Êwak sa čăp rơ̆k phưi hlăm war êmô, ayŏng Y-Hen Niên, ti ƀuôn Yông B, să Ea Drơ̆ng, kdriêk Čư̆ Mgar hơ̆k mơak brei thâo, Anei jing mta phŭn đru kơ gŏ sang ayŏng dưi tlaih mơ̆ng klei ƀun ƀin ti knhal jih thŭn dih. Mơ̆ng 7 thŭn êlâo, gŏ sang ayŏng mâo 40 êklăk prăk mơ̆ng kdriêk đru rŭ mjing sang bi mguôp. Leh kơnăn 2 3 thŭn, Dhar ƀruă mặt trận să lŏ brei kơ gŏ sang sa drei êmô mjeh. 6 thŭn êgao, gŏ sang dlăng kriê wiê năk ară anei mâo leh 5 drei êmô, čhĭ wăt bê, mă êh êmô tuh kơ đang kphê. Dua čô ung mô bi čoh bruă ngă hma, rông ba anak čô čiăng bi hơĭt klei hdĭp.

“Êlâo dih gŏ sang ƀun ƀin, knap mnai, mâo klei uêñ mĭn mơ̆ng knŭk kna, mkăp brei mjeh mnơ̆ng rông msĕ si ŭn, êmô, đru rŭ mjing sang dôk. Hŏng klei uêñ mĭn anăn, gŏ sang mâo klei kreh kriăng čoh bruă ngă hma, gĭr ktưn đĭ kyar. Ung mô̆ kâo hur har bi hơ̆it hnư hrui wĭt, mă bruă mưn čiăng mđĭ kyar klei hdĭp mda gŏ sang. Kâo lač jăk kơ dŭm gưl bruă mâo leh klei uêñ mĭn”.

            Ăt tlaih mơ̆ng klei ƀun ƀin mơ̆ng knhal jih thŭn dih, gŏ sang amai H’Blip Niê ti ƀuôn Yông dưi duh bi liê blei thiăm 7 sao lăn pla kphê čiăng bi hơĭt klei hdĭp. Amai H’Blip brei thâo, mâo klei mlih anăn kyua mâo klei uêñ mĭn mơ̆ng Dhar bruă mặt trận să đru brei 3 drei bê mjeh mơ̆ng knhal jih thŭn 2017.

“Gŏ sang kâo êlâo dih dleh dlan êdi, amâo mâo lăn ngă hma. Mâo knŭk kna brei tlâo brei bê mjeh, gŏ sang kâo ăt rông brei kơ bê mđai čiăng ƀrư̆ ƀrư̆ mdul ƀiă klei dleh dlan, mkuôm prăk anăn leh anăn lŏ lĭng čan čiăng blei hma, pla kphê leh anăn ƀrư̆ ƀrư̆ pŏk mlar bruă mkra mjing čiăng tlaih mơ̆ng klei ƀun ƀin”.

            Klei bi hmô rông ŭn hruh ăt dưi pŏk mlar hlăm kluôm kdriêk Čư̆ Mgar hŏng klei sa ai mơ̆ng phung knuă druh, đảng viên leh anăn mnuih ƀuôn sang. Dưi pŏk mlar truh kơ dŭm êpul bruă. H’Nŭi Niê, k’iăng khua êpul bruă phung mniê kdriêk Čư̆ Mgar brei thâo, Êpul bruă phung mniê ăt mtrŭt mjhar klei bi hmô anei hŏng hnơ̆ng mkiêt mkriêm mơ̆ng 1 truh kơ 20 êbâo prăk hlăm sa mlan, amâo phung amai adei mniê sa ai êdi.

Hlăm dŭm thŭn êgao, hlăm klei mtrŭt mjhar grăp êpul bruă mâo ƀiă êdi  klei bi hmô mkiêt mkriêm, hlăm anăn klei bi hmô rông hruh ŭn jing êdah hĭn. Hlăm bruă anei ăt dưi pŏk mlar lu klei bi hmô, hlăm anăn mâo hlăm brô 60% phung amai adei jing mnuih djuê ƀiă hluê ngă klei bi hmô anei.

            Hŏng klei uêñ mĭn mơ̆ng bruă kđi čar, klei bi hmô rông hruh ŭn jing leh hdră bruă dưi pŏk mlar hlăm kluôm kdriêk Čư̆ Mgar, mkŏ mjing ai dưi truh kơ dŭm êklai prăk đru kơ dŭm gŏ sang ƀun ƀin, giăm ƀun leh anăn gŏ sang mâo klei hdĭp dleh dlan. Kyuanăn, truh kơ ară anei, hnơ̆ng gŏ sang ƀun ƀin hlăm kdriêk mâo klei hrŏ lu, dôk mă knŏng hlăm brô 4,4%, gŏ sang giăm ƀun adôk hlăm brô 7,5%, hnư hrui wĭt kah knar grăp čô mâo 59 êklăk prăk hlăm sa thŭn. Klei hdĭp mnuih ƀuôn sang ƀrư̆ hruê ƀrư̆ mâo klei hơĭt. Y-Wem Hwing, k’iăng khua bruă sang čư êa kdriêk Čư̆ Mgar brei thâo:

 Bruă kriê dlăng klei hdĭp mnuih ƀuôn sang jing mnuih djuê ƀiă ti kdriêk Čư̆ Mgar dưi mâo nanao leh anăn mdưm bruă anăñ jing sa hlăm dŭm bruă klam mrô  1 leh anăn kriê dlăng klei hdĭp mnuih ƀuôn sang, boh nik jing dŭm gŏ sang ƀun, gŏ sang knŭk kna dlăng ba leh anăn dŭm gŏ sang dleh dlan, hluê si klei mĭn gĭt gai jing amâo mâo lui sa čô ti tluôn. Ngă jăk bruă hâo hưn dŭm hdră êlan, hdră mtrŭn mơ̆ng Đảng, klei bhiăn ala čar kơ mnuih ƀuôn sang. Atăt gai, trâo lač, tă hdră klei mĭn, hdră ngă bruă, boh nik hŏng phung tuôm soh čhuai čiăng kơ diñu thâo klă djŏ leh anăn ngă djŏ, đru ngă jăk bruă čung ba mnuih ƀuôn sang hlăm yang ƀuôn.

            Klei ngă bruă ênưuh, grăp gŏ sang knŏng mkiêt mkiêm mơ̆ng 1000 prăk grăp mlan ƀiădah dưi ba wĭt boh tŭ dưn klă klơ̆ng kơ hdră bi hơĭt klei hdĭp yang ƀuôn. Klei bi hmô rông ŭn hruh ti kdriêk Čư̆ Mgar dưi bi hơĭt klei hdĭp lu gŏ sang ti alŭ wăl, boh nik jing mnuih djuê ƀiă hlăm gŏ sang ƀun ƀin, giăm ƀun leh anăn mâo klei hdĭp dleh dlan. Hluê anăn, diñu lŏ mâo thiăm klei đăo knang kơ dŭm hdră êlan mơ̆ng Đảng, čoh bruă ngă hma, gĭr ktưn tlaih mơ̆ng klei ƀun ƀin, đru mđĭ kyar bruă duh mkra alŭ wăl.