VOV4.Êđê -  Bri wưng bi hdơr 75 thŭn hruê kahan êka êkeh – djiê êngiă Việt Nam 27/7, êpul ngă bruă mơ̆ng knơ̆ng gĭt gai lĭng kahan gưl dlông, phŭn bruă lĭng kahan mơ̆ng Đại tướng Phan Văn Giang, khua hlăm phŭn bruă kđi čar, khua phŭn bruă lĭng kahan ba anăp mâo leh klei nao čuă, mđup brei hnư mnơ̆ng kơ êpul hgŭm phung lĭng kahan hđăp gưl dlông Việt Nam. Bi ala kơ knơ̆ng gĭt gai lĭng kahan gưl dlông, phŭn bruă lĭng kahan, Đại tướng Phan Văn Giang bi êdah klei hdơr knga ti anăp klei săn asei, klei đru mguôp prŏng prĭn mơ̆ng dŭm gưl phung lĭng kahan hđăp hŏng bruă krŭ kdơ̆ng sua wĭt klei êngiê djuê ana, hluh hlir ala čar leh anăn hlăm bruă mkŏ mjing, răng mgang ala čar. Đại tướng Phan Văn Giang hmăng hmưi hlăm hruê mmông kơ anăp, Êpul hgŭm phung lĭng kahan hđăp Việt Nam leh anăn phŭn bruă lĭng kahan lŏ dơ̆ng kriê pioh, bi lar klei mjĕ giăm. Dŭm gưl phung lĭng kahan hđăp Việt Nam čiăng lŏ mâo klei uêñ mĭn, đru mguôp lu hĭn kơ klei đĭ kyar lĭng kahan leh anăn ala čar.

Y-Ƀel pô mblang