VOV4.Êđê - Knơ̆ng bruă kriê dlăng mnuih mă bruă ala tač êngao hlăm Phŭn bruă mnuih mă bruă kahan êka êkeh leh anăn ala ƀuôn brei thâo, leh wưng bi kpăk kyua klei ruă Covid-19 bluh mâo, mơ̆ng hruê 15/2, Đài Loan (China) lŏ pŏk ƀăng, jum jih jang phung mă bruă mơ̆ng ala tač êngao hriê mơ̆ng: Việt Nam, Indonesia, Thái Lan leh anăn Philippin. Anei jing klei găl kơ phung mă bruă čiăng nao ti Đài Loan (China) mă bruă, hŏng prăk mlan hlăm brô 20 êklăk prăk/mlan. Êlâo kơ mŭt hlăm Đài Loan (China) mă bruă, phung mă bruă brei tlŏ ênŭm vaccin gang mkhư̆ Covid-19 leh anăn ksiêm mkă PCR 48 mmông êlâo kơ kbiă ala čar. Leh mŭt hlăm plao ksĭ anei, mnuih mă buă bi leh bi ktlah hjăn 14 hruê ti sang jưh, leh anăn lŏ dơ̆ng ktuê dlăng klei suaih pral hlăm 7 hruê dơ̆ng êlâo kơ nao mă bruă, Dŭm prăk bi liê bi ktlah hjăn ti sang jưh čiăng gang mkhư̆ Covid-19 srăng mă mơ̆ng pô mưn mnuih mă bruă tla brei. Êngao kơ mă bruă hlăm dŭm sang mkra mjing leh anăn đru bruă sang, Việt Nam leh anăn Đài Loan (China) ăt bi trông kơ tĭng nah dih tŭ jum phung mă bruă hlăm bruă lŏ hma mơ̆ng Việt Nam.

H’Zawut pô mblang