VOV4.Êđê - Đại tướng Võ Nguyên Giáp - sa čô ayŏng Khua mơ̆ng êpul lĭng kahan yang ƀuôn Việt Nam, pô ngă bruă lĭng kahan, pô ngă bruă kđi čar, pô ngă bruă hŏng tač êngao mâo mnuih ƀuôn sang kluôm ala leh anăn dlông rŏng lăn mpŭ. Bruă knuă, ai tiê leh anăn knuih hdĭp klei bi hmô ñu jing leh klei bi knăl dôk nanao hlăm ai tiê grăp čô mnuih ƀuôn sang Việt Nam.  Hŏng mnuih ƀuôn sang dŭm djuê ana krĭng êđăp ênang Bắc Sơn (Lạng Sơn), klei bi hdơr kơ gưl Đại tướng nao čhưn, klei êmuh hrăm mtă mtăn leh anăn klei jĕ giăm hlăm klei hdĭp Ñu jing klei kyưn hưn leh anăn boh kdrŭt prŏng prĭn čiăng kơ grăp čô mnuih ƀuôn sang ti krĭng krŭ kdơ̆ng Bắc Sơn gĭr ktưn.

Khădah êgao leh 27 thŭn, ƀiădah hlăm klei mĭn mơ̆ng Dương Minh Thuận (K’iăng khua kiă kriê hđăp Êpul čung ba mnuih ƀuôn sang čar lạng Sơn) ăt dôk hdơr nanao rup đại tướng Võ Nguyên Giáp ti wăl tač mjuăt asei mlei tlam hruê anăn. Dương Minh Thuận jing pô mâo klei myun dưi tŭ drông Đại tướng Võ Nguyên Giáp ti jơ̆ng êñan măi êdeh phiơr Dak wak tlam hruê 26/9/1995 êjai Đại tướng hriê čuă ƀuôn sang Bắc Sơn – krĭng êđăp ênang kluôm mơ̆ng gưl dlông hlăm wưng mblah Prăng. Aguah hruê êdei, Đại tuớng mâo mmông blŭ hrăm hŏng mnuih ƀuôn sang dŭm djuê ana leh anăn phung lĭng kahan “Đại tuớng mtă kơ Bắc Sơn jing kdriêk mâo knhuah gru bruă krŭ kdơ̆ng leh, ƀiădah ăt srăng gĭr ktưn lăm lui klei ư̆ êpa, bi hrŏ klei ƀun ƀin, gĭr ktưn kpưn đĭ kơ mdrŏng. Leh anăn Đại tướng êmuh bruă Đảng leh anăn mnuih ƀuôn sang Bắc Sơn bi tŭ ư mơ̆, kluôm wăl tač mjuăt ktang asei mlei jih jang ur bi tŭ ư, ƀuăn rơ̆ng hŏng Đại tướng. Ruê̆ klei blŭ hlăm knăm mit tinh, Đại tướng kkuh kơ mnuih ƀuôn sang hŏng klei Tày krĭng Bắc Sơn.”

Ti sang rang mdah hƀuê ênuk klei krŭ kdơ̆ng Bắc Sơn ară anei ăt dôk mâo lu mnơ̆ng djă pioh, rup Đại tướng Võ Nguyên Giáp nao čuă Bắc Sơn thŭn 1995 mbĭt hŏng dŭm klei mtă mtăn kơ lĭng kahan leh anăn mnuih ƀuôn sang Bắc Sơn “Bi lar knhuah ƀuôn sang jhŏng ktang, mkŏ mjing kdriêk mâo klei bi hmô hlăm čar”, ana hra mơ̆ng Đại tướng Võ Nguyên Giáp pla mmông anăn, ară anei ăt dôk luôm êyui ti wăl tač sang hƀuê ênuk. Amai Phạm Thị Thanh Hà, knuă druh sang rang mdah hƀuê ênuk klei krŭ kdơ̆ng Bắc Sơn brei thâo:: “Anei jing sa anôk jưh jơ̆ng hrah mơ̆ng phung tuê hiu čhưn ênguê êjai hriê ti Bắc Sơn. Leh anăn anei jing dŭm hră mơar phŭn mâo phung knuă druh tui duah leh anăn djă pioh, đru mtô mjuăt bi hriăm knhuah gru kơ dŭm gưl mnuih ƀuôn sang, boh nik jing gưl phung mda asei dưi hdơr nanao klei đru mguôp mơ̆ng phung jhŏng ktang. Anei jing klei hing ang mơ̆ng bruă Đảng, bruă sang čư êa leh anăn mnuih ƀuôn sang kdriêk Bắc Sơn êjai Đại tướng hriê čuă. Phung tuê hriê tinei ăt mâo lu klei êmuh kơ Đại tướng, boh nik jing phung hđeh sang hră, diñu mâo klei mđing, klei hơ̆k mơak êjai ksiêm hriăm kơ Đại tướng Võ Nguyên Giáp.

Giăm 10 thŭn Đại Tướng wĭt hŏng phung ƀĭng găp djuê leh kyua klei êngiê, klei êđăp ênang ala čar. Hluê ngă dŭm klei mtă mtăm mơ̆ng Đại Tướng, mnuih ƀuôn sang dŭm djuê ana leh anăn phung knuă druh, lĭng kahan Bắc Sơn hrăm mbĭt bi mguôp, gĭr ktưn mđĭ kyar bruă duh mkra ala ƀuôn, rơ̆ng kjăp klei êđăp ênang ti krĭng phŭn bruă krŭ kdơ̆ng.