VOV4.Êđê - Hdră mkra Êlan Trường Sơn găn 7 čar krĭng kwar Krah lehanăn Lăn dap kngư, dôk mprăp găn krĭng Đang dliê knŭk kna mkuôm Čư̆ Yang Sin čar Dak Lak lehanăn Đang dliê knŭk kna mkuôm Bidoup Čư̆ H’Mŭ, čar Lâm Đồng. Jing sa mta bruă phŭn mơ̆ng ala čar găn dŭm wăl anôk lăn êa dliê kmrơ̆ng, dưi răng mgang kjăp, mĭndah hdră anei srăng dưi hluê ngă hŏng klei mđing răng lehanăn kjăp, djŏ si klei kčah mtrŭn mơ̆ng hdră bhiăn. Khă snăn, bruă pŏk ngă hlăm boh klei sĭt amâo hluê kjăp ôh klei kčah mtrŭn mơ̆ng hdră bhiăn. Êpul êya ngă bruă bi rai dliê kăm čiăng mkra êlan ƀiădah pô dliê lehanăn anôk bruă sang čư̆ êa alŭ wăl amâo thâo.

Ti wăl dliê mrô 1383 leh anăn 1402 (Dliê knŭk kna mkuôm Čư̆ Yang Sin, čar Dak Lak) jing anôk êpul ksiêm dlăng hdră mkăp mrô 46, phŭn bruă đru kčĕ, phŭn bruă lĭng kahan dôk mkŏ mjing hdră mkăp êlan Trương Sơn ngŏ hlăm klei ngă bruă Đ41. Tinei sa bĭt êlan mâo boh taih 7 km, găn nao 2 wăl dliê anei mâo klei cŭk hli, hŏng êbeh 15 ha dliê mâo klei bi rai. Jih jang dŭm ana kyâo ti êlan anei arăng kkuai, kčao mă leh anăn dơr amâo lŏ ƀuh gru, knŏng dôk mă đa đa ana kyâo êbuh ti ktuê êlan. Y-Te Ƀuôn Krông khua kiê êpul bruă găk răng dliê kdriêk Lăk, čar Dak Lak brei thâo, kăn thâo lei klei anei mơ̆ng phŭn mâo. Dŭm anôk bruă djŏ tuôm mơ̆ng kdriêk leh čar hmao ƀuh klei anei hlăk knhal jih mlan 1 mrâo êgao. Bi hluê si Lộc Xuân Nghĩa, khua kiă kriê Dliê knŭk kna mkuôm Čư̆ Yang Sin hlăk mblang: Dliê mâo klei arăng čŭk hli hŏng ênhă prŏng, djŏ hruê mmông dŭm anôk găk răng nao răng mgang ênhă dliê giăm anôk mnuih ƀuôn sang adôk. Mbĭt anăn anôk bruă luč răng, amâo mĭn ôh sa anôk bruă knŭk kna nao bi rai hĕ dliê êjai ka mâo klei bi klă:“Ayŏng amai adei hlăm anôk gak răng mâo klei amâo răng, mĭn anăn jing anôk bruă knŭk kna, knŏng tiŏ nao mă bruă ti alŭ wăl mâo klei arưp aram arăng jah ngă hma. Bi kơ klei ksiêm dlăng mơ̆ng phung khua gĭt gai, dŭm adŭ bruă ti dliê Khua knŭk kna mkuôm Čư̆ yang Sin hlăm bruă ksiêm dlăng, ktuê dlăng jing dleh dlan êdi, hlăm dŭm anôk hlăm lam dliê ka dưi nao truh mmơh.”

Võ Thành Huệ, k’iăng khua bruă sang čư êa kdriêk Lăk, čar Dak Lak lač klă, anôk bruă mkra mjing êlan Trường Sơn Ngŏ amâo mâo ôh klei bi klă hŏng bruă sang čư êa alŭ wăl, ƀiădah čŏng pô ba êdeh êdâo nao čŭk hli dliê ti dliê knŭk kna mkuôm Čư̆ yang Sin. Võ Thành Huệ brei thâo, 15 ha mrâo hmao ƀuh bi rai anei ka mâo ôh klei bi klă mlih klei yua lăn, kyua klei dưi bi mlih jing mơ̆ng Khua knŭk kna. Kdriêk bi klă anei jing bruă ngă soh hŏng klei bhiăn ala čar leh anăn dôk bi mguôp hŏng dŭm dhar bruă ksiêm dlăng, bi klă:“Dŭm Êpul ngă bruă anei amâo mâo ôh klei bi klă hŏng bruă sang čư êa alŭ wăl, ka ngă ôh klei bi mlih, čŏng pô ba êdeh êdâo, kdrăp yua, ngă msĕ sơnăn jing bruă ngă soh hŏng klei bhiăn ala čar, kdriêk jao leh kơ anôk bruă ksiêm dlăng dliê, mă bruă phung pô dliê hưn mdah hŏng knơ̆ng bruă lŏ hma leh anăn mđĭ kyar krĭng ƀuôn sang, anôk bruă ksiêm dlăng dliê čar čiăng mâo klei mtô gĭt gai.

