Leh hmư̆ khua gĭt gai čar Kon Tum hưn mdah kơ bruă mprăp kơ Hruê knăm dhar kreh, mjuăt asei mlei leh anăn hiu čhưn ênguê dŭm djuê ana krĭng Lăn Dăp Kngư gưl tal 1, thŭn 2023, Khua phŭn bruă kahan ksiêm Đại tướng Tô Lâm mñă klă, bruă mkŏ mjing tŭ jing Hruê knăm dhar kreh, mjuăt asei mlei leh anăn hiu čhưn ênguê dŭm djuê ana krĭng Lăn Dăp Kngư gưl tal 1, thŭn 2023 ti čar Kon Tum mâo boh tŭ dưn yuôm bhăn sơnăk, đru mguôp hlăm bruă kriê pioh, bi lar boh tŭ dưn dhar kreh krĭng Lăn Dăp Kngư.

Hruê knăm mơ̆ng Phŭn bruă dhar kreh, mjuăt asei mlei leh anăn hiu čhưn ênguê bi mguôp hŏng đa đa Phŭn, Dhar bruă gưl dlông leh anăn 5 čar krĭng Lăn Dăp Kngư mâo Kon Tum, Gia Lai, Dak Lak, Dak Nông leh anăn Lâm Đồng mkŏ mjing. Nao hlăm knăm mơak mâo hlăm brô 1000 čô thâo mbruă, phung kdŏ mmuñ, phung bi lông leh anăn phung bi ala dŭm djuê ana dôk hdĭp mda ti 5 čar krĭng Lăn Dăp Kngư. Knăm pŏk hruê mơak dưi mkŏ mjing mlam mbruê 29/11 ti Wăl tač 16/3, ƀuôn prŏng Kon Tum, čar Kon Tum.