6 mlan akŏ thŭn, kluôm mnơ̆ng dhơ̆ng mơ̆ng čar Dak Nông mâo giăm 9.600 êklai prăk, đĭ êbeh 5%, dôk tal 2 ti krĭng Lăn Dap Kngư. Hnư knŭk kna hrui wĭt mâo giăm 1.500 êklai prăk. Hlăm ênoh 3.200 êklai prăk duh bi liê bruă knŭk kna thŭn 2024, truh kơ jih mlan 6, čar knŏng mrâo brei čan hlăm brô 27%. Boh nik jing ênoh 3 hdră ala čar kñăm ti alŭ wăl ară anei dôk brei čan êmưt.

Êpul gơ̆ng bruă ƀuôn sang čar Dak Nông bi klă, mâo lu klei dôk mâo, dleh hlăm klei mđĭ kyar bruă duh mkra ala ƀuôn mơ̆ng čar. Hlăm anăn dŭm klei kpăk gun, lăp wĭt klei čuăl mkă mnơ̆ng gŭ lăn, boh nik jing bosit dôk hmăi amâo mâo jăk truh kơ bruă hluê ngă dŭm bruă klam bruă duh mkra mơ̆ng alŭ wăl. Čar Dak Nông tĭng mkă mâo êbeh 1.000 hdră, bruă mkŏ mkra dlông ênhă 6.700ha mđrĭng mbĭt hŏng čuăl mkă bosit. Čar mâo leh lu blư̆ hưn mdah hŏng gưl dlông ƀiădah truh kơ ară anei ăt ka dưi ruh mgaih.