VOV4.Êđê - Phung khua kiă kriê knơ̆ng bruă mnia mblei čar Dak Lak brei thâo, ti anăp klei mâo lu anôk čhĭ êa săng êa pui hlăm kluôm ala kđăl ƀăng, mdei bruă čhĭ, êpul mă bruă mơ̆ng knơ̆ng bruă mnia mblei čar Dak Lak mđĭ hdră kriê dlăng ti alŭ wăl, nao ksiêm dlăng bruă čhĭ êa săng, êa pui hlăm alŭ wăl lehanăn ƀuh lu anôk čhĭ kđăl ƀăng.

Klă klơ̆ng, êpul mă bruă mơ̆ng knơ̆ng bruă mnia mblei čar Dak Lak ƀuh 19 anôk čhĭ êa săng, êa pui kđăl ƀăng. Hlăm anăn, mâo 16 anôk čhĭ jih êa săng, 3 anôk čhĭ mdei ngă bruă kyua phung čhĭ ruă, pô anôk čhĭ anei jing F1 lehanăn jhat kdrăp pom. Dŭm anôk čhĭ êa săng mdei hdră čhĭ ti lu anôk hlăm dŭm alŭ wăl msĕ si kdriêk Čư̆ Mgar, Krông H’Nang, Ƀuôn Đon, ƀuôn prŏng Ƀuôn Ama Thuôt. Hlăm wưng ti anăp, knơ̆ng bruă mnia mblei čar Dak Lak srăng mđĭ hdră kriê dlăng bruă čhĭ êa săng, êa pui čiăng pral mâo klei ba mdah, ruh mtlaih klei dleh dlan kơ anôk bruă duh mkra, mbĭt anăn hnưm hmao ƀuh lehanăn msir mghaih dŭm anôk bruă ngă soh, mkăm pioh êa săng, êa pui tơdah mâo./.

H’Nêč pô mblang