Võ Thị Bạch Nga, sa čô čhĭ mnơ̆ng ti ƀuôn hgŭm Tân Lập, čar Dak Lak brei thâo, grăp blư̆ truh Têt Djuê ana hlăm grăp thŭn, anôk čhĭ mnơ̆ng ñu mprăp lu mnơ̆ng mkăp kơ hruê Têt msĕ si ƀêñ kĕo, kpiê êa mnăm, braih, êa praĭ, êa msĭn, mnơ̆ng bi ƀăt… Čiăng mâo prăk mprăp mnơ̆ng, ƀi čan mơ̆ng Hdră bi hơĭt ênoh čhĭ mâo Knŭk kna pŏk ngă, hŏng ênoh čan hlăm brô 2 êklai prăk.

“Ênoh čan ba mdah mâo hlăm brô 2 êklai prăk, kâo yua blei mnơ̆ng êlâo čiăng kơ Têt mâo djăp mnơ̆ng ba čhĭ. Čang hmăng ênoh prăk mnga krơ̆ng ti hnơ̆ng êbeh 6.0 msĕ si grăp thŭn lehanăn dưi đru hơĭt kjăp srăng ba klei jăk găl wăt kơ anôk čhĭ lehanăn mnuih blei. Dưi čan prăk bi hơĭt ênoh čhĭ klă sĭt mnơ̆ng pô čhĭ amâo mđĭ ênoh lu ôh, snăn mnuih blei yua dưi dưn boh tŭ anei”.

Bùi Quang Hoà, Khua anôk bruă siêu thị Co.opmart Ƀuôn Ama Thuôt brei thâo, wưng Têt Bính Ngọ thŭn anei, hnơ̆ng blei mnơ̆ng dhơ̆ng lu hĭn mâo djam mtam boh kroh, mnơ̆ng dhơ̆ng, braih, ƀêñ hra lehanăn hra mâo đăo knăl đĭ 6%. Čiăng rơ̆ng phŭn mkăp, anôk bruă mă leh bruă hŏng phung mkăp mnơ̆ng, mprăp ênŭm, rơ̆ng klei doh êƀăt mnơ̆ng dhơ̆ng, wưng kčah ba yua mbĭt anăn amâo mđĭ ênoh čhĭ.

“Mă bruă hŏng Knơ̆ng bruă Mnia mblei čar Dak Lak, hmei ƀuăn ba mdah ênoh čhĭ hơĭt kjăp, mƀlir klă ti anôk čhĭ, hlăm wang 3 mlan, mơ̆ng hruê 15/12/2025 – 15/3/2026. Čiăng hluê ngă klei anei, hmei mă bruă leh hŏng anôk mkăp, diñu tŭ ư leh, hlăm wưng êlâo, hlăm lehanăn êdei Têt mkăp mnơ̆ng amâo mđĭ ênoh ôh.

Pŏk ngă hdră bi hơĭt ênoh čhĭ hlăm wưng êlâo, hlăm lehanăn êdei kơ Têt Bính Ngọ 2026 hluê si klei gĭt gai mơ̆ng Knŭk kna, ti alŭ wăl čar Dak Lak mâo 16 êpul brei čan prăk. Trần Minh Hoàng, Kơiăng khua Anôk bruă knơ̆ng prăk mnia mblei mguôp hnư duh bi liê lehanăn mđĭ kyar ti  čar Dak Lak (BIDV) brei thâo, nao hlăm hdră anei, knơ̆ng prăk hlăk lehanăn dôk pŏk ngă lu hdră brei čan kñăm đru kơ dŭm êpul, mnuih čhĭ mnia dŭm mta mnơ̆ng mkăp wưng Têt. Hdră brei čan dưi ngă pral djŏ hŏng klei čiăng, ngă hră mơar pral, khuăt, ênoh prăk mnga hdjul lehanăn hơĭt, mơ̆ng anăn mjing klei găl čiăng kơ anôk bruă duh mkra, gŏ sang mă bruă mnia mblei lehanăn phung čhĭ mnơ̆ng ênưih dưi mă čan, ba yua prăk anei tŭ dưn.

