VOV4.Êđê - Hruê 15/4, ti anôk bruă knŭk kna, K’iăng khua knŭk kna Lê Văn Thành gĭt gai leh Klei bi kƀĭn online hŏng dŭm alŭ wăl kơ bruă bi leh Hdră čuăl mkă mđĭ kyar bruă pui kmlă ala čar wưng thŭn 2021-2030, hnơ̆ng trah dlăng 2045 (Hdră čuăl mkă pui kmlă 8).  Klah čŭn ti anôk bi kƀĭn, K’iăng khua knŭk kna Lê Văn Thành bi mni dŭm klei blŭ ti anôk bi kƀĭn lehanăn lač, dŭm klei blŭ bi êdah klei đua klam, mâo boh tŭ yuôm hlăm klei čih mkra Hdră čuăl mkă pui kmlă 8. Kyua anăn, Hdră čuăl mkă pui kmlă 8 mâo êpul êya tar rŏng lăn lehanăn dŭm alŭ wăl, anôk bruă duh mkra, phung duh bi liê čang guôn čiăng tă hdră duh bi liê mđĭ kyar anôk bruă pui kmlă hlăm wưng ti anăp. K’iăng khua knŭk kna Lê Văn Thành lač klă, mdưm klei tŭ kơ ala čar, kơ djuê ana jing mrô sa, tal êlâo hĭn hlăm klei gĭt gai hdră čuăl mkă pui kmlă 8 mơ̆ng knŭk kna, Khua knŭk kna.

H’Nêč pô mblang