Mkrah thŭn êgao, gŏ sang Lê Huy Dũng, ti wăl krah Lộc Thắng, kdriêk Bảo Lâm, čar Lâm Đồng lĕ hlăm klei amâo mâo sang dôk. 5 čô hlăm gŏ sang 3 gưl hiu duah mưn sang jưh hdĭp grăp hruê, klei hdĭp bŏ hŏng dleh dlan. Mta phŭn jing boh sang gŏ sang diñu jhat rai leh anăn mdlưh hĕ. Hlăk êjai ngă hră mơar mdơ̆ng sang mrâo snăn bruă sang čư̆ êa alŭ wăl amâo mkăp brei ôh hră mơar kyua jih jang ênhă lăn gŏ sang ñu dôk hlăm anôk čuăl mkă mnơ̆ng hlăm gŭ lăn. Lê Huy Dũng, lač:

 “Akâo kơ Knŭk kna mâo hră mơar mrâo, amâodah mkra mđĭ, bi mlih čiăng mnuih ƀuôn sang hmei mâo klei hdĭp mda jăk mơak. Klă sĭt mâo lăn ƀiădah amâo mâo ôh sang dôk, amâo sang sang snăn hmei amâo thâo ôh si srăng ngă, ñu dleh dlan leh anăn suăi snăk”.

Gŏ sang Phạm Thị Năm, ti ƀuôn hgŭm Lộc Tiến, ƀuôn prŏng Bảo Lộc, čar Lâm Đồng ăt lĕ hlăm boh klei snăn mơh. Sang dôk, lăn pla mjing gŏ sang dôk yua hơĭt kjăp, djŏ hdră bhiăn, dôk hlăm wăl mnuih ƀuôn sang lu mnuih ƀiădah arăng kđăl hĕ, amâo dưi mgrơ̆ng čan prăk duh bi liê ôh. Phạm Thị Năm brei thâo:

 “Ƀuôn hgŭm Lộc Tiến hmei mâo dŭm gŏ êsei lu anak čô, hdĭp mbĭt 3-4 gưl ênuk ƀiădah amâo dưi mbha kơ phung anak čô dôk hjăn ôh. Lu gŏ êsei čiăng mđĭ kyar bruă duh mkra, čiăng čan prăk knơ̆ng prăk ăt kăn dưi mơh kyua gun hŏng klei čuăl mkă. Boh nik, ară anei lu gŏ êsei mnuih ƀuôn sang jhat rai leh kjham ƀiădah čiăng mkra mđĭ ăt kăn dưi mkra mơh”.

          Hlue si Hdră mtrŭn 866 hruê 18/7/2023 mơ̆ng Khua knŭk kna kơ bruă bi mklă Hdră čuăl mkă hiu ksiêm dlăng, ba yua, mkra mjing leh anăn yua dŭm mta mnơ̆ng hlăm gŭ lăn ênuk 2021-2030, hnơ̆ng trah dlăng truh thŭn 2050, ti čar Lâm Đồng mâo êbeh 70.000ha čuăl mkă mtŭk mtul, hmăi kơ dŭm êbâo gŏ êsei hŏng giăm 100 êbâo čô. Hlue si Võ Ngọc Hiệp, K’iăng Khua Knơ̆ng bruă sang čư̆ êa čar Lâm Đồng, bruă čuăl mkă mnơ̆ng gŭ lăn mtŭk mtŭl hlăm krĭng mnuih ƀuôn sang dôk amâo djŏ knŏng ngă rŭng răng, dleh dlan kơ bruă mkra mjing leh anăn klei hdĭp mnuih ƀuôn sang ôh ƀiădah lŏ ngă kơ hdră mkŏ mjing hdră čuăl mkă mđĭ kyar bruă duh mkra- ala ƀuôn ti čar êmưt.

 “Čiăng rơ̆ng klei đĭ kyar kjăp snăn brei ksiêm dlăng ruh mgaih klei dleh dlan hlăm klei mtŭk mtŭl čuăl mkă ba yua, hiu ksiêm dlăng mnơ̆ng hlăm gŭ lăn. Jih jang êbeh 50% ênhă lăn ti kdriêk Bảo Lâm, sa kdrêč mơ̆ng Bảo Lộc ăt dôk ti wăl krah, leh anăn dŭm hdră bruă bi liê knŭk kna, lu krĭng mđĭ kyar… dôk hlăm krĭng čuăl mkă, hiu ksiêm dlăng, ba yua, mkra mjing mnơ̆ng hlăm gŭ lăn. Ară anei jih bruă ngă êmưt sơăi, wăt dŭm wăl ƀuôn prŏng, wăl mnuih ƀuôn sang dôk, wăl anôk dôk mrâo”.

Ƀuh klă klei kƀah mơ̆ng Hdră čuăl mkă mnơ̆ng hlăm gŭ lăn hlue si Hdră mtrŭn 866, hlăm gưl mă bruă hlăk knhal jih mlan 8/2024 ti čar Lâm Đồng, Khua knŭk kna Phạm Minh Chính gĭt gai Phŭn bruă ngăn dŏ leh anăn Wăl hdĭp mda mjêč ktuê dlăng leh anăn ruh mgaih. Khua knŭk kna Phạm Minh Chính, lač klă:

      Anei jing gun hŏng hdră bhiăn, kyua anăn Phŭn bruă ngăn dŏ wăl hdĭp mda brei kƀĭn, ba mkra mlih Hdră bhiăn mnơ̆ng hlăm gŭ lăn, boh nik dŭm bruă amâo msĕ hŏng boh sĭt êlâo dih pô ngă. Ară anei ka dưi mă ôh mnơ̆ng hlăm gŭ lăn snăn brei arăng yua lăn mâo mnơ̆ng hlăm gŭ lăn, pla mjing, hdĭp mda, bi hbĭl srăng mă mnơ̆ng hlăm gŭ lăn snăn tĭng dlăng êdei. Tinei, čuăl mkă mnơ̆ng hlăm gŭ lăn snăn srăng djiê, tơdah snăn hŏng mnuih ƀuôn sang srăng hdĭp? Anăn jing amâo djŏ hŏng boh sĭt ôh”.

Hŏng klei Khua knŭk kna gĭt gai, mnuih ƀuôn sang čar Lâm Đồng dôk čang hmăng dŭm anôk bruă djŏ tuôm pral ruh mgaih klei amâo djŏ guôp hlăm hdră čuăl mkă mnơ̆ng hlăm gŭ lăn čiăng hơĭt klei hdĭp mda, mđĭ kyar bruă duh mkra ala ƀuôn./.