Wĭt ti ƀuôn sang jing ƀuôn Sut Mđưng, să Čư̆ Suê, kdriêk Čư̆ Mgar leh gưl klei ruă tưp tal 4 mâo ti dŭm čar nha Dhŭng, ayŏng Y - Uel Niê amâo mdei duah bruă mă čiăng hơĭt klei hdĭp mda. Tal êlâo ñu nao mă bruă mưn hlăm hma, nao pŭ mnơ̆ng dhơ̆ng, nao đru mkra sang…leha năn dua mlan hŏng anei, ñu duah leh bruă mă kjăp jing čhĭ mnơ̆ng kơ sang čhĭ mnga, ana kyâo, hŏng hnơ̆ng prăk mlan 300 êbâo prăk/hruê. Ayŏng Y - Uel brei thâo, wăt tơdah mă ya bruă ngă ñu ăt gĭr ktưn čiăng kơ dưi mâo klei tŭ dưn jăk hĭn, mơ̆ng anăn mđĭ hnơ̆ng prăk hrui wĭt kơ pô:

“Kâo ƀuh bruă anei guôp hŏng pô, kâo srăng gĭr mă bruă čiăng mâo thiăm prăk hrui wĭt kơ gŏ sang”

Ƀuh klei tŭ dưn bi mguôp mơ̆ng bruă rông kbao ti gŭ êyui dliê, gŏ sang ayŏng Y Bông Lào ti kdriêk Ea Sup hŏng 25 gŏ êsei mkăn ngă bruă ti să Čư̆ Mlan hŏng êpul êmô truh êbeh 500 drei. Ayŏng Y Bông Lào brei thâo, êlâo dih ñu rông êmô hlue si hdră phưi hŏng êpul êmô anăn luc hruê ai mă bruă leh anăn amâo mâo prăk hrui wĭt lu ôh, leh duah klei hâo hưn kơ bruă rông kbao phưi ti gŭ êyui dliê leh anăn mâo bruă sang čư̆ êa alŭ wăl pŏk ngă gru hmô anei gŏ sang ñu čih anăn hgŭm. Leh sa wưng hlue ngă, ayŏng Y Bông Lào ƀuh klei tŭ dưn klă mngač:

 “Gŏ sang ăt rông 20 truh 30 drei kbao, snăn ăt ba klei tŭ dưn bruă duh mkra, grăp thŭn prăk mnga hlăm brô 20 truh 30 êklăk, lač ăt jăk mơh, prăk hrui wĭt mâo ƀiă mơh.”

Wăt tơdah giăm 70 thŭn leh ƀiădah Tạ Hưũ Ổn ti Ƀuôn Ky, ƀuôn hgŭm Thành Nhất ăt dôk hur har mă bruă mkra mjing, duah hdră nao mrâo hlăm klei mđĭ kyar bruă duh mkra. Êlâo dih êbeh 7 sao lăn gŏ sang, Ổn lu jing pla kphê hŏbg tiu ƀiădah kyua ênoh tiu hrŏ lu snăn luč liê. Amâo êdu ai ôh, ñu lŏ gĭr tui hriăm jhŏng bi mlih ba pla ana boh kruê̆ dŭng mtah, bi mguôp hŏng dŭm mta ana boh kroh mkăn msĕ si boh sưp, boh kruê̆. Truh ară anei, gru hmô ƀrư̆ hrue ƀrư̆ đĭ kyar pŏk mlar hŏng bruă hrui mă êbeh 100 êklăk prăk/thŭn.

 “Pô ăt čŏng ngă jing phŭn, kâo ƀuh pŏk mlar đang war pô, pla thiăm boh kruê̆ dŭng leh anăn pla thiăm dŭm mta ana mkăn, amâo pla sa mta ana ôh”

Leh 3 thŭn ngă mnuih mă bruă hlăm êpul mkra mjing mơ̆ng Knơ̆ng bruă msei ASEAN, hlăm wăl tuh tia mkra mjing Hòa Phú, ayŏng Y Huynh Kƀuôr, ƀuôn Drai Hling, să Hòa Xuân, ƀuôn prŏng Ƀuôn Ama Thuôt ară anei jung leh pô thâo mbruă hŏng prăk mlan êbeh 10 êklăk/mlan. Ayŏng Y Huynh Kbuôr brei thâo, êlâo kơ mŭt ngă bruă hlăm knơ̆ng bruă, ñu tuôm ngă pô mkra êdeh p’phŭt. Kyua klei thâo ngă bruă, anăn leh mŭt hlăm Knơ̆ng bruă ñu lŏ dơ̆ng ngă bruă pral hĭn. Bruă djŏ guôp, klei dưi dưn jăk đru ñu mâo thiăm klei gĭr mă bruă:

 “Hlăm bruă knuă jăk, mmông mă bruă hlăm knơ̆ng bruă đru jăk, prăk mlan kjăp, mprăp djăp kơ klei hdĭp mda leh anăn gŏ sang. Kâo čiăng mă bruă hlăm knơ̆ng bruă sui hĭn leh anăn myơr kơ knơ̆ng bruă lu hĭn čiăng kơ knơ̆ng bruă đĭ kyar lu hĭn”.

 Wăt tơdah bruă mdê mdê, ƀiădah diñu mâo thiăm klei mbĭt anăn jing kreh kriăng leh anăn mbruă hlăm bruă knuă. Hŏng diñu, jăk mơak amâodah djŏ jing klei amâo jăk ôh, jăk mơak jing dưi mă bruă pô khăp leha năn mơ̆ng dŭm bruă anănj srăng ba kơ diñu prăk hrui wĭt kjăp./.