VOV4.Êđê - Ƀri wưng nao mă bruă ti krĭng Lăn Dăp Kngư, tlam mbruê 19/9, Đại tướng Tô Lâm, Khua hlăm phŭn bruă kđi čar, Khua phŭn bruă kahan ksiêm, k’iăng khua êpul gĭt gai mơ̆ng gưl dlông kơ bruă gang mkhư̆ klei ƀơ̆ng ngăn, klei amâo mâo jăk mâo leh mmông mă bruă hŏng Êpul khua bruă Đảng čar Kon Tum. Hlăm mmông mă bruă, Êpul khua bruă Đảng čar Kon Tum hưn mdah hŏng Đại tướng Tô Lâm mbĭt hŏng êpul ngă bruă kơ boh sĭt bruă duh mkra – ala ƀuôn leh anăn bruă rơ̆ng klei êđăp ênang, gang mkhư̆ klei ƀơ̆ng ngăn, klei amâo mâo jăk ti alŭ wăl čar.

Klei hưn mdah brei ƀuh, mơ̆ng akŏ wưng păn bruă truh kơ ară anei, bruă Đảng čar, Êpul khua bruă Đảng čar Kon Tum bi klă leh dŭm hdră êlan, hdră mtrŭn mơ̆ng gưl dlông kơ bruă krŭ wĭt, mđĭ kyar bruă duh mkra, ala ƀuôn leh anăn dưi mâo lu boh tŭ hlăm dŭm mta bruă. Hlăm 6 mlan akŏ thŭn 2022, hnư knŭk kna hrui wĭt hlăm brô 2.330 êklai prăk, mâo êbeh 58% hdră kčah, đĭ 830 êklai prăk mkă hŏng wưng anei thŭn 2021. Ăt hlăm mmông mă bruă, Êpul khua bruă čar Kon Tum hưn mdah hŏng Đại tướng Tô Lâm mbĭt hŏng êpul ngă bruă boh sĭt bruă rơ̆ng klei êđăp ênang, gang mkhư̆ klei ƀơ̆ng ngăn, klei amâo mâo jăk ti alŭ wăl čar. Đại tướng Tô Lâm čih yap dŭm klei hưn mdah, klei kčĕ mơ̆ng Êpul khua bruă Đảng čar Kon Tum.

Y-Ƀel pô mblang