VOV4.Êđê - Dŭm tač hlăp dưi bi msiam hŏng lu êa mil hlăm dŭm mta mnơ̆ng hlăp lêñ jăk jĭn dưi mkŏ dưm ti sang hră amâodah wăl krah krĭng ƀuôn sang ngă kơ phung hđeh hơ̆k kdơ̆k. Hŏng klei tŭ yuôm čiăng đru kơ phung hđeh lŏ mâo anôk hlăp lêñ, mtrŭt mjhar rŭ mkra lu “Tač hlăp kơ phung hđeh” dưi pŏk ngă truh ti dŭm krĭng ƀuôn sang taih kbưi hlăm čar Dak Lak ti wưng akŏ thŭn mrâo.

Dŭm hruê mdei Tết nguyên đán Nhâm Dần, wăt tơdah adiê mđiă hlơr, phung hđeh điêt ti ƀuôn Kruê̆, să Vụ Bổn, kdriêk Krông Pač, čar Dak Lak ăt kƀĭn ti anăp tač hlăp sang hră gưl sa Phan Bội Châu čiăng hlăp ti anôk hlăp lêñ mrâo mkŏ dăp. Êlâo anăn 2 hruê kăm, tinei dưi dăp lu klei hlăp lêñ mjuăt asei mlei msĕ si êlan hroh, êdai, kdrông zik zăk… ngă kơ phung hđeh khăp snăk, bi jak nao hlăp. Adei Lê Trần Linh Chi, djuê ana Tày, sang ti giăm anôk hlăp lêñ, khăp snăk brei thâo: Hlăk ka mâo tač hlăp, ară anei kâo bi mni lač jăk kơ phung neh ngă leh tač hlăp, tač čưng boh, êlan hroh kơ hmei, kâo mơak snăk, lač jăk lu. Kâo srăng jak phung găp hriê hlăp tinei.

Ăt khăp kơ anôk hlăp mrâo, adei Vi Y Quyền, djuê ana Êđê, hđeh sang hră adŭ 5B, sang hră gưl sa Phan Bội Châu brei thâo, kbưi hŏng sang hră giăm 1 km, ƀiădah mơ̆ng leh mâo anôk hlăp lêñ mrâo dưi dưm ti sang hră wăt tơdah dưi mdei Tết ƀiădah grăp hruê ñu ăt nao hlăp hŏng phung găp tinei. Hruê anei kâo mơak snăk, êlâo adih, ka tuôm hlăp ôh snei anăn ară anei kâo mơak snăk. Mâo phung nai leh anăn phung neh ba mnơ̆ng yuôm bhăn snei, kâo ƀuăn srăng gĭr, kriăng hriăm hră mơar”

 Hluê si nai Trần Hải Đường, Khua sang hră gưl sa Phan Bội Châu, anôk hriăm ti ƀuôn Kruê̆ ară anei mâo 5 adŭ hriăm hŏng 100 čô hđeh sang hră, jih jang jing mnuih djuê ƀiă. Anei jing sa hlăm dŭm boh sang hră dleh dlan hĭn ti să Vụ Bổn. Êlâo adih, êngao kơ mmông hriăm snăn hđeh sang hră tinei lu jing hluê amĭ ama nao pưk hma, răng êmô kbao, mnah čĭm amâodah čưng boh hlăm kdrăn rơ̆k. Mơ̆ng leh tač hlăp dưi mkŏ dăp ti nei, phung hđeh sang hră leh anăn phung hđeh riêng gah krĭng anei khăng hriê hlăp tinei. “Mâo anôk hlăp lêñ snei snăn êlâo hĭn phung hđeh srăng khăp nao sang hră hĭn, tal 2 srăng mđĭ klei hriăm mjuăt asei mlei, mđĭ ai ktang kơ phung hđeh. Leh ba jao anôk hlăp anei snăn khua sang hră hŏng phung êdam êra sang hră leh anăn êpul êdam êra alŭ srăng bi kƀĭn čiăng si bĕ ngă kriê dlăng jăk hĭn čiăng mâo klei tŭ dưn hĭn kơ phung hđeh”.

Tač hlăp ti ƀuôn Kruê̆ jing bruă tal 3 hlăm hdră “Tač hlăp kơ adei” mơ̆ng êpul mâo ai tiê kmah Ba klei khăp Ƀuôn Ma Thuôt iêô mkrum klei đru ba ala ƀuôn mkŏ mjing, hŏng ênoh bi liê hlăm brô 30 êklăk prăk. Amai Lê Như Huyền Trâm, Khua Êpul mâo ai tiê kmah Ba klei khăp Ƀuôn Ama Thuôt brei thâo, hlăm hdră ktuê dlăng boh sĭt ti dŭm alŭ wăl dleh dlan, dŭm ƀuôn sang krĭng taih kbưi, ñu ƀuh phung hđeh tinei dleh dlan snăk, hdĭp kbưi hŏng wăl krah, amâo mâo klei găl nao hlăo hlăm anôk hlăp lêñ. Êngao kơ mmông hriăm, phung hđeh khăng bi jak nao mnah čĭm, nao ti ênao êa, êa krông čiăng hlăp anăn ênưih mâo klei djiê mngăt hlăm êa. Ti anăp klei anei, êpul bi hgŭm hŏng alŭ wăl, iêô mkrum klei găl čiăng đru mkŏ mjing tač hlăp kơ phung hđeh. Mbĭt hŏng anăn, ti dŭm anôk hlăp lêñ dưi mkŏ ming, dŭm anôk bruă hrăm mbĭt ăt bi hgŭm thiăm klei găl čiăng đru mnơ̆ng dhơ̆ng, mnơ̆ng yua kơ mnuih ƀuôn sang amâodah ao mđao, mnơ̆ng yua hriăm hră kơ phung hđeh dleh dlan. Anei jing bruă srăng ngă nanao sui thŭn leh anăn srăng lŏ dơ̆ng pŏk ngă mtam leh gưl mdei Tết nguyên đán Nhâm Dần. Amai Lê Như Huyền Trâm lač: “Hlăm thŭn 2022 srăng mâo 10 Tač hlăp kơ dŭm kdriêk, să ƀun ka mâo ôh tač hlăp hlăm čả Dak Lak. Êpul srăng iêô mthưr hŏng phung mâo ai tiê kmah, tơdah prăk bi liê amâo djăp snăn phung hlăm êpul srăng đru thiăm čiăng lŏ ngă hdră tač hlăp kơ phung hđeh.”

 Hŏng klei hrăm mbĭt mơ̆ng dŭm anôk bruă, phung mâo ai tiê kmah, hlăm 5 thŭn êgao, mơ̆ng dŭm hdră đru mơ̆ng êpul bruă êdam êra, čar Dak Lak mkŏ mjing leh giăm 200 tač hlăp kơ phung hđeh, hŏng ênoh mâo giăm 10 êklai prăk. Grăp tač hlăp dưi bi leh leh anăn ba jao mâo dŭm anôk bruă tŭ mă leh anăn kriê dlăng, mjing klei găl čiăng phung hđeh dưi ba yua, hlăp lêñ. Mơ̆ng anăn, đru kơ phung hđeh mâo thiăm anôk hlăp lêñ, mjing klei jăk mơak sĭt nao sang hră.