdră bruă, gĭr bi leh jih hdră bruă mâo kčah ba wĭt klei tŭ dưn. Năng mđing jing dŭm mta kñăm: Grăp thŭn pla mrâo 250.000 ƀĕ ana kyâo, đru 10 alŭ, ƀuôn dleh dlan bi leh hnơ̆ng čuăn mkŏ mkra krĭng ƀuôn sang mrâo, đru 200 êklai prăk kơ phung êdam êra čan mphŭn čô̆ kơ bruă, đru bi hrŏ 6% ênoh gŏ êsei mnuih djuê ƀiă ƀun grăp thŭn…

                                                    Pô mblang: H’Nêč Êñuôl