Hluê si hdră kčah, dua anôk bruă srăng bi mguôp hlăm bruă mkŏ mjing dŭm hdră êlan čiăng rơ̆ng klei mkăp brei pui kmlă, mkiêt mkriêm pui kmlă leh anăn bi hrŏ klei luč liê pui kmlă, gĭr ktưn grăp thŭn mkiêt mkriêm ƀiă êdi 2% pui kmlă ti čar Dak Lak. Dua tĭng srăng mtrŭt mđĭ bruă hâo hưn mkiêt mkiêm pui kmlă, hưn mdah hŏng bruă sang čư êa čar pah mni dŭm êpul êya, grăp čô ngă jăk leh anăn mâo hdră êlan mgaih msir hŏng dŭm anôk bruă ngă soh hŏng dŭm klei čuăn mkiêt mkriêm pui kmlă.

Knơ̆ng bruă tuh tia čar Dak Lak leh anăn Pui kmlă Dak Lak lŏ dơ̆ng ngă klei ksiêm dlăng boh sĭt klei ba yua pui kmlă hŏng dŭm anôk yua pui kmlă lu. Ti anăp, dua anôk bruă mtrŭt mjhar, hluê ngă klei bi lông “Gŏ sang mkiêt mkriêm pui kmlă thŭn 2024”, hŏng mta kñăm mkŏ mjing klei bi hmô gŏ sang mâo hdră hdĭp mtah, doh, mrâo mrang hŏng bruă yua pui kmlă êđăp ênang, mkiêt mkriêm.