Klei čih tal 3: Sa ai tiê kpưn đĭ – mbĭt êlan đĭ kyar
Thứ bảy, 08:00, 31/05/2025 Pô mblang Y-Khem Niê/VOV Tây Nguyên Pô mblang Y-Khem Niê/VOV Tây Nguyên
VOV4.Êđê- Klei čih tal 2 hlăm dŭm klei čih “Hdră bi khuăt anôk bruă – Pui lông hŏng mah, klei dleh dlan lông dlăng phung knuă druh”, hmei hưn mthâo leh kơ ƀĭng găp drei pŏk rup phung knuă druh lui nah tluôn bruă pô, mphŭn čô̆ hlăm sa ktuê êlan mă bruă mrâo, lŏ mâo dŭm klei bi hdơr hlăm bruă lông dlăng ai tiê hlăm hƀuê ênuk bi kruh, mkŏ mjing čar ti lăn dap kngư, jing leh klei hriăm klei jhŏng čiăng mđĭ lar hlăm hdră bi khuăt anôk bruă hlăk dưi hluê ngă mjêč ară anei.

Hlăm hdră hruê anei, klei čih knhal tuič hlăm dŭm klei čih anei, hmei hưn mthâo klei sa ai, thâo bi đru mơ̆ng jih anôk bruă kđi čar lehanăn mnuih ƀuôn sang ti dŭm čar krĭng Lăn dap kngư. Amâo djŏ knŏng mprăp anôk mă bruă, klei găl găn êrô, hdră bi mjĕ mjuk lehanăn hriăm hră mơar, ƀiădah tinei lŏ ba truh klei hơuh mđao tơdah mphŭn čô̆ kơ sa ktuê êlan mrâo “Hrăm mbĭt mđing truh kơ sa ktuê êlan đĭ kyar” jing ai tiê dôk lar bra mơ̆ng krĭng lăn dap kngư truh kơ krĭng ktuê hang ksĭ Dhŭng kwar krah, ăt jing akŏ klei čih knhal tuič anei.

Dŭm hrue anei, ti knơ̆ng bruă dhar kreh mjuăt asei mlei lehanăn hiu čhưn ênguê Lâm Đồng hlăm alŭ wăl anôk mă bruă phŭn mơ̆ng čar jing leh klei mtluk mtlak. Jing anôk mkŏ mjing anôk bruă mrâo leh bi mŭt hŏng Daknông, lehanăn  Bình Thuận, Lâm Đồng hlăk mjêč dôk mprăp jih jang bruă pioh drông giăm 2.000 čô knuă druh hriê mơ̆ng dua boh čar. Trần Thanh Hoài, K’iăng khua knơ̆ng bruă dhar kreh, mjuăt asei mlei lehanăn hiu čhưn ênguê čar Lâm Đồng brei thâo, anôk bruă hlăm prăp êmiêt enŭm djăp mta pioh drông thiăm 150 čô mnuih hriê mă bruă:

 “Phung knuă druh mnuih mă bruă truh kơ anei hriê mă bruă, dôk tui duah sang hră hriăm kơ anak bi jăk, anôk dôk bi jăk čiăng găl ênưih kơ klei mă bruă. Kyuanăn, mâo leh dŭm phung knuă druh hriê mâo mbĭt hŏng ung mô̆ anak truh kơ čar Lâm Đồng mrâo snăn anak aneh hriê mbĭt mơh. Khădah bruă anei ka klă klơ̆ng ôh hlăm hră mtrŭn, ƀiădah anei jing mơ̆ng klei bi tŭ ư leh, bei ayŏng adei hriê mơ̆ng dŭm čar ăt dưi duh mprăp kơ pô”.

Tui si klei dôk bi mŭt 3 boh čar Lâm Đồng, Bình Thuận lehanăn Daknông, anôk mă bruă mơ̆ng čar Lâm Đồng mrâo mâo êbeh 5.900 čô mnuih mă bruă. Tui si tĭng 80% ênoh mnuih mâo dăp bruă knuă mă ti ƀuôn prŏng Đà Lạt. Hlăm anăn mâo giăm 2.000 čô mnuih hriê mơ̆ng 2 boh čar Bình Thuận lehanăn Đắk Nông. Nguyễn Ngọc Phúc, K’iăng khua knơ̆ng bruă sang čư̆ êa čar Lâm Đồng brei thâo: Leh êbeh 3 mlan prăp êmiêt, dŭm boh sang kơ mnuih mă bruă dôk, kơ anôk mă bruă, êdeh êdâo atăt drông ăt mâo leh mơh čar Lâm Đồng ngă sơăi.

