"Čŏng ai tiê pô jing msĕ si čing, lehanăn klei tlâo blŭ tlao hŏng tač êngao jing msĕ si ênai. Čing kwang kơh ênai prŏng”. Anei jing klei Khua gĭt gai Hồ Chí Minh blŭ leh hlăk thŭn 1945 kơ bruă klam hŏng ala tač êngao.

Klei mblah dưi 1954 jing msĕ si ênai čing kwang leh kčăi hlăm tar rŏng lăn, truh kơ kuôl kă  Geneve, bi kruh jih jang hdră êlan klei plah ala mơ̆ng phung Prăng, mgô̆ diñu dôk hlăm jhưng bi blŭ hrăm hŏng knŭk kna Việt Nam Dân chủ cộng hòa. K’iăng khua knŭk kna Bùi Thanh Sơn lač, klei kuôl kă Geneva 1954 jing sa klei kruak knăl kơ hƀuê ênuk klei blŭ hrăm mơ̆ng Việt Nam, jiă knhuah klei mĭn, hdră êlan bi blŭ hrăm mơ̆ng khua gĭt gai Hồ Chí Minh:

 “Ti anôk bi blŭ hrăm, klei bi klă, snăn klei kuôl kă Geneva jing leh sa hdruôm kơ giê knhâo ktrâo êlan, mâo leh lu klei bi hriăm kơ knhuah gru hlăm hdră êlan bi blŭ hrăm mơ̆ng Việt Nam, dưi lŏ čuê lehanăn ba yua klei kreh knhâo, lehanăn klei mđĭ kyar hlăm klei bi blŭ hrăm, klei bi klă lehanăn hluê ngă klei kuôl kă Paris 1973 êdei anei wăt hlăm klei rŭ mdơ̆ng, mđĭ kyar lehanăn răng mgang lăn čar ară anei”.

Dŭm gưl ênuk êdei mâo nanao klei myưng m’ang kơ klei mblah dưi Điện Biên Phủ lehanăn wăt hlăm klei bi blah kdơ̆ng hŏng phung plah ala, čiăng mđrăm mbĭt lŏ mâo klei gĭr hĭn rŭ mdơ̆ng lăn čar hlăm klei êđăp ênang, mdrŏng ktang jăk siam. K’iăng nai prŏng, nai prĭn Nguyễn Đức Hòa, Sang hră gưl prŏng Sài Gòn, lač:

 “Kâo ƀuh klei yuôm bhăn, hmăi tuôm hŏng boh klei anăn ăt jing prŏng, lehanăn brei drei lŏ dơ̆ng mđĭ bi lar hĭn. Tar rŏng lăn ƀuh leh mơ̆ng klei jhŏng ktang mơ̆ng sa djuê ana bi blah mâo mă klei dưi ti Điện Biên Phủ, snăn tar rŏng lăn ăt čiăng dlăng mơh kơ sa lăn čar Việt Nam mdrŏng sah, kdrăm k’ah. Snăn klei lŏ bi hdơr kơ ênuk bi blah Điện Biên Phủ mphŭn dô amâo mâo luič ram ôh hlăm ai tiê mnuih ƀuôn sang Việt Nam lehanăn mnuih ƀuôn sang hlăm tar rŏng lăn”.

Ti anăp klei dôk bi mlih prŏng tar rŏng lăn ară anei, drei bi dưn yua hŏng klei knhêč mă klei hriăm mơ̆ng ênuk bi blah, Việt Nam thâo blŭ tlao nao hỉê leh jăk hŏng ala tač êngao, djŏ tui si klei bhiăn leh tă, hdră êlan leh čua, mă bruă hlăm ai tiê thâo bi mguôp, hgŭm mbĭt, djă păn nanao klei thâo bi đru, gĭr tui tiŏ hdră êlan bi blŭ hrăm jăk lehanăn bi hgŭm. Mơ̆ng anăn, srăng dưi krơ̆ng nanao klei êđăp ênang, hơĭt kjăp, răng mgang kjăp klei hnŭk êngiê, ngă phŭn kluôm dhuôm lăn ala êa djuh pô, hgŭm bruă mđĭ kyar, lehanăn mđĭ hĭn klei bi hgŭm mă bruă, lehanăn mđĭ kyar klei duh mkra./.