Nguyễn Quốc Hưng, khua kiă kriê anôk bruă ksiêm dlăng dliê čar Dak Lak brei thâo, ti anôk mơ̆ng anôk bruă bi rai dliê hlăm klei ngă bruă Đ41 mơ̆ng hdră mkăp êlan Trường Sơn Ngŏ, mơ̆ng êpul kiă kriê hdră mkăp mrô 46 (Phŭn bruă đru kčĕ, phŭn bruă lĭng kahan) ngă pô duh bi liê. Anei jing sa hlăm lu klei ngă bruă mơ̆ng hdră mkăp Trường Sơn Ngŏ, mĭn tĭng mâo boh taih hlăm brô 36 km hŏng dŭm pluh ha mơ̆ng dliê knŭk kna mkuôm Čư̆ Yang Sin čiăng mâo klei bi mlih. Nguyễn Quốc Hưng mñă klă, čar Dak Lak leh anăn phŭn bruă lŏ hma, mđĭ kyar krĭng ƀuôn sang mâo leh klei mtô klă klơ̆ng kơ êpul kiă kriê hdră mkăp mrô 46 ngă hră mơar mlih klei yua lăn dliê. Ƀiădah, ka leh ôh hră mơar, ka mâo ôh klei bi klă, anôk bruă ngă leh klei čŭk hli lăn dliê. Anôk bruă ksiêm dlăng dliê dôk bi mguôp hŏng dŭm anôk bruă djŏ tuôm ksiêm duah, bi klă klei ngă soh hŏng klei bhiăn ala čar anei:“Anôk bruă ksiêm dlăng dliê mâo bruă klam bi mguôp hlăm klei ngă bruă čiăng bi klă anôk mâo klei ngă soh anei leh anăn ƀuah mkra hluê si klei bhiăn bruă dliê kmrơ̆ng, hluê si dŭm hdră mtrŭn. Anei amâo lŏ djŏ hŏng klei ƀuah mkra đŭ prăk ôh, kơ dlông 5 sao jing klei bi kmhal ngă măk ƀai leh, leh anăn anei jing êbeh 15 ha dliê knŭk kna mkuôm.”

Blŭ êmuh hŏng pô čih klei mrâo mơ̆ng Sang mđung asăp blŭ Việt Nam, sa čô khua gĭt gai mơ̆ng êpul kiă kriê hdră mkăp mrô 46 brei thâo, mrâo đua klam bruă ti nei hŏng anei mâo dŭm mlan, ară anei dôk bi klă boh sĭt bruă anei čiăng hưn mdah hŏng phŭn bruă lĭng kahan, êpul bruă srăng hâo hưn, wĭt lač dŭm klei êmuh bruă klei mrâo leh mâo klei wĭt lač mơ̆ng phŭn bruă.

Amâo djŏ knŏng čŭk hli lăn dliê ti dliê knŭk kna mkuôm Čư̆ Yang Sin čiăng ngă hdră mkăp êlan Trường Sơn ngŏ, klei bi rai dliê ngă êlan ăt mâo ti dliê knŭk kna mkuôm Biduop čư̆ H’Mŭ, čar Lâm Đồng. Hlăm klei ngă bruă Đ42 leh anăn C13 mơ̆ng hdră mkăp, sa kdrêč mâo boh taih dŭm km hŏng lu ênhă dliê rông arăng bi rai jih.

Hluê si hdră bhiăn, dliê knŭk kna mkuôm jing ngăn drăp ala čar dưi răng mgang ktang phĭt, bruă mlih klei yua lăn čăng mâo klei bi klă mơ̆ng bruă kƀĭn ala, knŭk kna. Anôk bruă tui ngă hdră mkăp Trường Sơn ngŏ čŏng pô čŭk hli dliê jing bruă ngă soh hŏng klei bhiăn ala čar leh anăn mkŏ mjing klei êdu kƀah kơ bruă bi rai dliê, tlĕ mă kyâo dliê hlăm dŭm wăl dliê Knŭk kna mkuôm Čư̆ Yang Sin leh anăn Bi Doup Čư̆ H’Mŭ.