 “Hmei hlăk dôk ksiêm dlăng hlăm brô 10 anôk pioh brei kơ phung knuă druh hriê mơ̆ng dŭm čar mă bruă. Anôk dôk ăt mâo mkăp leh jăk anôk dôk hơĭt. Čar ăt akâo mơh hŏng knŭk kna brei sa klei bhiăn, hdră êlan bi đru ngăn prăk kơ phung knuă druh anăn mơ̆ng anôk mkăn hơĭt ai tiê mă bruă”.

Mbĭt hŏng Lâm Đồng, bruă prăp êmiêt ăt dôk mjêč mơh hŏng car Daklak. Čar mâo leh hdră êlan kluôm, dơ̆ng mơ̆ng dăp anôk dôk, sang hră hriăm kơ anak digơ̆, êdeh êdâo êrô hiu, lehanăn dăp anôk mă bruă kơ 1.000 čô knuă druh hriê mơ̆ng čar Phú Yên. Cao Thị Hòa An, Khua bruă Đảng čar Phú Yên mdei ai tiê hŏng jih jang hdră êlan mơ̆ng čar Daklak mprăp leh:

 “Mơ̆ng leh Phú Yên hriê kơ anei snăn ƀuh drei jing sa boh sang leh. Hmei mơ̆ng Phú Yên truh kơ anei mâo lu klei hmăng hmưi, mâo lu klei dôk bi mĭn, ba hriê sa klei khăp, sa klei khăp prŏng, lehanăn klei čang hmăng kơ sa boh čar prŏng, čiăng kơ drei mâo k’hưm kjăp kơ mgi dih, bi năng hŏng sa klei čang hmăng mơ̆ng phung knuă druh, mnuih ƀuôn sang lehanăn klei jưh knang mơ̆ng gưl dlông”.

Bruă bi mŭt čar, să bi khuăt êpul mă bruă… ară anei amâo mâo djŏ knŏng brei mâo klei thâo gĭr mơ̆ng phung knuă druh, jing bruă klam lehanăn klei prăp êmiêt djăp ênŭm mơ̆ng bruă sang čư̆ êa dŭm boh čar mâo leh klei gĭt gai kjăp mơ̆ng gưl dlông, mbĭt hŏng klei sa ai mbĭt mơ̆ng mnuih ƀuôn sang. Jih jang klei blŭ mơ̆ng mnuih ƀuôn sang mâo bi êdah leh ti anôk bi tuôm, jing mâo sơăi ai tiê hur lehanăn mâo klei čang hmăng kơ gưl dlông mbĭt hŏng dŭm boh čar ngă bi tŭ jing, lehanăn mñă klei yuôm bhăn mơ̆ng bruă knuă druh:

 “Klei dăp wĭt êpul mă bruă mơ̆ng gưl dlông hlŏng kơ alŭ wăl jing djŏ hŏng ai tiê mnuih ƀuôn sang. Knuă druh nah gŭ ăt mbĭt hŏng mnuih ƀuôn sang đăo knang kơ Đảng, Knŭk kna. Čang hmăng hlăm wưng tinăp Đảng, Knŭk kna mă bruă ktang hĭn”.

Klei bi mŭt dưi dăp mơ̆ng yŭ kơ ngŏ srăng đru kơ lăn dap kngư mâo êa ksĭ, dhŭng kwar krah mâo čư̆ čhiăng, bi klin jih jang ai ktang, klei găl mbĭt, bi mguôp dhar kreh lehanăn anak mnuih. Dŭm boh čar Lâm Đồng, Daklak, Bình Định, Quảng Ngãi mâo leh ai tiê kut kat hlăm bruă prăp êmiêt djăp mta klei kñăm kơ êpul mă bruă mrâo dưi ngă bruă tŭ jing, êjai tŭ jum dŭm êbâo čô knuă druh mnuih mă bruă mơ̆ng Kon Tum, Gia lai, Phú Yên, Dak Nông lehanăn Bình Thuận. Djăp mta klei dleh dlan, brei gĭt bi hgao hlăm klei mlih mrâo prŏng anei, msĕ si pui lông dlăng mah, klei dleh dlan lông dlăng knuă druh! Dưi hgao klei dleh dlan tal êlâo, dŭm boh čar srăng mjing klei găl mđrăm mbĭt čhuang hlăm wưng mđĭ kyar mrâo./.

Pô mblang Y-Khem Niê/VOV Tây Nguyên

Viết bình luận

TIN CÙNG CHUYÊN MỤC

Video

Bi mni kơ Awa Hô
Tiếng chuông ngân (Jingle Bells)
24/12/2024
Ru em
27/11/2024
Vi yông ‘nhă kơ ba
11/11/2024