Ung mô̆ amai Trương Thị Tuyết Vân, ti alŭ Từ Nham, ƀuôn hgŭm Sông Cầu, siă suôr leh hŏng bruă rông hdang mtah prŏng êbeh 15 thŭn anei ti krĭng êa ksĭ  Hòn Mắm. Amai Vân brei thâo, mơ̆ng hruê ngă bruă anei, ka mâo ôh yan adiê truh ktang msĕ si angĭn êbŭ mrô 13 (Kalmaegi) tal anei. Jih jang êbeh 60 war rông hŏng 1.500 drei hdang pioh čhĭ leh anăn 3000 drei hdang mjeh angĭn êbŭ bi rai jih, lu anôk rông truh ară anei ka ƀuh ôh. Ênoh nư dŭm êtuh êklăk prăk čan mơ̆ng knơ̆ng prăk čiăng bi liê, knang kơ yan hdang dơ̆ng ba čhĭ, ară anei angĭn êbŭ đung jih leh.

“Luč liê lu snăk, kyua anôk rông mbĭt hŏng dŭm gŏ êsei rông, ƀiădah đung jih leh, hlăk êjai gŏ sang dôk čan prăk knơ̆ng prăk 500 êklăk prăk bi liê, dơ̆ng truh wưng tla. Ung mô̆ kâo čang hmăng Knŭk kna đru čiăng lŏ dơ̆ng rông hdang mtah prŏng, amâo rông amâo thâo ôh ya bruă lŏ ngă. Hmei ăt čang hmăng knơ̆ng prăk đru bi kdung nư, bi hrŏ prăk mnga brei čan leh anăn tơdah dưi snăn brei čan thiăm prăk čiăng bi liê mkra mjing, duah prăk tla nư.”

 Nguyễn Thị Sáu, ti alŭ Phú Mỹ, ƀuôn hgŭm Sông Cầu, ăt ka jih ôh klei rŭng răng leh gưl angĭn êbŭ ktang. Êbeh 120 war rông hŏng êbeh 2000 drei hdang mtah prŏng ba čhĭ mơ̆ng gŏ sang, đa đa êa đung, đa đa tloh klei ñuăl ngă kơ hdang đuĕ kơ tač, msĕ si luč liê jih. Sáu ênguôt hnĭng brei thâo, năng ai krah mlan 11 anei srăng ba čhĭ čiăng tĭng tla ênoh nư 1,5 êklai prăk čan knơ̆ng prăk, ƀiădah angĭn êbŭ truh đung leh jih jang.

“Klei luč liê ka thâo klă ôh, ƀiădah gŏ sang mĭn tĭng ênoh luč liê mkrah wah ênoh hdang rông. Hdang anei mĭndah 5-7 hruê srăng čhĭ yơh tla nư knơ̆ng prăk snăn angĭn êbŭ truh. Hdang luč jih snăn mnuih djiê mbĭt mơh. Gŏ sang čang hmăng knŭk kna bi kdung wưng tla nư, lăm prăk mnga čiăng lŏ duh bi liê, tla nư ƀrư̆ ƀrư̆.”

 Ktuê hang ksĭ ƀuôn hgŭm Sông Cầu jing krĭng  rông kan hdang phŭn ti čar Phú Yên hđăp, ară anei jing čar Dak Lak, hŏng dŭm mta mnơ̆ng jăk msĕ si hdang mtah prŏng, kan kô̆, kan mú. Hjăn krĭng Hòn Mắm, Vũng Chao ară anei mâo 92.800 anôk rông kan hdang, lu jing hdang mtah prŏng mơ̆ng hlăm brô 720 gŏ êsei mnuih ƀuôn sang.

