Hruê 30 mlan 12 thŭn 2023, Khua knŭk kna bi mklă leh hdră čuăl mkă kluôm čar Dak Lak wưng thŭn 2021-2030, hnơ̆ng trah dlăng truh thŭn 2050. Hluê hdră čuăl mkă, thŭn 2030 čar Dak Lak jing anôk hriê čhưnjăk jĭn, jak iêu lu tuê hriê čhưn ênguê hlăm lehanăn êngao ala čar, ƀuôn prŏng Ƀuôn Ama Thuôt jing sa krĭng đĭ kyar ti lăn dap kngư, ñŭ kma lehanăn bi hgŭm hluê hdră êlan pŏk mlar hŏng krĭng lehanăn tar rŏng lăn; mtrŭt mđĭ hdră mkŏ dăp bruă duh mkra hluê hdră đĭ kyar h’ĭt kjăp. Hlăm anăn, gĭr mâo hnơ̆ng đĭ kyar kah knar grăp thŭn wưng 2021 - 2030 mâo 11%/thŭn; GRDP kah knar sa čô mnuih truh kơ thŭn 2030 mâo êbeh 130 êklăk prăk. Dŭm ênoh čuăn anei mâo bi mklă jing djŏ guôp hŏng hdră đru kčĕ mơ̆ng lu phung thơ̆ng kơ bruă, phung mă bruă kreh knhâo, phung mă bruă kriê dlăng dŭm phŭn dhar bruă, alŭ wăl lehanăn jih jang mnuih ƀuôn sang hlăm čar. Võ Ngọc Tuyên, Khua knơ̆ng bruă Hdră kčah – Duh bi liê čar Dak Lak brei thâo:

“Čuăl mkă čar Dak lak dưi bi mklă leh boh tŭ dưn klei thâo mơ̆ng êpul êya, ai tiê đua klam mơ̆ng jih anôk bruă kđi čar lehanăn mnuih ƀuôn sang hlăm čar. Tal dua dưi lač, hdră čuăl mkă čar Dak lak tal anei dưi hluê ngă kjăp, siă suôr hŏng dŭm hdră êlan mơ̆ng ala čar, ksiêm hriăm, tŭ mă dŭm klei hriăm mơ̆ng ala tač êngao lehanăn hlăm ala čar, ba yua djŏ guôp hŏng klei mâo mơ̆ng alŭ wăl hluê tur knơ̆ng ba yua jih klei găl mâo lehanăn klei đăo knăl dleh dlan, lông dlăng hlăm wưng ti anăp. Mơ̆ng anăn, ba mdah hdră msir, bruă klam čiăng mâo hdră hluê ngă jăk klei čuăl mkă”.

          Hnơ̆ng trah dlăng truh thŭn 2050, Dak lak srăng jing čar mâo wăl anôk lăn dliê, knhuah dhar kreh mguôp hŏng klei mĭn mrâo, jing anôk năng hdĭp, mâo lu mnuih khăp čiăng. Kpưn đĭ hlăm êpul 25 čar đĭ kyar mrô sa hlăm kluôm ala. Ƀuôn prŏng Ƀuôn Ama Thuôt jing “Ƀuôn prŏng kphê tar rŏng lăn”, ƀuôn prŏng phŭn kơ bruă dhar kreh, răng kriê klei lu jơr ti krĭng lăn dap kngư lehanăn 3 kiêng đĭ kyar Việt Nam – Lào – Campuchia, anôk ksiêm hriăm, ba yua kdrăp kreh knhâo mrâo mrang hlăm bruă lŏ hma. Čiăng dưi ngă klei anei, Vũ Văn Hưng, Khua anôk bruă sang čư̆ êa ƀuôn prŏng Ƀuôn Ama Thuôt, čar Dak Lak brei thâo:

“Hluê hdră čuăl mkă mơ̆ng čar, ƀuôn prŏng Ƀuôn Ama Thuôt srăng mtrŭt mđĭ hdră mkra mlih bruă čuăl mkă kluôm mơ̆ng ƀuôn prŏng Ƀuôn Ama Thuôt hluê si hdră mơ̆ng Khua knŭk kna kčah mtrŭn. Mbĭt anăn, hluê ngă kjăp Hdră mtrŭn mrô 07 mơ̆ng Khua knŭk kna hlăm bruă ba yua klei bhiăn hjăn hŏng ƀuôn prŏng Ƀuôn Ama Thuôt ti dŭm hdră bruă yuôm bhăn mâo hưn leh hŏng Anôk bruă sang čư̆ êa čar čiăng ba mdah kơ Anôk kriê dlăng bruă Đảng čar mơ̆ng anăn pŏk hluê ngă. Tal 2 hluê hdră čuăl mkă kluôm snăn ƀuôn prŏng srăng čih mkra hdră duh bi liê čiăng hưn mthâo kơ čar srăng mđĭ hdră kriê dlăng lăn ala čiăng rŭ mkra, kriê dlăng kjăp dŭm bruă mâo bi mklă hlăm hdră čuăl mkă. Hluê anăn srăng mjing klei găl kơ phung duh bi liê lehanăn dŭm êpul hluê ngă hdră čuăl mkă êdei anei”.

