Čar Dak Lak ară anei mâo hlăm brô 150 êpul hgŭm bruă lŏ hma, êbeh 270 anôk rông mnơ̆ng leh anăn êbeh 15.500 gŏ êsei ƀĭng ngă lŏ hma bi hgŭm mkra mjing leh anăn ba čhĭ mnơ̆ng dhơ̆ng hŏng anôk bruă duh mkra. Bruă hgŭm hlăm gru hmô mkra mjing ba lu klei tŭ dưn kơ dŭm tĭng. Dŭm anôk bruă duh mkra, êpul hgŭm bruă mâo phŭn mkăp mnơ̆ng dhơ̆ng kjăp, jăk, msir mgaih anôk ba čhĭ mnơ̆ng dhơ̆ng kơ ƀĭng ngă lŏ hma mơ̆ng dŭm klei kuôl kă bi hgŭm, mjing bruă mă kơ mnuih ƀuôn sang. Mbĭt anăn, bruă bi hgŭm mjing dŭm mta mnơ̆ng dhơ̆ng doh, phŭn agha klă mngač kơ phung yua, mjing bruă mă kơ phung mnuih ƀuôn sang. Bruă ba yua hdră mnêč mrâo mrang hlăm bruă mkra mjing lŏ hma đru mkhư̆ klei hmăi amâo jăk kơ wăl hdĭp mda.

 Mrâo anei, Knơ̆ng bruă sang čư̆ êa čar Dak Lak mkŏ mjing klei bi kƀĭn ksiêm dlăng 5 thŭn hlue ngă Hdră mtrŭn 98 thŭn 2018 mơ̆ng Knŭk kna. Hlăm klei bi kƀĭn, phung bi ala akâo, ba mdah dŭm hdră hlue ngă bruă knuă, hdră kčah bi hgŭm leh anăn ba čhĭ mnơ̆ng dhơ̆ng lŏ hma tŭ dưn hĭn. Huỳnh Bài, Khua Êpul hgŭm bruă čar Dak Lak akâo:

 “Êpul hgŭm bruă čar čang hmăng mâo klei mđing dlăng kơ hdră mtô bi hriăm mnuih mă bruă, tal dua mjing klei găl kơ dŭm êpul hgŭm bruă dưi mâo lăn ala mđĭ kyar krĭng pla mjing leh anăn dŭm wăl duh kơ hdră mkra mjing. Hŏng dŭm gưl bruă sang čư̆ êa leh anăn anôk bruă duh mkra mâo klei bi hgŭm dua anôk ba čhĭ čiăng mkra mjing mnơ̆ng dhơ̆ng mơ̆ng êpul hgŭm bruă hơĭt kjăp”.

Huỳnh Bài ăt brei thâo, mrâo êgao Êpul hgŭm bruă čar Dak Lak mkŏ mjing mphŭn pŏk sang rang mdag mnơ̆ng dhơ̆ng mơ̆ng dŭm êpul hgŭm bruă leh anăn mnơ̆ng dhơ̆ng OCOP. Anôk rang mdah anei ti mrô 88 êlan Điện Biên Phủ, ƀuôn hgŭm Thành Công, ƀuôn prŏng Ƀuôn Ama Thuôt, čhĭ 151 mta mnơ̆ng dhơ̆ng mơ̆ng 25 Êpul hgŭm bruă ti čar. Anôk rang mdah dŭm mta mnơ̆ng dhơ̆ng mơ̆ng êpul hgŭm bruă leh anăn dŭm mta mnơ̆ng dhơ̆ng OCOP srăng jing anôk mkŏ mnia blei tŭ dưn plah wah dŭm Êpul hgŭm bruă hŏng phung blei, mbha leh anăn ba yua.

