VOV4.Êđê -  Knơ̆ng bruă sang čư̆ êa čar Dak Lak mrâo mtrŭn Hdră kčah mrô 15 kơ klei pŏk ngă hdră đru mtô bi hriăm bruă, ba mnuih mă bruă lŏ wĭt anôk mă bruă hđăp, msir mgaih bruă mă kơ phung mă bruă ti čar wĭt mơ̆ng dŭm čar, ƀuôn prŏng nah Dhŭng kyua hmĭ mơ̆ng klei ruă Covid-19. Hlue anăn, hdră kñăm kčah jing 100% ênoh mnuih mă bruă čar Dak Lak (hlăm brô êbeh 40 êbâo čô mnuih) wĭt mơ̆ng krĭng mâo klei ruă tưp hlăm gưl thŭn mă bruă mâo klei čiăng đru hriăm bruă, duah bruă mă ti čar, čŏng mjing bruă mă amâodah wĭt mơ̆ng anôk mă bruă hđăp dưi mâo hdră đru.

Wưng hluê ngă mơ̆ng akŏ thŭn anei truh jih thŭn 2023, hŏng ênoh bi liê mĭn tĭng hlăm brô 248 êklai prăk. Čar Dak Lak srăng mđĭ ktang bruă mkŏ mjing kčĕ bruă mă kơ phung mă bruă, mtô bi hriăm bruă djŏ guôp hŏng klei mâo, rơ̆ng klei dưi hluê ngă; mđĭ ktang bruă mtô bi hriăm mguôp hŏng dŭm anôk bruă duh mkra, anôk bruă mkra mjing mnia blei, hưn mthâo bruă mă kơ phung leh ruê̆ hriăm./.

H’Zawut pô mblang