VOV4.Êđê - Êbeh 10 thŭn hluê ngă bruă ksiêm mkă klei yua pui hluê kdrăp điện tử, Anôk bruă pui kmlă Dak Lak ngă leh bruă bi mlih ba yua công tơ điện tử, mjing tur knơ̆ng kjăp hlăm hdră mlih mrô wưng mrâo. Anei jing klei găl čiăng anôk bruă pui kmlă hluê ngă hdră mkŏ mkra êlan pui kmlă kreh knhâo hlăm êdei anăp.

Mơ̆ng thŭn 2011, Knơ̆ng bruă pui kmlă Dak lak mphŭn bi hrô kơ mmông pui kmlă masin hŏng mmông pui kmlă điện tử. Mmông pui kmlă anei đru kơ bruă pui kmlă ktuê dlăng mrô pui kmlă. Amâo guôn nao čih ênoh mrô pui kmlă grăp mlan msĕ si êlâo ôh. Mơ̆ng anăn, mơ̆ng internet, phung yua ăt dưi čŏng ksiêm dlăng hnơ̆ng pui kmlă ba yua leh. Ayŏng Nguyễn Xuân Thành, mrô sang 225, êlan Y Moan, ƀuôn prŏng Ƀuôn Ama Thuôt brei thâo, mơ̆ng leh yua mmông pui kmlă điện tử, ñu đăo knang hlăm klei klă mngač ksiêm yap pui kmlă leh anăn hơĭt kơ hnơ̆ng êđăp ênang yua pui kmlă. Mơ̆ng kdrăp dưm hlăm đĭng blŭ djă hiu, ñu dưi ktuê dlăng hnơ̆ng gŏ sang pô yua pui kmlă hlăm grăp mlan:Kâo ƀuh găl snăk: tal sa jing hnơ̆ng djŏ klă; tal dua jing ênưih ktuê dlăng pui kmlă pô yua, đru pô pral mkra dŭm kdrăp pui kmlă hlăm sang. Si tô hmô yan anei snăn mâo đa đa kdrăp pô mdjiê hĕ, amâodah bi hrŏ wưng yua, srăng đru kơ bruă pui kmlă êđăp ênang leh anăn mkiêt mkriêm hĭn.

Hŏng Knơ̆ng bruă Dawa, ti Wăl tuh tia mkra mjing Tân An, grăp mlan tla êbeh 80 êklăk prăk pui, Hồ Thị Lộc - K’iăng Khua Knơ̆ng bruă brei thâo:Mơ̆ng hruê ba yua kdrăp ksiêm dlăng hlăm đĭng blŭ mơ̆ng bruă pui kmlă snăn kâo ƀuh lu klei jăk, msĕ si thâo ƀuh klei yua pui kmlă hlăm grăp hruê grăp mlan, tal dua jing mâo klei luič pui kmlă snăn hưn hlăm anăn mtam hrô kơ iêo hlăm đĭng blŭ. Kdrăp anăn găl jăk kơ bruă ksiêm dlăng leh anăn mâo hră tla prăk, snăn tŭ dưn kơ anôk bruă duh mkra. Mơ̆ng kdrăp anăn, tơdah ƀuh hnơ̆ng pui kmlă yua hlăm hruê đĭ lu đei snăn kâo srăng brei kơ bruă jdră mnêč ktuê dlăng êlan klei pui leh anăn kdrăp mnơ̆ng, đru kơ knơ̆ng bruă ktuê dlăng leh anăn mkiêt mkriêm pui kmlă.

Truh ară anei, bruă yua dŭm kdrăp ba yua ênoh mrô pui kmlă čiăng yua kơ bruă gĭt gai mkra mjing, hdĭp mda jing leh klei lu mnuih leh anăn anôk bruă duh mkra ti Dak Lak mưng yua. Dŭm ênoh mtô anei mâo Knơ̆ng bruă pui kmlă Dak Lak kah mbha hlăm hla pŏk Web https://cskh.cpc.vn  leh anăn hlăm kdrăp mkŏ dưm hlăm đĭng blŭ, jing sa klei bi êdah klei klă mngač hlăm bruă blei pui kmlă. Nguyễn Văn Chương, K’iăng Khua pui kmlă Dak Lak brei thâo, mơ̆ng êbeh 10 thŭn ba yua mmông pui kmlă điện tử leh anăn pŏk ngă kdrăp hrui mă ênoh mrô mmông pui kmlă mơ̆ng kbưi đru mđĭ bruă kriê dlăng mnia blei leh anăn mđĭ hnơ̆ng jăk duh kơ phung yua pui kmlă ti Dak Lak. Anei ăt jing klei găl čiăng kơ bruă pui kmlă ngă hdră mkŏ mjing êlan kleo pui kmlă thâo mĭn hlăm êdei anăp.Hŏng hdră kñăm kčah jing bi leh êlan klei pui thâo mĭn hlăm dŭm thŭn kơ anăp kluôm čar Dak lak snăn knơ̆ng bruă ăt dôk hlue ngă hdră kñăm anăn. Mơ̆ng thŭn 2016 knơ̆ng bruă duh bi liê kdrăp khăt pŏk mơ̆ng kbưi (SCADA) rơ̆ng hnơ̆ng djŏ klă, êđăp ênang, wưng kčah mkăp pui bhiâo leh anăn hnơ̆ng đăo knang đĭ. Thŭn 2014 snăn knơ̆ng bruă duh bi liê dŭm boh êdeh mkra pui pral, jih jang klei truh amâodah mkra mdĭ hlăm klei pui amâo guôn khăt pui kmlă. Knơ̆ng bruă ăt pŏk ngă hưn hră ênoh prăk pui điện tử mơ̆ng 1/7/2022 čiăng pioh kơ bruă kriê dlăng hră prăk pui leh anăn prăk jia êlam hĭn, ngă djŏ klei čiăng bi mlih mrô mơ̆ng Knŭk kna.

Truh krah thŭn anei, Dak Lak mkŏ dăp leh mmông pui kmlă điện tử kơ êbeh 580 êbâo čô yua pui kmlă (ênoh 96,5%). PC Dak Lak gĭr bi leh hrô 100% mmông pui kmlă điện tử leh anăn čŏng mă ênoh mrô hlăm thŭn 2022 anei. Hŏng dŭm hdră msir mrâo mrang, Knơ̆ng bruă gĭr ba dŭm kdrăp bruă ksiêm mkă pui kmlă hŏng grăp čô, hlăm djăp anôk leh anăn hlăm djăp kdrăp pui kmlă. Pui kmlă Dak Lak ăt lŏ dơ̆ng mkŏ mjing dŭm kdrăp điện tử ngă bruă jăk hĭn.  Pui kmlă Dak Lak ăt lŏ dơ̆ng mkŏ mjing dŭm kdrăp msĕ si dưi đăo knăl hnơ̆ng yua kăp đru, čŏng hưn brei răng kơ phung yua klei amâo jăk hlăm hdră yua pui kmlă./.