“Hluê si Hdră mơ̆ng Knơ̆ng bruă mnia mblei mguôp hnư duh bi liê lehanăn mđĭ kyar Việt Nam (BIDV), hmei mđing brei čan kơ mnuih ngă bruă duh mkra, mnia mblei, boh nik čhĭ mnơ̆ng blei yua hlăm grăp hruê. Hŏng hdră anei, knơ̆ng prăk amâo kčah ôh ênoh čan, prăk mnga hdjul hĭn. Tơdah dŭm êpul, gŏ sang mă bruă mnia mblei lehanăn phung čhĭ mnia čiăng čan, hmei srăng mprăp brei čan čiăng đru kơ mnuih ƀuôn sang”.

Ksiêm yap mơ̆ng Knơ̆ng bruă Mnia mblei čar Dak Lak, klei čiăng blei mprăp mnơ̆ng kah knar grăp mlan ti alŭ wăl mâo hlăm brô 3.400 êklai prăk. 1 mlan êlâo Têt djuê ana Bính Ngọ 2026, hnơ̆ng blei mnơ̆ng đĭ 30%, bi knar êbeh 1.000 êklai prăk, mđing kơ dŭm mta mnơ̆ng phŭn msĕ si: Boh kroh, ƀêñ kĕo, braih, hra, êa msĭn, čhum ao, jep guôk, kpiê, êa mnăm…

Nguyễn Hải Triều, Kơiăng khua knơ̆ng bruă Mnia mblei čar Dak Lak brei thâo, čiăng rŏng phŭn mkăp hlăm wưng Têt, knơ̆ng bruă gĭt gai anôk kriê dlăng wăl anôk mnia mblei lehanăn dŭm anôk bruă mđĭ hdră ksiêm dlăng, đru kčĕ kơ Knơ̆ng bruă sang čư̆ êa čar gĭt gai dŭm knơ̆ng prăk mnia mblei mkăp prăk čan hŏng ênoh hdjul đru bi hơĭt ênoh čhĭ mnơ̆ng.

“Hlăm hdră rơ̆ng mkăp mnơ̆ng dhơ̆ng lehanăn bi hơĭt ênoh čhĭ ti alŭ wăl čar, Knơ̆ng bruă sang čư̆ êa čar Dak Lak mâo leh hră gĭt gai 13 anôk bruă duh mkra mnia mblei, mâo dŭm siêu thị, anôk bruă mnia mblei, anôk mkăp mnơ̆ng čhĭ hliê msĕ si: Co.opmart, GO!, Bách Hóa Xanh, VinMart…, mbĭt hŏng dŭm anôk bruă duh mkra nao hgŭm hlăm hdră anei. Mbĭt anăn, Knơ̆ng bruă ăt brei dŭm êpul êya mkŏ mjing knăm mơak čhĭ mnơ̆ng ti krĭng Ƀuôn Ama Thuôt lehanăn djiêu gah čiăng mnuih ƀuôn sang blei mprăp mnơ̆ng Têt”.

Ti anăp klei blei mnơ̆ng đĭ hlăm wưng Têt, ƀiădah hŏng klei mprăp ênŭm mnơ̆ng dhơ̆ng, hdră brei čan truh kơ hdră kriê dlăng wăl anôk mnia mblei, hdră blei mprăp mnơ̆ng Têt ti Dak Lak srăng rơ̆ng klei hơĭt kjăp. Mnơ̆ng dhơ̆ng lu mta, ênoh čhĭ dưi ksiêm dlăng kjăp đru kơ mnuih ƀuôn sang hơĭt ai tiê blei mprăp. Sa yan Têt djăp ênŭm dôk truh giăm hŏng mnuih ƀuôn sang ti Dak Lak./.