Tŭ ư asăp jak iêu mơ̆ng Khua knŭk kna Phạm Minh Chính, Khua knŭk kna Español Pedro Sánchez mâo leh gưl hriê čhưn ti Việt Nam mơ̆ng hruê 8/4 truh kơ hruê 10/4.

Anei jing gưl tal êlâo, Khua knŭk kna Español hriê čhưn ti Việt Nam mơ̆ng leh dua ala čar mkŏ mjing klei bi mjĕ hlăk thŭn 1977 lehanăn ăt jing gưl hriê čhưn ti Việt Nam mơ̆ng Khua kiă kriê gưl dlông ala čar Español mơ̆ng leh gưl hiu čhưn mơ̆ng Mtao Juan Carlos lehanăn Mô̆ mtao Sofia hlăk thŭn 2006.

Español jing ala čar hgŭm tal êlâo mơ̆ng Êpul hgŭm Ơrôp bi mklă Ƀĭng hgŭm phŭn hŏng Việt Nam hlăm thŭn 2009. Ala čar anei ăt jing sa hlăm dŭm ala čar tal êlâo bi mklă Klei kuôl kă răng mgang duh bi liê EU - Việt Nam. Gưl hiu čhưn jing sa klei bi êdah jăk kơ boh tŭ bi hgŭm bruă jăk siam plah wah dua ala čar hlăm wưng leh êgao, mơ̆ng hdră kđi čar truh kơ hdră duh mkra, mnia mblei, duh bi liê, dhar kreh, bruă lĭng kahan, răng mgang klei êđăp ênang, bruă mjuăt bi hriăm lehanăn bruă êlan klông dŭ mdiăng…