VOV4.Êđê- Hruê mbruê 5/7, bruă sang čư êa ƀuôn prŏng Đà Lạt, čar Lâm Đồng brei thâo, alŭ wăl mkŏ mjing leh êpul ksiêm dlăng dliê hŏng bruă dưn yua drăp mrâo mrang čiăng mđĭ hĭn bruă răng mgang dliê, bi kdơ̆ng hŏng klei bi rai dliê, plah mmiă lăn dliê dôk dleh dưi ksiêm dlăng ti alŭ wăl. Êpul anei mâo 7 čô, mơ̆ng k’iăng khua kiă kriê anôk bruă răng mgang dliê ƀuôn prŏng Đà Lạt jing khua êpul, dŭm čô adôk jing phung mă bruă mơ̆ng dŭm anôk bruă pô dliê, phung rang mgang dliê.

Bruă klam mơ̆ng êpul anei jing yua dŭm kdrăp mrâo mrang msĕ si flycam, dŭm pŏk rup vệ tinh Google, rup mă mơ̆ng dlông wăl adiê… čiăng ksiêm dlăng dliê, rơ̆ng kơ bruă răng mgang leh anăn đĭ kyar dliê, hnưm hmao ƀuh dŭm klei ngă soh, dŭm klei mâo hlăm dliê leh anăn lăn dliê. Bruă mkŏ mjing êpul anei srăng đru hlăm bruă ƀuah mkra, gang mkhư̆ leh anăn mgaih msir dŭm klei bi rai dliê, mmiă lăn dliê dôk mâo ti alŭ wăl.

Pô mblang: Y-Ƀel Êban