Hluê si Nguyễn Tuấn Hà, K’iăng khua anôk bruă sang čư̆ êa čar Dak Lak, dŭm mta kñăm lehanăn hnơ̆ng trah dlăng hlăm wưng sui hlăm Hdră čuăl mkă mơ̆ng čar jing tur knơ̆ng hlăm hdră kđi čar, tur knơ̆ng klei bhiăn kjăp pŏk klei găl mrâo, klei čang hmng đĭ kyar pral lehanăn h’ĭt kjăp. Čiăng mprăp tŭ mă dŭm klei găl mrâo, čar tă leh 4 bruă klam phŭn anăn jing: Lŏ mkŏ săp wĭt hdră duh mkra ngă lŏ hma, tuh tia mkra mjing, mđĭ kyar krĭng ƀuôn prŏng, ba yua djŏ guôp ngăn dŏ čŏng mâo lehanăn 5 boh kdrŭt mâo: mkra mlih klei ngă hră m’ar, wăl anôk duh bi liê mnia mblei, mkŏ hgŭm bruă êlan klông, mđĭ kyar lehanăn ba yua kdrăp mrâo lehanăn hdră mlih mrâo, mjing boh kdrŭt phŭn, kluôm kơ hdră mđĭ kyar bruă mtô bi hriăm, bruă mdrao mgŭn, mkŏ mkra anôk bruă nah gŭ mđrăm mbĭt, mrâo mrang. Nguyễn Tuấn Hà brei thâo:

“Khua knŭk kna bi mklă leh hdră čuăl mkă čar Dak Lak pŏk lu klei găl mđĭ kyar mrâo hŏng dŭm boh tŭ yuôm mrâo kơ čar. Hluê hŏng klei găl kriê dlăng djŏ guôp lehanăn tŭ dưn dŭm ai dưi, klei mrâo mơ̆ng lăn, ngăn dŏ, mnơ̆ng gŭ lăn, dliê, êa kơ mta kñăm mđĭ kyar h’ĭt kjăp, đĭ kyar mtah djŏ guôp hŏng klei bi mlih yan adiê, pral pai mă klei găl hlăm ala čar lehanăn tač êngao, boh nik hdră tuh tia mkra mjing ênuk mrâo tal 4 kñăm thâo klă hdră bi mlih mrô ba Dak Lak đ kyar pral, h’ĭt kjăp lehanăn ñu kma, kpưn đĭ kjăp hĭn”.

Lăn dap kngư jing anôk mâo boh phŭn yuôm bhăn hlăm hdră kđi čar, duh mkra, dhar bruă, lĭng kahan – răng mgang klei êđăp ênang hŏng kluôm ala. Hlăm anăn, Dak Lak dưi dlăng jing anôk phŭn krĭng Lăn dap kngư. Ti klei bi kƀĭn hưn mthâo hdră čuăl mkă čar Dak Lak mrâo anei, sa blư̆ dơ̆ng K’iăng khua knŭk kna Trần Hồng Hà mñă, Dak Lak mâo boh tŭ yuôm bhăn, mâo lu klei găl, maoa knhuah dhar kreh jăk siam lu jơr. Čuăl mkă čar Dak Lạk jing sa hdră êlan prŏng mơ̆ng Phŭn bruă kđi čar ti Hdră mtrŭn mrô 23 kơ hdră êlan mđĭ kyar bruă duh mkra – ala ƀuôn lehanăn rơ̆ng kjăp klei êđăp ênang kluôm krĭng Lăn dap kngư truh thŭn 2030, hnơ̆ng trah dlăng truh thŭn 2045. Kyua anăn, K’iăng khua knŭk kna Trần Hồng Hà mtă:

          “Bruă klam tal êlâo mơ̆ng hdră kčah anăn jing hrăm mbĭt hŏng alŭ wăl mkăn mơ̆ng lăn dap kngư lŏ ksiêm dlăng hdră čuăl mkă krĭng Lăn dap kngư, klei anei yuôm bhăn snăk. Kyua srăng ƀuh klă čar Dak Lak hŏng klei bi hgŭm hŏng dŭm krĭng mkăn. Ƀuh klă wăl anôk phŭn mơ̆ng Dak Lak hlăm hdră bi mkŏ hgŭm hŏng dŭm krĭng ti Lăn dap kngư, hŏng dŭm krĭng mkăn msĕ si ktuê hang ksĭ kwar krah, ngŏ kwar dhŭng amâo dah hŏng Campuchia lehanăn dŭm ala čar Ngŏ Asi mkăn. Mbĭt hŏng klei đĭ kyar mơ̆ng kluôm krĭng srăng mjing sa krĭng lăn dap kngư mâo klei găl đĭ kyar pral”.

Dưi lač, bruă bi mklă lehanăn ba yua jăk dŭm klei găl mâo mbĭt hŏng hdră čuăl mkă kluôm mơ̆ng čar, bruă Đảng, sang čư̆ êa, mnuih ƀuôn sang dŭm djuê ana ti čar Dak Lak srăng lŏ dơ̆ng mđĭ lar klei găl mâo, ba yua jih ai dưi, klei mâo mjing boh kdrŭr đĭ kyar hlăm “Thŭn anak rai 2024” ba hdră duh mkra – ala ƀuôn mơ̆ng čar đĭ kyar kjăp, pral ti ktuê êlan mrâo./.