Blŭ hrăm ti anôk bi hdơr, Đại tướng Phan Văn Giang, khua phŭn bruă lĭng kahan lač, Lâm Đồng jing čar nah dhŭng lăn dap kngư, mâo anôk yuôm bhăn kơ bruă duh mkra, ala ƀuôn lehanăn bruă răng mgang klei êđăp ênang. Bi ala kơ phung khua kiă kriê Đảng, Knŭk kna, Đại tướng Phan Văn Giang hơêč hmưi kơ dŭm klei tŭ dưn bruă Đảng, bruă sang čư̆ êa lehanăn djăp djuê ana ti Lâm Đồng mâo leh hlăm dăl 50 thŭn êgao.

Đại tướng mtă, êlâo hĭn Lâm Đồng ktuh êyuh jih ai tiê bi leh jih jang mta kñăm kơ bruă mđĭ kyar klei duh mkra ala ƀuôn, rơ̆ng kjăp klei êđăp ênang, mjing atur kjăp kơ alŭ wăl čhuang nao hlăm ênuk gưl mrâo. Jih ai tiê bi mlih hdră êlan mă bruă, mđĭ kyar kdrăp mrâo hlăm klei bi mlih mrô , mđĭ mlih anôk duh mkra mnia mblei, mâo nanao ai ktang hlăm klei bi ktưn. Amâo mâo mdei dưi lŏ bi kjăp, mđing kơ bruă mtrŭt mjhar klei thâo bi mguôp, hlue ngă jăk jih jang hdră êlan, rơ̆ng kơ klei hdĭp mda ala ƀuôn, boh nik đru phung knŭk kna dlăng ba, krĭng mnuih djuê ƀiă. Kut kat atăt Lâm Đồng jing čar mâo klei đĭ kyar pral, lehanăn kjăp./.