Huỳnh Đình Quang, K’iăng Khua Knơ̆ng bruă sang čư̆ êa ƀuôn hgŭm 13 (Kalmaegi) găn alŭ wăl hŏng hnơ̆ng ktang snăk, wăt tơdah amâo ngă luč liê lu kơ mnuih ôh ƀiădah ngă luč liê kjham kơ bruă duh mkra, boh nik jing dŭm gŏ êsei rông kan hdang ktuê hang ksĭ. Ară anei Knơ̆ng bruă sang čư̆ êa ƀuôn hgŭm dôk mjêč ktuê dlăng, ksiêm dlăng klei luč liê leh anăn akâo kơ dŭm anôk bruă djŏ tuôm hnưm pŏk ngă hdră êlan đru kơ mnuih ƀuôn sang. Huỳnh Đình Quang lač:

“Rông kan hdang leh anăn rông hdang mtah prŏng snăn luč liê lu snăk. Hmei dôk mjêč ksiêm dlăng, yap grăp mmông, grăp hruê čiăng mâo tur knơ̆ng mă bruă hŏng knơ̆ng prăk, čiăng kơ diñu mâo hdră msir čuăl nư, đru thiăm prăk bi liê kơ mnuih ƀuôn sang. Êngao anăn, hmei ăt čih mkra anăn klă klơ̆ng akâo kơ Knơ̆ng bruă sang čư̆ êa čar Dak Lak yua ênoh đru mơ̆ng Keh gang mkhư̆ klei yan adiê ngă čiăng đru sa kdrêč klei luč liê kơ mnuih ƀuôn sang.”

 Čiăng đru kơ dŭm gŏ êsei rông kan hdang, dŭm êpul bruă brei čan prăk ti alŭ wăl ƀuôn hgŭm Sông Cầu mjing klei găl kơ êbeh 600 čô čan prăk čiăng bi liê mkra mjing, mnia blei. Hjăn Agribank ti Sông Cầu - Phú Yên mâo êbeh 300 čô čan hŏng ênoh jih jang 150 êklai prăk. Hoàng Vũ Phi Phong, Khua Knơ̆ng bruă, brei thâo anôk bruă dôk bi hgŭm hŏng dŭm anôk bruă djŏ tuôm pŏk ngă lu hdră msir kơ phung čan kơrŭ wĭt bruă mkra mjing. Phong lač kơ đa đa hdră êlan srăng yua čiăng đru kơ phung čan tuôm hĕ hŏng klei amâo myun hlăm gưl angĭn êbŭ meô 13 mrâo êgao.

“Hŏng dŭm gŏ êsei amâo lŏ mâo ôh mnơ̆ng mkra mjing, hmei srăng yua klei bhiăn čuăn nư hlue si klei kčah mơ̆ng Knơ̆ng prăk knŭk kna. Phung čan ka truh hnơ̆ng dưi čuăl nư, hmei srăng tĭng tla klei dưi brei čan thiăm, amâodah lŏ mkra wĭt ênoh nư, bi kdung wưng tla nư leh anăn wăt prăk mnga, čiăng kơ phung tue mâo wưng kơrŭ wĭt bruă mkra mjing, mnia blei. Êngao anăn, hmei ăt yua hdră êlan bi hrŏ prăk mnga brei čan čiăng kơ mnuih ƀuôn sang bi hrŏ ênoh bi liê rông kan hdang”.

 Bruă hmao pŏk ngă hdră êlan brei čan mă mnga hdjul hlue si hdră kčah msĕ si čuăl nư, bi hrŏ prăl mnga đru mđĭ ai mnuih ƀuôn sang krĭng angĭn êbŭ gĭr ktưn. Klei hrăm mbĭt mơ̆ng bruă sang čư̆ êa leh anăn êpul brei čan amâo djŏ knŏng đru kơ mnuih ƀuôn sang lŏ mkŏ mjing leh klei luč liê kyua yan adiê ngă ôh, ƀiădah lŏ mjing boh kdrŭt kơ digơ̆ lŏ bi liê, kơrŭ wĭt bruă mkra mjing. Grăp anôk rông kan hdang ƀrư̆ dưi lŏ mkŏ wĭt, ba wăt klei čang hmăng kơ sa yan rông kan hdang mrâo êđăp ênang hĭn, trei mđao hĭn./.