VOV4.Êđê - Hŏng klei grăp hruê mâo mơ̆ng 800 truh 1000 čô mnuih ruă Covid-19 ngă kơ bruă mdrao mgŭn ti ƀuôn prŏng Ƀuôn Ama Thuôt, čar Dak Lak lĕ hlăm klei êgao hnơ̆ng. Ƀuôn prŏng Ƀuôn Ama Thuôt dôk gĭr ktưn ngă hdră msir mbruă, djŏ guôp čiăng kơ bruă đru F0 ti sang dưi mâo klei tŭ dưn.

Amai Võ Thị Thủy, sa čô ngă bruă mdrao mgŭn ti ƀuôn hgŭm Ea Tam, ƀuôn prŏng Ƀuôn Ama Thuôt, čar Dak lak brei thâo, dŭm hruê êgao, êpul êya bruă mdrao mgŭn hlăk dôk jih ai hŏng bruă kyua ngă lu bruă klam. Wăt kơ hruê amâodah mlam mmăt, tơdah mâo arăng iêo hŏng đĭng blŭ nao đru bruă mdrao mgŭn ti sang, phung mă bruă mdrao mgŭn mơ̆ng anôk bruă mdrao mgŭn ƀuôn hgŭm Ea Tam lŏ pral nao mtam yơh“Tơdah diñu mâo klei bi knăl, SPOS ti gŭ 96 pô srăng čŭt hơô čum ao nao đru mdưm osi brei bi êwa, leh brei bi êwa osi srăng mtô kơ phung hlăm sang diñu cŏng mdưm. Tơdah ară anei dôk tinăn dŭm mmông amâo srăng lŏ mâo mnuih mă bruă ôh, nao hlăm grăp mnĭt mmông, 2 – 3 mmông aguah ăt nao mơh. Tơdah phung F0 mâo klei čiăng đru hmei srăng nao mtam yơh. Ênoh F0 hlăm ƀuôn hgŭm đĭ lu, kâo ƀuh jing êgao hnơ̆ng hŏng phung ngă bruă mdrao mgŭn hlăm hruê mmông anei.”

Hluê si Ngô Mạnh Cường, Khua kiă kriê anôk bruă mdrao mgŭn ti ƀuôn hgŭm Ea Tam, ƀuôn prŏng Ƀuôn Ama Thuôt, Ea Tam jing alŭ wăl mâo ênoh mnuih ƀuôn sang lu hŏng êbeh 36 êbâo čô leh anăn jing alŭ wăl mâo mnuih djŏ klei ruă tưp Covid-19 lu. mơ̆ng hruê ngă bruă mdrao kơ F0 ti sang truh kơ ară anei, ƀuôn hgŭm đru mdrao leh kơ 1.300 čô F0, hlăm anăn mâo 400 čô F0 dưi mdrao hlao, knŏng 6 čô nao đih ti sang êa drao. Anôk bruă mdrao mgŭn ti ƀuôn hgŭm Ea Tam mkŏ mjing leh êpul Zalo đru kơ mnuih ƀuôn sang mâo klei ruă tưp Covid-19 hlăm alŭ wăl. Hluê anăn, hlăm grăp hruê, mnuih ƀuôn sang srăng mâo phung ngă bruă mdrao mgŭn kriê dlăng, ktuê dlăng, mdrao mgŭn ti sang. Tơdah sĭt mâo klei amâo jăk, sĭt mnuih ƀuôn sang hưn, phung ngă bruă mdrao mgŭn srăng nao mtam. Ngô Mạnh Cường lač:“Jih jang phung mâo klei ruă tưp Covid-19 srăng nao hgŭm hlăm êpul anăn, tơdah ƀuh đĭ hriê kjham srăng hưn mtam hlăm êpul zalo anăn, ngă sơnăn pô dưi ksiêm dlăng jăk hĭn. Sitôhmô, lu klei mtă, video hriăm bi êwa, pô srăng lač kơ diñu dlăng leh anăn hluê ngă msĕ video anăn đuč, anăn jing hdră hâo hưn jăk hĭn, amâo dưi nao truh kơ grăp boh sang leh anăn mtô klei hriăm bi êwa ôh. Hlăm êpul anăn, mnuih ƀuôn sang dlăng kơ boh sĭt klei mtŭk, êngoh, dleh bi êwa, anăn jing klei bi knăl kreh mâo, grăp čô mâo sơăi klei êngoh, mtŭk, dleh bi êwa, kyuanăn diñu ƀuh mâo klei hơĭt hlăm klei ai tiê. Ară anei dưn yua klei kreh knhâo mrâo mrang, tơdah amâo mâo kdrăp mrâo mrang srăng êwiên mtam yơh.”

