VOV4.Êđê - Mơ̆ng akŏ thŭn truh kơ ară anei, čar Dak Lak drông leh giăm 260 êbâo gưl čô tuê hiu čhưn ênguê hriê čuă dlăng, lu hĭn jing phung tuê hlăm ala čar. Kluôm ênoh prăk hrui wĭt mơ̆ng bruă hiu čhưn ênguê đăo knăl mâo êbeh 121 êklai prăk. Ară anei, čar dôk gĭr ktưn hluê ngă dŭm hdră êlan čiăng krŭ wĭt bruă hiu čhưn ênguê hlăm wưng aguah tlam mrâo. Mơ̆ng knhal krah mlan 3, bruă sang čư êa čar Dak Lak ba mdah leh hdră êlan wĭt pŏk ƀăng bruă hiu čhưn ênguê hŏng ala tač êngao leh anăn hlăm ala čar hŏng êlan êbat jơ̆ng leh anăn êlan êdeh phơir.

Ksiêm dlăng leh anăn bi klă hnơ̆ng tŭ jăk dŭm mta mnơ̆ng dhơ̆ng bruă hiu čhưn ênguê mâo hlăm dŭm wăl hiu čhưn ênguê. Mtrŭt mđĭ klei bi mguôp bruă hiu čhưn ênguê hŏng dŭm čar, ƀuôn prŏng hlăm kluôm ala leh anăn ala tač êngao. Mkŏ mjing dŭm mta mnơ̆ng dhơ̆ng bruă hiu čhưn ênguê mrâo, bi mguôp čiăng mkŏ mjing dŭm tour, êlan hiu čhưn ênguê. Čar Dak Lak ăt mâo dŭm klei mtô lač klă klơ̆ng kơ dŭm anôk bruă hiu čhưn ênguê, dŭm anôk jưh mdei leh anăn klei blŭ tlao hŏng phung tuê hiu čhưn ênguê tơdah mâo klei ruă tưp Covid-19.

Y-Ƀel pô mblang