VOV4.Êđê- Dŭm hruê anei, ƀuôn mnga Xóm Đảo ti wăl krah Ƀuôn Trăp, kdriêk Krông Ana, čar Dak Lak hơ̆k mơak hĭn. Hluê si phung pla mjing, thŭn anei lu sang pla mnga jhŏng mđĭ ênhă pla mnga tết mkă hŏng grăp thŭn. Yan adiê găl ênưih, ênoh hơĭt kjăp leh anăn đĭ lu anăn phung pla mơak snăk.

Atăt tuê nao dlăng đang mnga mprăp čhĭ hruê Têt, Hoàng Yên, ti alŭ mrô 7, wăl krah ƀuôn Trăp, kdriêk Krông Ana, čar Dak Lak brei thâo: Păt čiăng jih abŭ mnga anei mâo mnuih blei leh, dŭm hruê kơ anăp srăng ba jao. Yan mnga Têt thŭn anei, Yên pla 3 sao mnga cúc lehanăn mnga lay ơn djăp mta, đĭ truh mkrah wah mkă hŏng yang đar thŭn. Khădah klei ruă Covid 19 bluh mâo dleh dưi ksiêm dlăng, ƀiădah hŏng hnơ̆ng hrui blei ară anei, Yên ăt đăo knang kơ klei čiăng blei yua mnga hlăm wưng têt djuê ana thŭn anei:

“Dlăng kluôm, thŭn anei yan adiê jăk găl hĭn mkă hŏng yang đar thŭn, snăn hmei pla lu hĭn mơh mkă hŏng thŭn êlâo. Tal êlâo mơ̆ng hruê mlan pŭr mlan 10 lehanăn mlan 11 ênoh čhĭ mnga đĭ hmei hơ̆k m’ak mơh, đăo knang Têt thŭn anei ênoh čhĭ mnga ăt đĭ mơh”.

Phung blei mnga  Têt  ti đang mnga

        Ăt mđĭ ênhă pla mnga Têt mkă hŏng yang dar thŭn, Trần Đình Sang, Khua êpul hgŭm pla mnga wăl krah Ƀuôn Trăp brei thâo, mơ̆ng 1 mlan êlâo, lu phung ghan mnia nao kuôl kă blei ti đang war, ênoh ăt đĭ mkă hŏng êlâo. Amâo djŏ knŏng gŏ sang ñu, lu gŏ sang mkăn hlăm êpul hgŭm ăt mđĭ ênhă pla mnga têt čiăng mkăp kơ klei čiăng mơ̆ng wăl anôk mnia mblei.  Ară anei, ƀuôn mnga Xóm đảo, ti alŭ mrô 7, wăl krah ƀuôn Trăp dưi yap jing “Kdrăn mnga” prŏng êdi ti kdriêk Krông Ana. Mbĭt hŏng hdră mđĭ kyar bruă pla mnga, dŭm đang war lŏ bi hgŭm ngă gru hmô “Ƀuôn mnga lăn êa jăk siam” kơ mnuih ƀuôn sang, phung tuê nao čhưn dlăng mnga lehanăn mă rup, jing anôk hiu čhưn ênguê, đru kơ mnuih ƀuôn sang mđĭ hnư hrui wĭt hlăm wưng Têt. Trần Đình Sang brei thâo:

“Ară anei sang kâo pla 4 sao, lu jing mnga cúc lehanăn mnga lay ơn dŭm mta êa mil. Ară anei, têt anei mâo leh lu mnuih kuôl kă blei, năng ai têt aneí srăng amâo djăp ôh mnga kyua hlăm wưng êlâo, klei ruă tưp bluh mâo ktang, dleh dưi ksiêm dlăng, anăn mnuih ƀuôn sang ti krĭng mkăn amâo đei pla mnga ôh; ƀiădah êpul bruă hmei tinei ăt mđĭ ênhă pla lehanăn ară anei, grăp sang sang mđĭ s’aĭ ênhă pla”.

Khăt mnga jao kơ phung kăp čhĭ

        Mkŏ mjing mơ̆ng knhal jih thŭn 2018, Êpul hgŭm bruă pla mnga wăl krah Ƀuôn Trăp ară anei mâo 14 čô hgŭm, ênhă pla mnga kluôm giăm 3 ha. Amâo djŏ knŏng pla mnga čhĭ Têt, mnuih hgŭm hlăm êpul lŏ pla mnga mkăp kơ wăl anôk mnia mblei hlăm dŭm hruê aguah tlam, knăm m’ak, hŏng lu mta mnga msĕ si cẩm chướng, cúc, lay ơn, đồng tiền. Hluê si Nguyễn Xuân Hậu, Khua êpul hgŭm mnuih ngă lŏ hma wăl krah Ƀuôn Trăp, bruă pla mnga đru leh kơ lu gŏ êsei lŏ mâo hnư hrui wĭt h’ĭt kjăp, mđĭ lar klei găl mâo mơ̆ng alŭ wăl hlăm bruă pla mjing, mnia mblei. Bruă mkŏ mjing êpul hgŭm bruă pla mnga ăt mjing klei găl kơ mnuih ƀuôn sang hlăm bruă dưi mă čan prăk, nao hgŭm hlăm adŭ mjuăt bi hriăm kơ hdră mnêč, mơ̆ng anăn ba yua kdrăp kreh knhâo, mrâo mrang hlăm bruă pla mjing lehanăn mnia mblei:

“Hmei ăt mđing mkŏ mjing êpul hgŭm bruă mbĭt anăn mkăp prăk duh bi liê, prăk čan mjing bruă mă kơ mnuih ƀuôn sang tinei lehanăn ăt akâo kơ Êpul hgŭm mnuih mă bruă lŏ hma dŭm gưl mjing klei găl grăp blư̆ yan mnga truh đru mtrŭt mđĭ hdră hưn mthâo dŭm mta mnga hlăm hla pŏk web yang ƀuôn ăt msĕ mơh hlăm kdrăp hâo hưn mkăn si srăng ngă čiăng dưi hrui bleịih mnga kơ mnuih ƀuôn sang”.

       Leh sa wưng dôk ñăt kriêp kyua hmăi mơ̆ng klei ruă tưp, dŭm klei bi êdah jăk mơ̆ng wăl anôk mnia mblei mnga Têt đru leh kơ mnuih pla mnga ti Ƀuôn Trăp, kdriêk Krông Ana, čar Dak Lak hơ̆k m’ak hĭn. Yan adiê jăk găl, ênoh čhĭ h’ĭt ba wĭt leh kơ mnuih buôn sang klei čang hmăng kơ yan mnga Têt mâo hnơ̆ng mnga lu, ênoh čhĭ đĭ h’ĭt kjăp./.

                                                   Pô mblang: H’Nêč Êñuôl