Hlăm mmông blŭ hrăm, dua tĭng bi klă, bi mguôp bruă lĭng kahan Việt Nam Malaysia ƀrư̆ hruê ƀrư̆ mâo bruă klam yuôm bhăn hlăm bruă mtrŭt mđĭ klei mjĕ giăm ƀĭng hgŭm bi mguôp hdră êlan 2 ala čar, mâo  khua gĭt gai 2 ala čar uêñ mĭn, mtrŭt mđĭ, djŏ guôp hŏng dŭm hră mơar bi mguôp bruă lĭng kahan dua tĭng bi klă leh, mâo lu boh tŭ dưn, êdah êdi hlăm dŭm mta bruă msĕ si: bi trông êpul, bi mguôp plah wah dŭm êpul lĭng kahan, mtô bi hriăm leh anăn bi sa ai hŏng hdơ̆ng pô hlăm dŭm klei kƀĭn kơ klei êđăp ênang alŭ wăl leh anăn tar rŏng lăn, tiŏ nao dŭm êpul nao hgŭm hlăm dŭm mta bruă mơ̆ng grăp ala čar gĭt gai.

Dua čô khua phŭn bruă bi klă klei găl bi mguôp plah wah dua tĭng adôk lu êdi. Dua tĭng lŏ dơ̆ng hluê ngă tŭ dưn dŭm hră mơar, klei kuôl kă leh bi klă, boh nik jing hră bi hdơr kơ klei bi mguôp bruă lĭng kahan dua tĭng bi klă leh klei blŭ hrăm, tă hdră kơ klei bi mguôp bruă lĭng kahan hlăm wưng kơ anăp.