VOV4.Êđê - Giăm 2 hruê kăm truh yơh Tết nguyên đán Nhâm Dần 2022, bruă hiu čhưn ênguê čar Lâm Đồng dôk mprăp mnơ̆ng dhơ̆ng, mnuih mă bruă čiăng ngă jăk hŏng djăp klei tuê hiu čhưn čiăng.

Truh hŏng war mnga klei mngač Đà Lạt – čar Lâm Đồng, nao hiu čhưn hlăm anôk lăn mnga msĕ si êpei mơng phung hđeh hlăm dŭm hrue anei, dŭm anôk mâo bi mguôp dŭm boh mngač, ênai kdrăp pĕ tông lehanăn ƀlêč ƀlir djăp mta êa mil djă ba hriê lu mta klei čiăng lač, mâo anôk hlăp mbul anei mprăp leh, čiăng kơ phung tuê ƀuh lehanăn hmư̆, hiu dlăng. Phan Minh Trường, Khua alŭ wăl war mnga klei mngač Đà Lạt brei thâo, mbĭt hŏng klei lŏ mđĭ hnơ̆ng jăk, snăn mâo lu mta mnơ̆ng pioh duh kơ tue hiu čhưn, bruă răng mgang klei ruă tưp Covid 19 mâo ngă hŏng klei kjăp djŏ hŏng mta mtrŭn mơh: “Hmei mprăp leh djăp ênŭm jih jang bruă mdrơ̆ng hŏng klei ruă tưp kơ mnuih ngă bruă, dơ̆ng mơ̆ng čhiăm guôm ƀô̆, hlŏng kơ ală kĭng gang klei kčăi, găng kngan. Phung tue truh kơ war mnga klei mngač snăn mâo mka hnơ̆ng h'uh asei mlei, akâo nga klei bi mdoh kman hlăm kiê kngan êlâo kơ mŭt hiu čhưn. Hmei mprăp leh djăp ênŭm jing jang bruă mdrơ̆ng hŏng klei ruă tưp, amâo mâo djŏ knŏng bi lar hlăm êpul êya ƀiădah lŏ mă bruă mbĭt hŏng sang êa drao ƀuôn hgŭm, knơ̆ng bruă mdrao mgŭn čar Lâm Đồng”.

Amâo mâo djŏ knŏng hlăm dŭm anôk hiu čhưn dhing mrâo, dŭm wăl lăn mnga êa siam, dŭm anôk truh mâo leh klei hing ang ti Đà Lạt, msĕ si: Alŭ wal sang yang Trúc Lâm, Tlung klei khăp, Drai pren, Drai Datanla, Čư̆ klei êpei, war mnga ƀuôn prŏng, lehanăn lu anôk hiu čhưn ênguê hlăm hma pưk msĕ mơh... ăt mâo mprăp leh djăp ênŭm jih jang mnơ̆ng lehanăn bruă knuă, mnuih ma bruă, pioh kăp drông tue.

Tui si Nguyễn Việt Vân, Khua knơ̆ng bruă dhar kreh, mjuăt asei mlei, lehanăn hiu čhưn ênguê Lâm Đồng, truh ti wưng anei, jih jang dŭm sang jưh, hlŏng kơ sang huă ƀơ̆ng, mnăm huă, alŭ wăl hiu čhưn ênguê hlăm alŭ wăl rơ̆ng mâo mprăp leh jăk kơ tue hiu čhưn. Hlăm anăn, kơ klei êđăp ênang, rơ̆ng kơ bruă mdrơ̆ng hŏng klei ruă tưp Covid 19 mâo mđing mơh.

Mbĭt hŏng anăn, dhar bruă hiu čhưn ênguê bi mguôp leh hŏng djăp êpul bruă djŏ tuôm hlăm čar ăt mđĭ hĭn bruă ksiêm dlăng, ktrâo atăt bi pral jih jang bruă kơ klei hiu čhưn ênguê, ƀư̆ mkra jih ya mta bruă adôk ka djŏ huĭdah mâo, čiăng duh kơ tue hiu čhưn, mdei msăn tơdah triuh kơ Đà Lạt, čar Lâm Đồng yan mnga anei hŏng klei jăk. "Jih jang djăp anôk bruă mâo mkŏ mjing leh jăk jih jang bruă mprăp, mâo mjuăt bi hriăm, mprăp leh djăp mta bruă kơ bruă mdrơ̆ng hŏng klei ruă tưp djŏ tui si dhar bruă mdrao mgŭn čoh čuăn. Mbĭt hŏng anăn, dŭm boh sang jưh mâo lŏ mkra mđĭ, dŭm anôk hiu čhưn dhing mâo duh bi liê, hŏng lu mta mnơ̆ng mrâo bi leh, boh nik lŏ mâo lu mta bruă mrâo jăk hĭn kơ klei hiu čhưn dhing, čiăng iêo jak lu phung tue truh hŏng Đà Lạt, čar lâm Đồng. Lehanăn mâo bi mguôp leh mơh hŏng dŭm êpul bruă djŏ tuôm, lehanăn ƀuôn prŏng Đà lạt čiăng mprăp jih jang bruă jăk hĭn, êlan klông êđăp ênang, lehanăn ngă klei ksiêm dlăng ktrâo atăt kơ djăp êpul êya duh kơ bruă atăt tuê hiu čhưn mơak yan mnga, ƀiădah bŏ hŏng klei êđăp ênang”./.