VOV4.Êđê - Leh sa wưng mdei kyua klei ruă tưp Covid-19, Bruă hiu čhưn ênguê ti ƀuôn prŏng Đà Lạt, čar Lâm Đồng lŏ dưi wĭt msĕ yăng đar leh anăn ƀrư̆ hruê ƀrư̆ mâo lu tuê hiu čhưn ênguê. Khădah sơnăn, ƀiădah ăt bluh mâo lu klei dleh kpăk, boh nik jing klei duah bi ktŭng iêo, ngă truh klei mtŭk mtŭl, luč klei êđăp ênang. Čiăng mprăp jăk kơ klei čuă dlăng, mdei msăn, dŭm anôk bruă djŏ tuôm dôk mgaih msir dŭm klei dleh kpăk, bi knăl kơ ƀuôn prŏng Đà Lạt mâo klei hnŭk ênang, jăk yâo, thâo khăp kơ phung tuê.

Hruê mmông êgao, êjai bruă hiu čhưn ênguê ti ƀuôn prŏng Đà Lạt lŏ wĭt msĕ yăng đar leh găn sa wưng mdei hĕ kyua klei ruă tưp Covid-19, ƀuôn prŏng anei bluh mâo lu klei dleh kpăk. Năng mđing hĭn jing klei duah bi ktŭng, bi iêo ngă bruă mtŭk mtŭl, čhĭ mnia ktuê êlan, čhĭ mnia amâo mâo jăk… Bi klă klei hiu čhưn ênguê jing bruă duh mkra phŭn, bruă sang čư êa ƀuôn prŏng Đà Lạt dôk gĭr bi hơĭt wăl ƀuôn prŏng, mđĭ hĭn bruă ksiêm dlăng čiăng hmao mgaih msir dŭm klei dleh kpăk dôk mâo. Thiếu tá Trương Quang Vũ, Êpul kahan ksiêm gang mkhư̆ phung ngă soh hlăm bruă duh mkra, kahan ksiêm ƀuôn prŏng Đà Lạt brei thâo, klei duah bi ktŭng, bi kdhăk, bi mmiă tuê mâo hlăm wưng êgao mâo leh anôk bruă ƀuah mkra tuč hnơ̆ng.“Dŭm anôk bruă ngă jêñ jêñ bruă ksiêm dlăng, brei dŭm anôk bruă ƀuăn amâo mâo pĕ sa kdrêč kơ phung atăt tuê hiu čhưn ênguê, kyua mơ̆ng anăn bi bluh mâo klei amâo thâo bi djŏ plah wah phung hiu atăt, ngă klei hmăi amâo mâo jăk, luč klei êđăp ênang.

Hluê si Nguyễn Viết Vân, khua kiă kriê knơ̆ng bruă Dhar kreh, mjuăt ktang asei mlei leh anăn hiu čhưn ênguê čar Lâm Đồng, mbĭt hŏng bruă kñăm mđĭ hnơ̆ng tŭ jăk, mđĭ kyar dŭm mta mnơ̆ng dhơ̆ng hiu čhưn ênguê hŏng klei kjăp mâo knhuah mdê hĭn, čar dôk mtrŭt mjhar jih jang mnuih ƀuôn sang mđĭ hĭn klei thâo săng hlăm bruă răng mgang wăl hdĭp mda, nao mbĭt hŏng bruă kriê pioh leh anăn bi lar knuih mnuih Đà Lạt “Jăk, mhač, khăp kơ phung tuê”.“Hlăm wưng kơ anăp, hmei srăng lŏ ngă jăk bruă hâo hưn, mđĭ hĭn bruă ksiêm dlăng klei duah mđĭ ênoh, klei duah bi ktŭng, bi khdăk srăng ƀuah mkra ktang phĭt. Si srăng ngă čiăng mkŏ mjing rup anak mnuih Đà Lạt – Lâm Đồng jăk siam hĭn, mrâo mrang, mhač, khăp kơ tuê, čiăng kơ phung tuê hlăm leh anăn êngao ala čar êjai hriê ti Đà Lạt, Lâm Đồng dưi mâo klei jăk hĭn, dưi djă pioh dŭm mta rup jăk hĭn”.

8 mlan akŏ thŭn anei, Đà Lạt – Lâm Đồng drông leh 5 êklăk 70 êbâo gưl čô tuê hiu čhưn ênguê nao čuă dlăng, mdei msăn, đĭ 153% mkă hŏng wưng anei thŭn dih. Hluê si amai Đào Thị Huyền Trang, sa čô tuê hiu čhưn ênguê mơ̆ng čar Bình Thuận, Đà Lạt mâo lu klei mlih, amâo djŏ knŏng hnơ̆ng tŭ jăk dŭm mta bruă hiu čhưn ênguê, mnơ̆ng dhơ̆ng bruă hiu čhưn ênguê lu jơr hĭn, ƀiădah dŭm klei duah bi ktŭng, bi iêo ngă mđĭ ênoh, klei mnia mblei msĕ klei tlĕ mâo klei hrŏ êdi.“Kâo ƀuh adiê êđăp êdi leh anăn siam mơh. Ti anei mâo lu anôk pô mă rup. Grăp čô ti nei mâo klei mhač leh anăn jăk êdi”.

 “Jăk, mhač, khăp kơ phung tuê” dưi bi klă jing knuih hdĭp mơ̆ng mnuih Đà Lạt, hŏng knuih anăn, mnuih Đà Lạt srăng bi mguôp lăm lui klei “Duah bi ktŭng” kñăm iêo mthưr lu phung tuê hiu čhưn ênguê hriê hŏng “ƀuôn prŏng êbâo mnga”.

Y - Ƀel pô mblang