Hluê si aê mdrao Võ Minh Hùng, khua kiă kriê knơ̆ng bruă mdrao mgŭn ƀuôn prŏng Ƀuôn Ama Thuôt, yap truh kơ ară anei, ti alŭ wăl ƀuôn prŏng Ƀuôn Ama Thuôt dôk ngă klei bi ktlah, mdrao mgŭn ti sang kơ giăm 7.000 čô F0. Mâo dŭm ƀuôn hgŭm mâo giăm 1000 čô F0 dôk mdrao ti sang. Khădah dŭm anôk bruă mdrao mgŭn lŏ dưi bi mbŏ thiăm mnuih mă bruă jing phung čŏng ngă bruă, ƀiădah ênoh mnuih mă bruă ăt dôk êpih mkă hŏng ênoh mnuih ruă dôk đĭ hmar, ngă kơ bruă mdrao mgŭn jing êgao hnơ̆ng, mâo klei ktrŏ prŏng.“Klă sĭt boh klei mnuih mă bruă mơ̆ng dŭm anôk bruă mdrao mgŭn, ayŏng amai adei bruă mdrao mgŭn mơ̆ng dŭm să, ƀuôn hgŭm, khădah mâo klei nao hgŭm mơ̆ng phung čŏng ngă bruă ƀiădah ăt jing êgao hnơ̆ng. Hmăng hmưi mnuih ƀuôn sang tơdah hmao ƀuh jing F0 srăng hưn mdah mtam hlăm alŭ wăl, hluê ngă djŏ 5 klei mtă leh anăn čŏng ksiêm dlăng klei suaih pral pô ti sang. Tơdah amâo klei amâo jăk srăng hưn mtam hŏng dŭm anôk bruă mdrao mgŭn čiăng kơ hmei mâo klei mtô lač, hluê ngă jăk bruă kriê dlăng klei suaih pral kơ phung F0 dôk mdrao ti sang. Hmei ăt mâo leh klei gĭt gai kơ jih jang phung ngă bruă mdrao mgŭn hlăm kluôm ƀuôn prŏng mâo klei uêñ mĭn leh anăn hmao mâo klei đru kơ phung F0, amâo lui ôh F0 amâo hưn mthâo hŏng anôk bruă mdrao mgŭn”

Yap truh kơ hruê 2/3, ƀuôn prŏng Ƀuôn Ama Thuôt mâo leh êbeh 15.000 čô djŏ klei ruă tưp Covid-19, hlăm anăn mâo giăm 8.500 čô dưi mdrao hlao leh anăn 36 čô djiê. Ƀuôn prŏng Ƀuôn Ama Thuôt ăt jing anôk mâo ênoh mnuih djŏ klei ruă tưp Covid-19 lu hĭn ti čar Dak Lak.

Ti anăp boh klei anei, anôk bruă mdrao mgŭn mâo leh klei gĭt gai kơ dŭm anôk bruă mdrao mgŭn să, ƀuôn hgŭm lŏ mđĭ hĭn bruă ksiêm dlăng, ngă bruă ksiêm mkă kman hŏng phung mâo klei hyưt ktang čiăng hmâo ƀuh phung F0 čiăng ngă bruă mdrao mgŭn leh anăn ñĕ đuê̆ kơ klei tưp lar hlăm yang ƀuôn, brei phung hđeh điêt mdei sang hra leh anăn mdei êjai bruă nao hriăm ti sang hră hŏng phung hđeh sang hră gưl 1, gưl 2, gưl 3 mbĭt anăn mtrŭt mđĭ bruă hâo hưn kơ mnuih ƀuôn sang kơ bruă gang mkhư̆ klei ruă tưp msĕ si hluê ngă djŏ 5 klei mtă.

Hŏng bruă mdrao mgŭn, čiăng djăp ênŭm mnuih mă bruă kơ dŭm anôk bruă mdrao mgŭn să, ƀuôn hgŭm êjai ênoh mnuih ruă đĭ hmar, ênoh F0 mdrao ti sang jing lu êdi. Anôk bruă mdrao mgŭn ƀuôn prŏng mđĭ hĭn leh ênoh mnuih mă bruă hlăm dŭm anôk mdrao mgŭn să, ƀuôn hgŭm, dŭm anôk bruă hiu mdrao. Klă klơ̆ng grăp anôk bruă mdrao mgŭn dưi bi mbŏ mơ̆ng 4 truh kơ 6 čô jing phung čŏng ngă bruă, phung aê mdrao leh jih thŭn mă bruă amâodah phung mă bruă mdrao mgŭn êngao knŭk kna hlăm alŭ wăl.