Anei jing klei mñă mơ̆ng êpul ksiêm dlăng Êpul gơ̆ng bruă ƀuôn sang čar Dak Lak hlăm mmông mă bruă hŏng bruă sang čư êa čar kơ bruă hluê ngă hdră mtrŭn mơ̆ng Êpul gơ̆ng bruă ƀuôn sang čar kơ bruă mđĭ kyar kphê kjăp mơ̆ng čar truh ti thŭn 2020 leh anăn tă hdră truh ti thŭn 2030, pia klah čŭn jing hdră mtrŭn mrô 24. Leh 7 thŭn hluê ngă hdră mtrŭn anei ( 2017 – 2023), lu mta phŭn dưi mâo msĕ si: hnơ̆ng mâo êbeh 510.000 tôn hlăm sa thŭn, kah knar mâo 27 tạ hlăm sa ha, đĭ 14% mkă hŏng mta kñăm hdră mtrŭn, Kluôm ênhă pla mjing kphê mâo hră tŭ yap êbeh 30.300ha, hnơ̆ng mâo êbeh 100.000 tôn, mâo hlăm brô 90% hnơ̆ng kphê hrui pĕ, bhu krô msĕ si hdră ngă bruă.

Hlăm mmông mă bruă, phung bi ala lač, bruă hluê ngă hdră mtrŭn 24 ăt dôk mâo lu klei dleh kpăk, boh nik jing klei lĭng čan lŏ wĭt pla kphê, ka mâo hdră bi mguôp plah wah dŭm knơ̆ng bruă mkra mjing kphê hŏng alŭ wăl. Mbĭt hŏng anăn, bruă hluê ngă dŭm mta phŭn bi mguôp ka mâo klei tŭ dưn, ênhă kphê mâo hră tŭ yap knŏng ƀiă…Êpul ktuê dlăng mñă kơ dŭm knơ̆ng, dhar bruă leh anăn alŭ wăl djŏ tuôm čiăng mâo bruă đua klam hĭn hlăm bruă hluê ngă hdră mtrŭn 24 mơ̆ng Êpul gơ̆ng bruă ƀuôn sang čar. Hlăm anăn, bruă sang čư êa čar srăng hnưm mkŏ mjing bi klă ksiêm wĭt bruă hluê ngă hdră mtrŭn anei.