Mrâo anei, Knơ̆ng bruă sang čư̆ êa čar Dak Lak ăt mkŏ mjing Klei bi kƀĭn ksiêm wĭt 3 thŭn pŏk ngă Hdră mđĭ kyar bruă duh mkra êpul lu, Êpul hgŭm bruă wưng 2021 - 2025 leh anăn Hdră ngă bruă mơ̆ng Knơ̆ng bruă sang čư̆ êa čar hlue ngă klei klah čŭn mơ̆ng Phŭn bruă kđi čar kơ klei lŏ dơ̆ng mlih mrâo, mđĭ kyar leh anăn mđĭ klei tŭ dưn bruă duh mkra êpul lu hlăm wưng mrâo.

Hlăm 3 thŭn pŏk ngă Hdră mđĭ kyar bruă duh mkra êpul lu, êpul hgŭm bruă, čar Dak Lak đru mkŏ mjing mrâo 57 êpul hgŭm bruă, đru dŭm êpul hgŭm bruă masin, kdrăp mnơ̆ng, yua kdrăp mrâo, mkŏ mjing anăn knăl, mkŏ mjing hdră mkra mjing lŏ hma phŭn ti alŭ wăl, hŏng ênoh bi liê êbeh 6 êklai prăk. Dŭm hdră êlan mkăn msĕ si đru ba mnuih mă bruă mda asei wĭt mă bruă ti krĭng bruă duh mkra êpul lu, hrŏ prăk mưn lăn, lui prăk jia, đru bi liê kdrăp mnơ̆ng nah gŭ mkra mjing mnơ̆ng dhơ̆ng kơ êpul hgŭm bruă lŏ hma… mâo dŭm gưl, dhar bruă, alŭ wăl hlue ngă. Keh mđĭ kyar êpul hgŭm bruă čar Dak Lak brei kơ 32 êpul hgŭm bruă čan êbeh 19 êklai prăk; Keh đru msir mgaih bruă mă kơ 8 êpul hgŭm bruă brei čan êbeh 1 êklai prăk.

Nguyễn Thiên Văn, K’iăng Khua Knơ̆ng bruă sang čư̆ êa čar Dak Lak brei thâo, lu êpul hgŭm bruă ti alŭ wăl mâo hnơ̆ng điêt, prăk bi liê ƀiă, hnơ̆ng ngă bruă điêt, bi hgŭm adôk awăt. Čiăng dưi ngă ngă hdră kñăm truh thŭn 2030, čar mâo hlăm brô 800 êpul hgŭm bruă leh anăn 1000 êpul bi hgŭm, Nguyễn Thiên Văn brei thâo:

 “Hlăm wưng kơ anăp brei mđĭ ktang hĭn bruă mkŏ mjing, mkra mđĭ êpul hgŭm bruă hlue si Hdră bhiăn êpul hgŭm bruă thŭn 2012 leh anăn anăp aneo hruê 1/7/2024 srăng pŏk ngă hlue ngă Hdră bhiăn Êpul hgŭm bruă thŭn 2023. Hlăm Hdră bhiăn Êpul hgŭm bruă thŭn 2023 mâo 8 êpul hdră êlan leh anăn bruă tuh tia mkra mjing đru hjăn. Akâo kơ gưl bruă Đảng, bruă sang čư̆ êa dŭm Knơ̆ng, dhar bruă ăt mđing mnuih mă bruă đru kơ ƀĭng lŏ hma mơ̆ng klei bi ala, snăn kơh bruă ba yua mrô, kreh knhâo mrâo mrang, ba yua hnơ̆ng čuăn, klei găl hlăm bruă mkra mjing djăp mta bruă mâo klei bi mlih ti grăp alŭ wăl.

 Dưi bi mklă, hlăm dŭm thŭn êgao, bruă duh mkra êpul lu ti čar Dak lak đĭ kyar kơ ênoh leh anăn mđĭ hnơ̆ng jăk, đru lu hlăm bruă mlih hdră mkra mjing, mđĭ ênoh mnơ̆ng dhơ̆ng, đru bi mlih krĭng ƀuôn sang mrâo./.