VOV4.Êđê- Djŏ tuôm kơ klei bi rai dliê Pơmu ti čuê dliê mrô 1219 hlăm kdrêč dliê kriê dlăng mơ̆ng Anôk bruă dliê kmrơ̆ng Krông Bông mâo VOV hâo hưn, sa čô khua Knơ̆ng bruă Lŏ hma mđĭ kyar krĭng ƀuôn sang čar Dak Lak brei thâo, êpul bruă hưn mdah leh hŏng Anôk bruă sang čư̆ êa čar lehanăn dôk guôn hdră msir mghaih klei anei.

Hlue si khua anei, hlăm wưng êgao, anôk bruă dliê kmrơ̆ng Krông Bông mâo phăn jao kriê dlăng, răng mgang dliê ƀiădah ka pral kdal, hluê ngă kjăp, kƀah klei tŭ dưn hlăm bruă hiu suang dlăng, mkhư̆ klei bi rai dliê hlăm ênhă mâo phăn jao kriê dlăng, răng mgang, lui bluh mâo klei bi rai dliê, tlĕ mă kyâo hlăm wưng sui. Kyua anăn, Knơ̆ng bruă Lŏ hma mđĭ kyar krĭng ƀuôn sang čar mtă kơ Anôk bruă dliê kmrơ̆ng Krông Bông mkŏ mjing hdră ksiêm dlăng, ƀuah mkra, bi mklă klei đua klam mơ̆ng pô djă akŏ, dŭm êpul êya, mnuih djŏ tuôm. Boh tŭ ksiêm dlăng, bi mklă anei brei hluê ngă lehanăn ba m’ĭt kơ Anôk bruă sang čư̆ êa čar Dak Lak êlâo kơ hruê 4/3 kơ anăp./.

Pô mblang: H’Nêč Êñuôl