VOV4.Êđê - “Dak Lak brei ngă lu bruă hĭn hlăm hdră gang mkhư̆ klei mngăt êa ti phung hđeh”, anei jing mta phŭn mâo Êpul bruă Dhar kreh – mtô bi hriăm anôk bruă kƀĭn ala gưl XV mă bruă hŏng Anôk bruă sang čư̆ êa čar Dak Lak kơ bruă hluê ngă hdră gang mkhư̆ klei mngăt êa ti phung hđeh hlăm alŭ wăl čar hruê 11/8. Hluê klei hưn mơ̆ng Dak Lak, klei mngăt êa ti phung hđeh mâo nanao, ênoh hđeh djiê lu.

Thŭn 2016 truh ară anei, êbeh 420 čô hđeh djiê kyua mngăt êa, knŏng 6 mlan akŏ thŭn 2022, mâo leh 55 čô djiê, lu jing hđeh mơ̆ng 6-13 thŭn. Blŭ ti knăm anei, Tạ Văn Hạ, K’iăng khua Êpul bruă Dhar kreh – mtô bi hriăm anôk bruă kƀĭn ala hưn leh klei dleh dlan lehanăn êdu kƀah mâo čar DakLak dôk tlă anăp. Mbĭt anăn mtă kơ dŭm gưl dhar bruă hlăm čar mđĭ hdră mtô mblang kơ mnuih ƀuôn sang kơ hdră gang mkhư̆ klei mngăt êa ti phung hđeh./.

H’Nêč pô mblang