Nai mtô Lê Hiếu Vy, Khua bruă Đoàn Sang hră gưl tlâo Ngô Gia Tự (ƀuôn hgŭm Phú Yên) jing pô bi ala sa anei mơ̆ng čar Dak Lak dưi mâo mă klei pah mni Lý Tự Trọng thŭn 2026. Amai mlih mrâo nanao hdră ngă čiăng jak iêu, bi mguôp phung đoàn viên, phung hđeh hriăm hră. Hlăm gưl adiê hjan êa lip lêč knhal jih thŭn 2025 êgao, amâo uêñ klei huĭ hyưt, amai Vy jak iêu leh êbeh 30 čô đoàn viên nao truh ti krĭng bi ktlah čiăng ba mnơ̆ng đru dŏng kơ mnuih ƀuôn sang. Ai tiê ba anăp, jhŏng kmlăn mơ̆ng amai amâo djŏ knŏng đru kơ mnuih ƀuôn sang hgao klei dleh dlan ƀiădah lŏ lar bra ai tiê gĭr hriăm hră hlăm phung hđeh, krŭ wĭt klei thâo săng, klei đua klam lehanăn klei thâo bi đru. Hŏng amai Vy, klei hrăm mbĭt lehanăn ba klei khăp mơai kơ phung hđeh jing hdră đru mđĭ klei thâo săng, klei thâo bi đru, duh myơr hlăm grăp čô hđeh hriăm hră lehanăn phung mda asei.

“Hlăk hrăm mbĭt drei mă bruă mbĭt hŏng phung hđeh mtam. Ƀuh pô ngă mbĭt srăng mđĭ ai čŏng pô ngă bruă, ba anăp mơ̆ng phung hđeh, anăn jing pô mtrŭt mjhar amâo djŏ drei gĭt gai brei ngă ôh. Phung hđeh srăng bi mklă pô, lehanăn klei bi mklă đĭ nanao. Grăp hdră mă bruă srăng jing sa klei tui ksiêm năng hdơr hŏng phung hđeh”.

Kyua hdră ngă jăk, tŭ dưn, wưng thŭn 2020 – 2025, Đoàn Sang hră gưl tlâo Ngô Gia Tự jing sa hlăm dŭm êpul êya êdah êdi mơ̆ng čar Dak Lak. Knŏng hlăm thŭn 2025, Sang hră Ngô Gia tự mâo 8 čô hđeh dưi hriăm bi mŭt Đảng.

Mbĭt hŏng sang hră, hdră bruă Đoàn dưi pŏk ngă ti Dak Lak hŏng bruă phŭn jing bi mguôp hdră hriăm hŏng klei dôk čiăng ti nah gŭ. Ti ƀuôn hgŭm Ƀuôn Ama Thuôt, leh ba yua bruă knŭk kna 2 gưl, đoàn viên êdam êra dưi kah mbha bruă klam klă klơ̆ng, nao đru kơ mnuih ƀuôn sang ngă hră mơar hluê hdră online, ktrâo lač kơ kdrăp mrô ti grăp alŭ wăl klă klơ̆ng. Hluê si amai Lê Thị Anh Trâm, Khua bruă Đoàn ƀuôn hgŭm Ƀuôn Ama Thuôt, êdam êra amâo hlŏng ngă jih ôh ƀiădah ktrâo lač klă klơ̆ng čiăng kơ mnuih ƀuôn sang čŏng pô hriăm ngă hlăm kdrăp mrô.

Hlăm wưng êgao, bruă đoàn ƀuôn hgŭm ăt mkŏ mjing êpul nao đru kơ Anôk bruă ngă hră mơar knŭk kna, dưi pŏk ngă ti 89 alŭ mnuih ƀuôn sang dôk. Amâo djŏ knŏng mjưh ti hdră đru ƀiădah lŏ hrăm mbĭt ktrâo lač dôk ngă mbĭt čiăng kơ mnuih ƀuôn sang thâo ngă raih hlăm êlan mạng”.

Hlăk dôk hluê bgă gru hmô bruă knŭk kna alŭ wăl dua gưl, dôk čiăng kơ êpul bruă Đoàn ruah djŏ bruă, djŏ mnuih, mđĭ lar bruă klam mơ̆ng êdam êra dơ̆ng mơ̆ng nah gŭ mtam. Leh dưi bi mklă bruă klă klơ̆ng, hdră êdam êra amâo lŏ rah rưng ƀiădah srăng siă suôr hŏng dŭm bruă ngă klă sĭt.

