Dôk blei dŭm mta mnơ̆ng kơ Tết ti Sang mnia Coop Mart ƀuôn prŏng Ƀuôn Ama Thuôt, amai Võ Thị Mỹ Hương, ti ƀuôn hgŭm Tân Lợi, ƀuôn prŏng Ƀuôn Ama Thuôt brei thâo, thŭn anei kyua bruă duh mkra dleh dlan anăn gŏ sang amai knŏng blei dŭm mta čiăng êdi.

 “Gŏ sang ăt blei dŭm mta mnơ̆ng dhơ̆ng čiăng êdi pioh yua hlăm gưl Tết, kyua klei ruă Covid-19 adôk mâo anăn mnuih ƀuôn sang amâo đei blei mnơ̆ng ôh, knŏng blei mnơ̆ng čiăng yua êdi đuč.”

 Hiu dlăng ti sang mnia Wăl krah ƀuôn prŏng Ƀuôn Ama Thuôt dưi ƀuh, dŭm mta mnơ̆ng dhơ̆ng pioh kơ yan Tết mâo phung blei ba čhĭ hŏng lu mta, siam, khădah snăn hnơ̆ng blei ăt ƀiă mơh.

 Amai Lê Thị Thùy Như, wăl C, sang mnia ƀuôn prŏng Ƀuôn Ama Thuôt čhĭ leh 15 thŭn dŭm mta mnơ̆ng yua aguah tlam brei thâo hnơ̆ng blei thŭn anei ƀiă snăk:

 “Amâo tloh msĕ si thŭn doh ôh, msĕ si thŭn dih čhĭ hlăm brô 5-7 êklăk, thŭn anei knŏng 2-3 êklăk đuč. Thŭn dih dŭm mta mnơ̆ng anei mơ̆ng 20 kơ dlông snăn čhĭ nanao, ƀiădah thŭn ƀiă hĭn”

Lu sang mnia čhĭ ƀêñ keŏ, asăr mkai ăt lĕ hlăm boh klei ƀiă mnuih blei. Hlue si Lương Ngọc Hoàng khua sa sang čhĭ ƀêñ keŏ ti sang mnia Ƀuôn Ama Thuôt, thŭn anei klei blei mnơ̆ng ƀiă, knŏng lu hlăm dŭm hruê knhal jih hruê kăm, ñu knŏng blei mâo 60% mkă hŏng thŭn dih, ƀiădah hŏng ai blei msĕ si ară anei năng ai ăt srăng amâo mâo jhŏng čang hmăng srăng jih mnơ̆ng ôh:

 “Hnơ̆ng blei ăt kăn lu mơh, ênoh amâo đĭ ôh. Msĕ si thŭn dih ară anei ăt lu mơh, mkă hŏng thŭn dih snăn ară anei ăt ka mâo lu phung blei.”

Mĭn tĭng ti kdrêč hrŏ klei ai blei hlăm gưl Tết thŭn anei, lu phung čhĭ mnia ti Dak Lak pral ksiêm hriăm klei čiăng blei mơ̆ng phung blei yua čiăng mâo hdră msir hlăm klei kriê pioh, mbha mnơ̆ng dhơ̆ng. Đa đa phung blei ăt pŏk mlar dŭm hdră čhĭ hlăm đĭng blŭ, website, facebook, zalo čiăng mâo mnuih blei. Dŭm hdră đru mdul ênoh hŏng bruă mlih mrâo hdră rang mdah, hưn mthâo mnơ̆ng dhơ̆ng ăt mâo phung ba čhĭ ba yua kñăm iêô jak klei mđing dlăng phung blei yua, mtrŭt klei ba yua. Amai Nguyễn Hằng Nga, khua sang čhĭ čhum ao brei thâo:

 “Thŭn anei snăn êmưt hĭn, phung blei snăn hrŏ lu. Phung mưng blei ăt truh ƀiădah sitôhmô êlâo doh diñu blei 10 snăn ară anei blei 5-6, phung amâo mưng ƀiă hĭn. Phung mnia blei ăt gĭr ba čhĭ, dŭm mta mnơ̆ng đĭ ênoh ƀiădah pô ăt kăn jhŏng mđĭ mơh kyua phung mưng blei mơ̆ng êlâo, pô mđĭ ênoh amâo dưi čhĭ ôh anăn pô čhĭ čiăng krơ̆ng phung blei, boh nik mâo đa đa mnơ̆ng amâo mđĭ ôh, mâo mnga ƀiă đuč čiăng êgao wưng dleh dlan”

Amâo djŏ knŏng anôk ba čhĭ mnơ̆ng dhơ̆ng ƀiă mnuih ôh ƀiădah anôk čhĭ mnga ăt ƀiă mơh. Quang Thế Phong, sa čô čhĭ mnga sŭng gơr ti să Hoà Phú, ƀuôn prŏng Ƀuôn Ama Thuôt brei thâo, thŭn anei yan adiê mđao găl ênưih kơ dŭm đang pla mnga sŭng gơr khăt hla leh anăn ngă bruă čiăng kơ mnga blang trip hlăm yan mnga. Yan mnga Tết thŭn anei, Phong pla 3000 ana mnga sŭng gơr, hŏng lu gưl thŭn mdê mdê. Ara anei ñu dôk pla leh anăn ba čhĭ. Yan mnga thŭn anei ênoh čhĭ lu hĭn thŭn dih hlăm brô 500 phŭn, ƀiădah amâo mâo prăk mnga lu ôh.

           “Ênoh ênil thŭn anei amâo mâo msĕ si đar thŭn ôh kyua mnga mao dŭm kwar mkăn diñu ba lu. Si tôhmô sa ana thŭn doh čhĭ 4 êklăk snăn Tết thŭn anei bi knar hrŏ 3 êklăk mkrah, boh nik 3 êklăk. Dŭm đang hmei čŏng mkra mlih ênoh čhĭ kơ phung blei yua, leh anăn ênoh adôk srăng ba ti wăl krah Ƀuôn Ama Thuôt čhĭ hlăm hruê 22/12 hlue mlan ƀlĕ kơ anăp.”

 Mnuih ƀuôn sang hyuă kjăp klei bi liê leh anăn bi mlih kơ klei mưng blei mnơ̆ng Tết mơ̆ng dŭm gŏ sang ngă kơ anôk ba čhĭ mnơ̆ng Tết ti Dak Lak hrŏ li. Phung mnia blei leh anăn anôk mnia blei mă mnơ̆ng ƀiă mơh, wăt tơdah snăn grăp čô ăt čang hmăng srăng mâo lu mnuih blei hlăm dŭm hruê giăm Tết, wưng phung mă bruă wĭt kơ ƀuôn sang leh anăn mâo prăk pah mni./.