Hưn mthâo hlăm mmông mă bruă, Lương Nguyễn Minh Triết, Khua hlăm bruă Đảng čar Dak Lak brei thâo, bruă duh mkra - ala ƀuôn gưl I klă klơ̆ng hơĭt kjăp leh anăn mâo lu boh tŭ jăk. Hnơ̆ng bruă duh mkra lŏ dơ̆ng pŏk mlar, GRDP hlue si ênoh ară anei mâo êbeh 48.400 êklai prăk, đĭ 11,7% mkă hŏng wưng anei thŭn 2025,

 Khădah snănm yap hnơ̆ng đĭ kyar GRDP, čar mrâo mâo hlăm brô 7,5%l bi liê knŭk kna adôk êmưt; bruă tla hnô, msir mgaih anôk ala adôk lu hdră bruă adôk dleh dlan, bruă ruh mgaih hră mơar kơ dŭm hdră bruă phŭn ka hmao msir mgaih, bruă mkra mjing mnia blei tuôm hŏng lu klei dleh dlan.

 Khua dlăng bruă Đảng čar Dak Lak lač čiăng dưi ngă klei kñăm đĭ kyar 10% kơ dlông,  klei čiăng iêô mkrum prăk bi liê hlăm wưng kơ anăp jing prŏng snăk, êbeh klei dưi kơ prăk bi liê alŭ wăl. Kyua anăn čar akâo kơ gưl dlông hnưm mâo klei bhiăn iêô mkrum klei găl êngao knŭk kna, pŏk klei dưi čan prăk ODA, mbĭt anăn mjing klei găl iêô jak phung bi liê phŭn hlăm bruă tuh tia mkra mjing mrâo mrang, logistics, mkra mjing êlam mnơ̆ng dhơ̆ng lŏ hma leh anăn rông mnơ̆ng yua kdrăp mrâo. Dak Lak ăt akâo brei mâo klei bhiăn mbruă  hĭn čiăng msir mgaih ngăn drăp êbeh, mjing klei găl đĭ kyar.

“Ară anei čar mâo hdră msir leh, ƀiădah hdră msir čiăng pŏk ngă klă klơ̆ng snăn dleh snăk, boh nik jing krĭng wăl nah Ngŏ, ngăn drăp dôk lu, brei mưn snăn amâo dưi mưn ôh, čhĭ kăn dưi mơh, bi mlih jing anôk bruă, anôk bruă mdrao mgŭn snăn brei djŏ guôp hŏng klei čiăng kyua anăn akâo kơ gưl dlông ksiêm dlăng mâo mơ̆ klei bhiăn klă hĭn, mơ̆ng hnơ̆ng gưl dlông snăn kơh čar mâo tur knơ̆ng čiăng bi klă klơ̆ng hlăm bruă bi mlih ngăn drăp anei čiăng duh kơ klei đĭ kyar jăk hĭn.”

Blŭ hrăm hlăm mmông mă bruă, Nguyễn Thanh Nghị bi mni kơ klei gĭr Dak Lak hlăm boh klei adôk lu klei dleh dlan, ƀiădah čar brei ngă jăk hĭn hlăm klei gĭt gai, boh nik bi liê knŭk kna, ruh mgaih dŭm hdră bruă dôk kpăk đuôm leh anăn bi hrŏ ênoh gŏ êsei ƀun. Ñu ăt bi mklă, leh bi mŭt alŭ wăl, Đak Lak mâo klei găl kơ lăn čư̆ êa lu jơr ƀiădah anôk bruănah gŭ mkŏ, klei găl mnuih mă bruă leh anăn klei găl mlih mrô adôk kƀah, hmăi kơ tur knơ̆ng đĭ kyar.

“Brei lŏ ksiêm dlăng klei čih mkra leh anăn mâo hdră msir klă klơ̆ng kơ djăp bruă, djăp hdră bruă phŭn đru mguôp kơ klei đĭ kyar. Ară anei si ngă čuăl mkă, čiăng rơ̆ng kơ arăng bi liê snăn mnuih mă bruă, mkŏ êlan klông mâo klei găl mơ̆. Drei dleh dlan leh snăn čiăng kơ pô duh bi liê hriê tinei brei mâo lu hĭn mta snăn kơh dưi iêô jak  phung bi liê. Sa bruă mkăn jing ba yua klei găl, êlâo hĭn ka iêô jak bi liê snăn brei msir mgaih hdră bruă dôk kpăk đuôm.”

Mơ̆ng hdră tă leh anăn klei gĭt gai hlăm mmông mă bruă, dưi ƀuh klei kčah hŏng Dak Lak amâo djŏ knŏng dôk hlăm bruă kčĕ klei bhiăn ôh, ƀiădah yuôm bhăn hĭn jing mkŏ mjing hlue ngă tŭ dưn, ba hdră êlan, hdră mtrŭn mơ̆ng Đảng hlăm klei hdĭp. Čiăng ngă snăn, brei čar bi klă hŏng hdră bruă, hdră kčah djŏ hŏng boh sĭt; gĭr ruh mgaih klei kpăk đuôm, ba yua klei găl, mjing wăl hdĭp mda găl ênưih čiăng iêô jak klei bi liê leh anăn mđĭ kyar.  Leh djăp bruă klam dưi pŏk ngă hrăm mbĭt, mguôp hŏng bruă klam klă mngač leh anăn boh tŭ dưn sĭt, hdră mtrŭn mơ̆ng Đảng srăng amâo djŏ jing hdră tă ôh ƀiădah jing boh kdrŭt đĭ kyar, đru ba Dak Lak êdah kdlưn, đĭ kyar  pral leh anăn hơĭt kjăp hlăm wưng mrâo.