VOV4.Êđê - Aguah hruê 14/6, Êpul hgŭm bruă ƀuôn sang ƀuôn prŏng Đà Nẵng mkŏ mjing leh Klei bi kƀĭn thơ̆ng kơ bruă lehanăn hluê ngă hdră bruă knuă druh djŏ hŏng klei dưi mơ̆ng Êpul hgŭm bruă ƀuôn sang ƀuôn prŏng. Ti knăm anei, Êpul hgŭm bruă ƀuôn sang ƀuôn prŏng Đà Nẵng bi mklă leh Hdră mtrŭn brei mdei bruă ngă K’iăng khua kiă kriê Êpul hgŭm bruă ƀuôn sang ƀuôn prŏng lehanăn lăm lui k’hưm jing Pô bi ala Êpul hgŭm bruă ƀuôn sang ƀuôn prŏng gưl X, wưng thŭn 2021-2026 hŏng Lê Minh Trung.

Êlâo anăn, ti anôk bi kƀĭn mơ̆ng Anôk kriê dlăng bruă Đảng mâo Khua gĭt gai Đảng Nguyễn Phú Trọng gĭt gai, Anôk dlăng bruă Đảng hluê ngă leh hdră phat mkra: Lăm lui jih bruă hlăm anôk bruă Đảng hŏng Lê Minh Trung, Khua hlăm Anôk bruă Đảng ƀuôn prŏng, K’iăng khua bruă Đảng đoàn, K’iăng khua Êpul hgŭm bruă ƀuôn sang ƀuôn prŏng Đà Nẵng. Trung kƀah klei mjuăt bi hriăm, amâo krơ̆ng jăk knhuah mă bruă, knhuah hdĭp, ngă soh hŏng klei kčah mtrŭn phung đảng viên amâo dưi ngă; klei kčah mtrŭn kơ dŭm klei đua klam ba akŏ, ngă soh hŏng klei bhiăn bi dôk ung mô̆ lehanăn gŏ sang. Klei ngă soh mơ̆ng Lê Minh Trung ba klei amâo jăk hlăm yang ƀuôn, hmăi truh kơ k’hưm anôk bruă Đảng, anôk bruă knŭk kna lehanăn mơ̆ng phung đảng viên.

H’Nêč pô mblang