Dŭm hruê anei, ti wăl anôk sang dôk Ân Phú, ƀuôn hgŭm Tân Lợi, ƀuôn prŏng Ƀuôn Ama Thuôt, mâo dŭm pluh čô nao blei – čhĭ, ngă kơ ênoh lăn đĭ hlăm grăp hruê. Dua mlan êlâo, sa ênhă lăn dôk prŏng 100m2 tinei dưi čhĭ hlăm brô 2 êklai prăk, snăn ară anei đĭ truh 2,5 êklai prăk. Amâo djŏ lăn ti krĭng ƀuôn prŏng đĭ lu, ƀiădah lăn ti lu ƀuôn hgŭm lehanăn krĭng djiêu gah ƀuôn prŏng Ƀuôn Ama Thuôt ăt đĭ hlăm brô 20%.

Phạm Thị Thanh, ti ƀuôn hgŭm Đạt Hiếu, wăl krah Ƀuôn Hô, čar Dak Lak brei thâo: Anak êkei lehanăn mtâo mniê ñu dôk mă bruă ti anôk bruă knŭk kna Phú Yên. Tơdah dua čar bi mŭt mbĭt, anak ñu năng ai srăng wĭt mă bruă, hdĭp mda ti Ƀuôn Ama Thuôt. Kyua ană,gŏ sang Thanh mjêč ruăt hiu duah lăn mprăp mdơ̆ng sang kơ anak.

 “Hmư̆ hing bi mŭt čar, sui hŏng anei 2 mlan kâo nao ti wăl sang dôk Ân Phú êmuh lăn sang 100m2 snăn diñu lač 2 êklai prăk, mmông anăn kâo amâo blei ôh. Ƀiădah leh hmư̆ Dak Lak klă klơ̆ng bi mŭt mbĭt hŏng Phú Yên, kâo lŏ êmuh diñu lač 2,6 êklai. Ênoh đĭ pral êdi, ƀiădah klei mĭn hlăm phung knuă druh ti Phú Yên čiăng dôk mă bruă duh ƀơ̆ng snăn ăt čiăng mâo lăn sang dôk tinei mơh. Năng ai kâo srăng gĭr blei,huĭdah ênoh lŏ đĭ hĭn.

Phan Thái Bình,  Khua sa anôk bruă čhĭ lăn – sang dôk ti Ƀuôn Ama Thuôt brei thâo, hŏng 100 čô mmuih mă bruă, kah knar grăp hruê diñu dưi mâo 20 klei kuôl kă blei lăn – sang dôk. Mkă hŏng knhal jih thŭn 20022, snăn wưng anei mâo lu mnuih hriê blei.

 “Dlăng kluôm, wăl anôk čhĭ lăn – sang dôk ti Dak Lak mâo klei bi êdah đĭ jăk êdi mkă hŏng êlâo. Klei čiăng lu, sa kdrêc kyua klei lui gưl kdriêk, knuă druh wĭt kơ să, mâo lu phung mkăn hriê mă bruă ti Ƀuôn Ama Thuôt. Mbĭt anăn, lu phung khua thŭn mdei bruă ăt čiăng wĭt ti Ƀuôn Ama Thuôt hdĭp mda. Êngao anăn, leh klei hưn bi mŭt čar, êlâo adih mâo lu mnuih mơ̆ng Dak Nông hriê blei, ară anei lŏ mâo mnuih mơ̆ng Phú Yên. Diñu jing mnuih dôk čiăng kơ lăn, čiăng mkra pưk sang dôk hdĭp mda tinei.

Klei ksiêm yap mơ̆ng Adŭ bruă bi mklă lăn ala – Knơ̆ng bruă Lŏ hma – wăl hdĭp mda čar Dak Lak brei thâo, hlăm 3 mlan gưl 1 thŭn 2025, dŭm anôk bruă hlăm êpul tŭ mă lehanăn msir mghaih giăm 75 êbâo mta hră mơar djŏ tuôm kơ lăn ala,đĭ êbeh 17% mkă hŏng wưng anei thŭn êlâo.

Hoàng Xuân Phương, kơiăng khua Adŭ bruă bi mklă klei kơ lăn ala lač, ênoh hră mơar đĭ lu, ngă kơ lu anôk bruă ti ƀuôn prŏng Ƀuôn Ama Thuôt lehanăn kdriêk Čư̆ Mgar bŏ nanao mnuih.

 “Adŭ bruă bi mklă lăn ala gĭt gai dŭm anôk bruă lŏ mđĭ anôk kăp tŭ mă hră mơar lehanăn bi tai wưng tŭ mă hră mơar kñăm đru kơ mnuih ƀuôn sang, amâo lui dôk guôn sui. Êngao anăn, mơ̆ng hruê ¼, hmei pŏk ngă leh gru hmô mă bruă online hlăm bruă msir mghaih klei ngă hră mơar plah wah anôk bruă jia lehanăn anôk bruă bi mklă hră mơar, đru hluê ngă hŏng hdră online sơaĭ. Tal êlâo, gru hmô anei ba wĭt leh boh tŭ klă sĭt, msir mghaih pral klei ngă hră mơar.

 Wăl anôk čhĭ lăn ala – sang dôk mčhĭ mơuăt êdi ti Ƀuôn Ama Thuôt hlăm dŭm hruê êgao jing kle mâo leh hmư̆ klei hâo hưn bi mŭt čar, hlăk tinei dưi ruah jing anôk ngă hră mơar phŭn mơ̆ng Dak Lak mrâo. Mbĭt hŏng lu phung khnuă druh, mnuih mă bruă hriê tinei, Ƀuôn Ama Thuôt,hŏng kơhưm mrâo srăng jak iêu lu mnuih, êpul êya lehanăn anôk bruă duh mkra mnia mblei./.