Knŏng hlăm wưng bhiâo, dŭm êpul êdam êra ba anăp ti Dak Lak đru leh dŭm êbâo čô mnuih dưi mjĕ hŏng kdrăp ngă hră mơar knŭk kna lehanăn kdrăp mrô. Anei jing êpul mkŏ yuôm bhăn plah wah bruă knŭk kna mrô lehanăn mnuih ƀuôn sang, boh nik ti krĭng taih kbưi. Ayŏng Lương Minh Tùng, Khua bruă Đoàn čar Dak Lak mñă, čiăng mkăp djŏ hŏng boh klei mrâo, êpul bruă Đoàn brei lŏ dơ̆ng mlih mrâo hdră ngă bruă, djŏ guôp hŏng boh sĭt.

“Êpul bruă Đoàn brei mâo klei bi mlih phŭn. Knuă druh đoàn ti nah gŭ brei pral kdal hluê ngă kjăp bruă klam kđi čar ti alŭ wăl. Thŭn anei, knuă druh đoàn ti nah gŭ ruah leh dŭm mta phŭn djŏ guôp hŏng boh sĭt mơ̆ng alŭw ăl, boh nik leh bi mŭt mbĭt, hluê hŏng tur knơ̆ng anăn bi mklă dŭm bruă dleh, dŭm bruă brei mđĭ lar klei đua klam mơ̆ng phung êdam êra hlăm bruă knŭk kna 2 gưl”.

Y Giang Gry Niê Knơng, Kơiăng khua bruă Đảng čar, Khua anôk bruă mặt trận čar Dak Lak lač snei, hlăk boh klei mrâo, êpul bruă Đoàn brei lŏ mlih mrâo hdră ngă bruă, djŏ guôp hŏng klei đĭ kyar mơ̆ng ênuk ară anei. Boh nik, đoàn viên, êdam êra brei jing êpul ba anăp hlăm hdră mlih mrâo lehanăn mlih mrô, dŭm bruă mâo boh phŭn yuôm bhăn hŏng hdră mđĭ kyar mơ̆ng ala čar, mơ̆ng alŭ wăl. Hŏng klei dưi bi mjĕ pral klei thâo săng lehanăn kdrăp mrâo, phung êdam êra jing êpul hnưm dưi ba mdah dŭm klei mĭn mrâo, ba yua kdrăp mrâo hlăm boh sĭt, đru mtrŭt mđĭ kyar bruă duh mkra – ala ƀuôn lehanăn mñă bruă klam mơ̆ng pô phŭn hlăm êdei anăp ala čar.

“Bi mlih mrô dưi bi mklă jing bruă phŭn lehanăn phung êdam êra brei ba akŏ hlăm hdră anei. Amâo djŏ knŏng ba akŏ hlăm klei ba yua kdrăp mrâo ƀiădah brei jing êpul phŭn đru kơ mnuih ƀuôn sang hluê ngă hră mơar knŭk kna ti kdrăp mtô, mkra mlih hdră ngă bruă. Bruă klam mơ̆ng Đoàn jing brei ba kdrăp mrô truh hŏng ƀuôn sang, ktrâo lač kơ mnuih ƀuôn sang mjĕ hŏng kdrăp mrâo, klei thâo săng mrâo, đru msir lăm klei bi kpleh plah wah ƀuôn prŏng hŏng krĭng ƀuôn sang, krĭng taih kbưi”.

Hlăk klei čiăng đĭ kyar ƀrư̆ hruê ƀrư̆ đĭ, čar Dak lak bi mklă phung êdam êra jing sa hlăm dŭm êpul phŭn yuôm bhăn čiăng hluê ngă bi sĭt klei čang hmăng đĭ kyar mbĭt anăn jing giê mkă kơ klei đĭ kyar hơĭt kjăp. Kyua anăn, bruă mđĭ klei đua klam lehanăn duh myơr mơ̆ng ênuk gưl hđeh srăng jing mta phŭn yuôm bhăn, đru mkŏ mkra Dak Lak đĭ kyar pral lehanăn hơĭt kjăp./.