VOV4.Êđê- Truh ară anei, wăl anôk mnia mblei ƀêñ Trung thu ti čar Dak Lak mphŭn mčhĭt m’uăt. Dŭm hnư mnơ̆ng ba čhĭ mâo lu mta ƀêñ ƀuăn srăng ba truh kơ yan Têt trung thu m’ak hlak leh 1 thŭn hmăi mơ̆ng klei ruă Covid 19.

 Êbeh sa hruê kăm anei, hlăm dŭm ktuê êlan p’prŏng ti ƀuôn prŏng Ƀuôn Ama Thuôt msĕ si Lê Thánh Tông, Lê Hồng Phong, Phan Bội Châu, Phan Chu Trinh... lu knưng mnơ̆ng čhĭ ƀêñ Mlam mlan pur dưi mdơ̆ng, bi msiam. Dôk ruah ƀêñ mlam mlan pur kơ găp djuê, Bùi Minh Chánh, ti ƀuôn Tân Lợi, ƀuôn prŏng Ƀuôn Ama Thuôt, čar Dak Lak brei thâo, dŭm mta ƀêñ mâo anăn knăl hlăm anôk bi čhii jing mnơ̆ng ñu ruah:

“Grăp thŭn kâo khăng ruah ƀêñ mlam mlan pur mâo anăn knăl hlăm anôk ba čhĭ, doh, mâo phŭn agha klă. Kâo ƀuh thŭn anei mnơ̆ng dhơ̆ng đĭ ƀiă mkă hŏng grăp thŭn, rup jăk siam hĭn, lu jơr.”

Êpul kriê dlăng anôk čhĭ mnia ƀêñ mlam mlan pur ti anôk mnia blei hlăm ƀuôn prŏng Ƀuôn Ama Thuôt

Thŭn anei, dŭm knưng mnơ̆ng čhĭ mơ̆ng dŭm anăn knăl prŏng msĕ si Kinh Đô, Yến Sào Khánh Hòa, BiBica... leh anăn ƀêñ mơ̆ng alŭ wăl msĕ si Hà Nội, Thành Phát mâo lu phung blei hlăm hlăm gưl anei. Dŭm mta ƀêñ lu jơr lơ rup, mta. Êngao kơ dua mta ƀêñ phŭñ jing ƀêñ êun leh anăn ƀêñ ăm snăn mâo ƀêñ kơ phung amâo ƀơ̆ng čĭm kan leh anăn phung ƀơ̆ng răng kơ knăng asei mlei, hŏng lu mnâo msĕ si asăr băng krih, êtak mtah, hƀei bua, êngu jŭ, asăr mkai, lu mnơ̆ng bi luk mbĭt, kđeh čĭm ŭn, kan jampon, mnŭ ăm jampon, boh bip…

Amâo djŏ knŏng čiăng kơ hnơ̆ng jăk grăp kđeh ƀêñ ôh, phung blei grăp hruêlŏ ruah hĭn hlăm kdô đŭng grăp kđeh ƀêñ čiăng ngă mnơ̆ng mđup brei hlăm gư; anei. Amai Nguyễn Thị Bích Phương, kriê dlăng sang mnia Ngọc Khánh 2, êlan Phan Bội Châu, ƀuôn hgŭm Tân Tiến, ƀuôn prŏng Ƀuôn Ama Thuôt brei thâo:

“Dua thŭn êlâp snăn klei ruă tưp anăn hmei mâo knŏng ƀiă ƀêñ, ƀiădah thŭn anei klei ruă tưp jih leh anăn hmei blei mnơ̆ng mơ̆ng dŭm anăn knăl p’prŏng pioh čhĭ kơ mnuih ƀuôn sang msĕ si Kinh Đô, Bibica leh anăn Đồng Khánh.”

    Lu phung pô knưng mnơ̆ng brei thâo, ƀêñ Mlam mlan pur thŭn anei đĭ hlăm brô 3000-5000 prăk/sa kđeh mkă hŏng đar thŭn. Hlue si klei hâo hưn diñu hmư̆ mơ̆ng phung mkra mjing snăn kyua ênoh mnơ̆ng dhơ̆ng mkta mjing đĭ anăn ênoh ƀêñ čhĭ ăt đĭ mơh. Amai Phạm Thị Chúc Giang, Khua anôk bruă mnia blei ƀêñ keŏ Phương Hoa ti êlan Y Jut, ƀuôn prŏng Ƀuôn Ama Thuôt brei thâo, kah knar sa kđeh ƀêñ Mlam mlan pur mâo ênoh mơ̆ng 60.000 truh 75.000 đồng/kđeh.  Hŏng dŭm kđeh ƀêñ jăk hĭn snăn mâo ênoh truh êbeh 3 êklăk prăk/huôm (4 kđeh). Ăt hlue si amai Giang, wưng anei, klei bi blei anôk ƀiă:

“Sang mnia hmei mnia blei êbeh 10 thŭn, mkă hŏng thŭn dih snăn thŭn anei đa đa mnơ̆ng đĭ ƀiă, truh wưng anei snăn hnơ̆ng čhĭ ăt ka đĭ mơh, čang hmăng adôk dŭm hruê dơ̆ng srăng đĭ lu hĭn”

Sa anôk čhĭ ƀêñ Mlam mlan pur êlan Lê Thánh Tông - ƀuôn prŏng Ƀuôn Ama Thuôt

 Čiăng răng mgang phung blei yua hlăm klei blei mprăp leh anăn dŭm êpul, phung mkra mjing, mnia blei klă sĭt, Knơ̆ng bruă kriê dlăng anôk ba čhĭ Dak Lak dôk pŏk gưl ksiêm dlăng êlâo, hlăm leh anăn êdei knăm mơak mlan pur 2022.  Mbĭt hŏng anăn, akŏ mlan 9, čar Dak Lak srăng mkŏ mjing dua êpul ksiêm dlăng mlir dhar bruă ti 6 kdriêk, wăl krah leh anăn ƀuôn prŏng ksiêm dlăng bruă hlue ngă hdră bhiăn kơ klei êđăp ênang mnơ̆ng ƀơ̆ng mơ̆ng dŭm anôk mkra mjing, mnia blei ti čar. Trần Văn Tiết, K’iăng Khua Knơ̆ng bruă bi doh mnơ̆ng ƀơ̆ng čar Dak Lak, brei thâo:

 “Hmei srăng kƀĭn ksiêm dlăng hŏng dŭm mta mnơ̆ng dưi yua lu hlăm gưl knăm mơak mlan pur msĕ si ƀêñ, keŏ, êa mmih. Tui hlue si grăp boh phŭn mâo hdră đŭ bi kmhal mdê mdê hlue si hdră kčah. Hŏng anôk mkra mjing amâo djăp hră mơar snăn đŭ bi kmhal hlue si hdră amâo hră dưi brei, leh anăn dŭm anôk mkra mjing mâo djăp hră mơar doh êƀăt mnơ̆ng ƀơ̆ng ƀiădah amâo hưn mdah mnơ̆ng dhơ̆ng snăn ăt đŭ bi kmhal. Hlăm hdră mkra mjing tơdah pô yua thiăm dŭm mta mnơ̆ng amâo rơ̆ng hnơ̆ng jăk snăn srăng đŭ bi kmhal hŏng klei ngă soh anăn.”

Pô mblang: H’Zawut Ƀuôn Yă