VOV4.Êđê- Djŏ tuôm hŏng bruă bi rai giăm 100 ha dliê ti kdriêk Lak, knơ̆ng bruă lŏ hma leh anăn mđĭ kyar krĭng ƀuôn sang čar Dak Lak mâo leh hră mtrŭn mñă kơ anôk bruă ksiêm dlăng dliê mjêč ngă hră mơar ƀuah mkra, bi klă bruă đua klam mơ̆ng êpul êya, grăp čô ngă soh. Leh klei bi rai giăm 400 ha dliê ti să Ya Tơ Môt, kdriêk Ea Suop, anôk bruă djŏ tuôm čar Dak Lak lŏ dơ̆ng mâo dŭm klei hưn mdah mkăn, hlăm dŭm să, Ea R’ Vê, Ea Lôp ăt ti kdriêk Ea Soup, Să Dăk Phơi leh anăn Krông Knô ti kdriêk Lăk.

Hlăm ênhă dliê mâo klei bi rai, mâo 25 ha jing dliê akŏ êa. Nguyễn Quốc Hưng, khua kiă kriê anôk bruă răng mgang dliê čar Dak Lak brei thâo, anei jing dŭm klei ngă soh bi rai dliê kjham êdi, anôk bruă dôk mjêč tui duah pô ngă soh leh anăn ngă hră mơar ƀuah mkra. Mbĭt anăn, anôk bruă ksiêm dlăng dliê čar Dak Lak ăt srăng bi klă bruă đua klam mơ̆ng êpul êya, grăp čô djŏ tuôm lui mâo klei bi rai dliê ƀiădah amâo mâo ƀuh, amâo mâo hmao gang mkhư̆.

Pô mblang: Y-Ƀel Êban